Larisa Leonidovna qoǵamdyq jumystarmen eń alǵash Almaty oblysyna qarasty Kóksý aýdanynda qyzmet etip júrgende bastaǵan edi. 2013 jyly ol «Harýat» dep atalatyn balalar mádeni ortalyǵyn quryp, óskeleń urpaqty tárbieleý isine bel býyp, bilek sybana kirisken bolatyn.
Osy rette Larisa Kotelnikova Qazaqstan halqy Assambleiasynyń Almaty oblysy boiynsha filialanyń da jumysyna belsene aralasyp, kieli Jetisý jerindegi tatýlyq pen bereke-birliktiń damýyna bir kisidei eńbek sińirip keledi. Qoǵam belsendisi airandai uiǵan aýyz birligimiz tamyryn tereńge jibergen saiyn Qazaq eli máýeli báiterekke ainalyp, qandai burqasyn boran tursa da óziniń turaqtylyǵyn saqtap, qoǵamdaǵy syn-qaterlerge tótep beretinin jaqsy túsinedi. Sol sebepti ol elimizdiń qