Larısa Leonıdovna qoǵamdyq jumystarmen eń alǵash Almaty oblysyna qarasty Kóksý aýdanynda qyzmet etip júrgende bastaǵan edi. 2013 jyly ol «Harýat» dep atalatyn balalar mádenı ortalyǵyn quryp, óskeleń urpaqty tárbıeleý isine bel býyp, bilek sybana kirisken bolatyn.
Osy rette Larısa Kotelnıkova Qazaqstan halqy Assambleıasynyń Almaty oblysy boıynsha fılıalanyń da jumysyna belsene aralasyp, kıeli Jetisý jerindegi tatýlyq pen bereke-birliktiń damýyna bir kisideı eńbek sińirip keledi. Qoǵam belsendisi aırandaı uıǵan aýyz birligimiz tamyryn tereńge jibergen saıyn Qazaq eli máýeli báıterekke aınalyp, qandaı burqasyn boran tursa da óziniń turaqtylyǵyn saqtap, qoǵamdaǵy syn-qaterlerge tótep beretinin jaqsy túsinedi. Sol sebepti ol elimizdiń qoǵamdyq-saıası ómirinde Qazaqstan halqy Assambleıasynyń ornyn joǵary baǵalaıdy. Bul jaıynda Larısa Kotelnıkova:
– Ulystar dostastyǵy – bizdiń basty baılyǵymyz, maqtanyshymyz. Halyq birligi – bizdiń basty jetistigimiz. Osy prınsıpterdi eskere kele Elbasymyz Qazaqstan halqy Assambleıasyn qurdy. Búginde ol ultarlyq birlik pen qoǵamdyq kelisimdi nyǵaıtýdyń azamattyq ınstıtýtyna aınalyp otyr.
Assambleıanyń negizgi mindeti – etnosaralyq qatynastar salasynda memlekettik organdarmen jáne azamattyq qoǵam ınstıtýttarymen tıimdi ózara is-qımyldy qamtamasyz etý, qoǵamda etnosaralyq kelisimdi jáne toleranttylyqty odan ári nyǵaıtý úshin qolaıly jaǵdaı jasaý, el birligin nyǵaıtý, Qazaqstan qoǵamynyń negiz qalaýshy qundylyqtary boıynsha qoǵamdyq kelisimdi qoldaý jáne damytý.
Assambleıa etnomádenı birlestikterdiń kúsh biriktirýin qamtamasyz etedi, etnomádenı ortalyqtardyń, Qazaqstan halqynyń ulttyq mádenıetteri, tilderi men dástúrleriniń órkendeýin, saqtalýyn jáne damýyn qamtamasyz etedi, – dep aınalasyndaǵy aq júrek adamdarǵa Assambleıanyń qoǵamdaǵy ornyn túsindirýden esh ýaqytta jalyqqan emes.
Qazirgi tańda Larısa Kotelnıkova Almaty oblysynda belsendi jumys istep, jurtshylyqtyń alǵysyna ıe bolǵan «Dos.kz» áleýmettik eriktiler ortalyǵyn basqaryp, elimizdegi volonterlik júıeniń damýyna kúsh salyp keledi. Sonymen qatar Almaty oblysy orys ortalyǵynyń da jumysyn qatar alyp júrgenin aıta ketýimiz kerek. Qyzý eńbektiń sońynda júrgen qoǵam belsendisi osyǵan deıin Almaty oblysynda qoǵamdyq kelisimniń saltanat qurýy jolynda 50-den astam jobany iske asyrǵan. Osy bir kórsetkishten-aq Larısa Kotelnıkovanyń óz isine jan-tánimen berilgen maman ekenin ańǵarýǵa bolady. Osy rette Larısa Leonıdovnadan qoǵamdyq jumystary el damýyna qanshalyqty áser etetinin suraǵanymyzda bylaısha jaýap bergen edi.
– Qazirgi tańda qoǵamnyń belsendiliginiń arqasynda elimiz damyp, Qazaqstanda ultaralyq kelisim kún ótken saıyn nyǵaıyp keledi. Memleket basshysy Qasym-Jomart Toqaev prezıdenttik qyzmetke kirisken kúninen bastap, halyq únine qulaq asatyn memleket qurýǵa kúsh salatynyn aıtty. Joǵaryǵa halyqtyń únin, qordalanǵan máselesin jetkizýde qoǵamdyq uıymdardyń alatyn oryny erekshe. Men ózimniń 20 jyldyq jumys tájirıbem barysynda talaı ret kóz jetkizdim. Sondyqtan Prezıdentimizdiń ár salada qoǵamdyq baqylaý uıymdastyryp, el azamattaryn qoǵam men memleket aldynda jaýapkershiligin arttyrýǵa úndeýi óte oryndy dep esepteımin. Qazirgi tańda elimizde jergilikti jáne respýblıkalyq búdjettiń jumsalýyn baqylaıtyn qoǵamdyq uıymdar men qoǵamdyq keńester jumys istep jatyr. Osylaısha, elimizde kún ótken saıyn azamattyq qoǵam qanat jaıyp keledi dep nyq senimmen aıta alamyn. Búginde elimizde qoǵamdyq baqylaýdy qamtamasyz etetin quqyqtyq-uıymdastyrýshylyq jumystary da damyp keledi. Pandemıa kezinde buǵan kózimiz anyq jetti. İndetti eńserý kezinde qaıyrymdylyq kómekterdiń halyqtyń álsiz toptaryna ádil taratylýyna jáne emhanalarǵa taratylǵan dári-dármekterdiń durys bólinýine qoǵamdyq baqylaý durys júrgizildi dep esepteımin, – dep qoǵam belsendisi oıyn ortaǵa salǵan bolatyn.
Larısa Leonıdqyzy Almaty oblysynda eriktiler isin damytýda aıryqsha eńbek sińirip júrgen mamandardyń biri. Ol qurǵan «DOS.kz» eriktiler ortalyǵy Almaty oblysyndaǵy kóptegen ıgi isterge muryndyq bolǵanyn aıta ketýimiz kerek. Ortalyq pandemıa kezinde onlaın bilim alýǵa kóshken jasóspirimderge aıryqsha qoldaý kórsetti. Osy rette «DOS.kz» eriktiler ortalyǵy jalpyulttyq «Birgemiz Bilim» jobasy aıasynda oblys aımaǵyndaǵy mektep bitirýshi túlekterdi Ulttyq birińǵaı testige daıyndaýǵa aıryqsha úles qosqanyn aıtýǵa tıispiz. Sonymen qatar ortalyqtyń mańaıyna toptasqan erikti jastar aýyl mektepterinde bilim alatyn oqýshylarǵa aǵylshyn tili, kompúterlik jáne quqyqtyq saýatyn jetildirýge bar kúsh-jigerin jumsady.
Qarasha aıynyń sońynda atqarylǵan jumystar saralanyp, jobaǵa belsene qatysqan oqýshylar men eriktiler marapattalyp, baǵaly syılyqtarǵa ıe boldy. Aıtalyq, «DOS.kz» eriktiler ortalyǵynyń uıytqy bolýymen ótken «Birgemiz Bilim» jobasyna belsendi túrde qatysyp, bilimin jetildirgen aýyl mektepterindegi 8 synypta oqıytyn 8 oqýshy smartfonǵa ıe boldy. Sondaı-aq, ózge oqýshylarǵa rúkzak pen qulaqqaptar syıǵa tartylǵan.
Budan basqa, «Birgemiz Bilim» jobasynyń joǵary deńgeıde uıymdastyrylý isine atsalysqan 10 erikti 50 000 teńgeniń sertıfıkatyna qol jetkizdi.
Sonymen qatar joba barysynda úzdik oqý baǵdarlamasy retinde tanylǵan úsh jobanyń ıesine 120 000 teńgeniń sertıfıkaty tapsyrylǵanyn aıta ketýimiz kerek.
Tarıh qoınaýyna enip bara jatqan 2020 jyldy Memleket basshysy Qasym-Jomart Toqaev Eriktiler jyly dep jarıalap, el aýmaǵynda bul baǵytta kóptegen jumystardyń atqarylýyna muryndyq boldy. Osy rette Almaty oblysy boıynsha volonterlik istiń máni men mazmunyn jalpy halyqqa túsindirýde Larısa Leonıdqyzy syndy qoǵam belsendileri aıanyp qalmady. Pandemıa kezinde aýyl jastarynyń bilim deńgeıin tómendetpeı, olardyń UBT-ny sátti tapsyryp, joǵary oqý oryndaryna túsýine barynsha septeskenin úlken azamattyq is dep atap aıtýǵa bolady. Osylaısha, Almaty oblysyndaǵy eriktilerdiń jumysyn jandandyrý isi joǵary deńgeıde uıymdastyrylyp, Larısa Leonıdqyzy bastaǵan jetisýlyq eriktiler halyqtyń alǵysyna ıe boldy dep nyq senimmen aıtýǵa bolady.
Prezıdent Eriktiler jylyn jarıalaǵanda elimizde bul baǵyttaǵy jumystardyń kún saıyn mańyzy artyp, Qazaqstannyń ósip-órkendeýine aıryqsha úles qosyp jatqanyn aıtqan bolatyn. Óz sózinde Qasym-Jomart Toqaev: «Men elimizdiń árbir óńirine erikti bolýǵa nıetti azamattardyń kóp ekenine senimdimin. Úkimet olarǵa qoldaý kórsetý úshin naqty sharalardy qabyldaıdy. Biz oǵan zor mán beremiz. Alaıda Eriktiler jyly kezekti naýqan emes. Osyny halyqqa túsindirýimiz kerek» dep jyl basynda oıyn ortaǵa salyp, respýblıka aýmaǵynda eriktilerdiń front-ofısteriniń ashylýyna muryndyq bolǵan edi. Sondyqtan Larısa Kotelnıkova elimizde qolǵa alynǵan eriktilerdiń isi jastardyń arasynda patrıottyq seziminiń artýyna jáne qoǵam aldynda azamattyq jaýapkershiliginiń artýyna barynsha yqpal etkenin alǵa tartty.
Almaty oblysyndaǵy «DOS.kz» eriktiler ortalyǵy 17 aýdan men úsh qalada eriktiler isin nasıhattap, erikti bolýǵa 1200 jasty tartqan. Qazirgi tańda ortalyqtyń arnaıy en-tańbasy men arnaıy qosymshasy bar. Osylaısha, Almaty oblysynda eriktilerdiń jumysyn jandandyrý isi ózge oblystarmen salystyrǵanda oq boıy ozyq keledi. «DOS.kz» eriktiler ortalyǵy múshe eriktiler ár topqa bólingen, olar qoǵamda paıda bolǵan máseleler boıynsha erikti túrde jumys istep, halyqqa paıdasyn tıgizýde. Aıtalyq, eriktilerdiń bir toby mektep oqýshylarynyń bilimin kóterýge mamandansa, kelesi toby qaıyrymdylyq is-sharalaryna belsene aralasýǵa beıimdelgen. Osylaısha, tanymal qoǵam belsendisi Larısa Kotelnıkovanyń arqasynda Almaty oblysynda eriktilerdiń áreket etý algorıtimi qalyptasty dep aıtýǵa bolady.
– Óz basym Prezıdentimiz Eriktiler jylyn dál ýaqytynda jarıalady dep oılaımyn. Pandemıa kezinde indettiń betin qaıtarýǵa, qazaq qoǵamyn ortaq iske jumyldyrýǵa Eriktiler jyly aıtarlyqtaı jumys atqardy desem bolady. Aldaǵy ýaqytta árbir adamnyń óz erkimen qaıyrymdylyq jasaý isi elimizde ómir saltyna, daǵdyǵa aınalýy kerek dep esepteımin. Qaıyrymdylyq memleketimizdi nyǵaıtyp, árbir azamattyń qoǵam aldyndaǵy jaýapkershiligin arttyra túsedi. Aldaǵy ýaqytta eriktilerdiń is-áreketterin Táýelsiz Qazaqstannyń búgingi jáne bolashaq sıpaty retinde dáripteýimiz qajet. Eriktilerdiń boıyndaǵy qaırat, jiger ár azamatty yntalandyrýy tıis. Elimizdegi ár aýyl-aımaq osy mańyzdy jumystan tys qalmaıtynyna kózimiz jetti. Bul – eń aldymen órkenıetti eldiń jáne zor jaýapkershiliktiń belgisi, – dedi Larısa Leonıdqyzy. Mine, bul óz isine júrek qalaýymen berilgen adamnyń oı. Jalpy, Larısa Kotelnıkovanyń ómir jolyna zer salyp qaraǵan adam onyń qoǵam úshin jaralǵan jan ekenin birden baıqar edi. Elimiz táýelsizdigin alǵan toqsanynshy jyldardyń basynda qoǵamdyq uıymnyń jumysyn júrgizý eń qıyn is bolatyn. Ol kezde elimizdiń ekonomıkalyq jaǵdaıy da máz emes edi. Memlekettiń qoǵamdyq uıymdarǵa qarjylaı qoldaý kórsetýge eshqandaı múmkindigi bolmady. Halyqaralyq uıymdardyń granttaryna ıe bolý da arman-tuǵyn. Osyndaı qıyn kezeńde Larısa Kotelnıkova qoǵam ıgiligi úshin jumys istep, alǵa qoıǵan maqsattaryn júzege asyrýdan qaıtqan joq.
Búginde jetisýlyq qoǵam belsendisi «Nur Otan» partıasynyń «Baqytty otbasy» jobasyn Kóksý aýdanynda júzege asyrýǵa ómirlik tájirıbesin jumsap keledi. Qoǵam belsendisi bul isti qolǵa alǵanda Qazaqstan halqy Assambleıasy Almaty oblystyq fılıaly janyndaǵy Analar keńesinde uzaq jyldardan beri jumys istegen tájirıbesi kóp paıdasyn tıgizgenin aıta ketýimiz kerek. Larısa Kotelnıkova hanym Kóksý aýdanyndaǵy psıholog mamandardyń basyn qosyp, otbasylyq keńes berý ortalyǵyn uıymdastyrýda. Osylaısha, ol týǵan jerinde otbasy qundylyǵyn nasıhattap, jas otbasylardyń qatarǵa qosylyp ketýine kómek kórsetip keledi. Budan basqa aýdanda ata-analar komıtetiniń negizin qalap, jas urpaqtyń tárbıesine de basa mán berip otyrǵanyn aıta ketýimiz kerek.
Nurlan Jumahan
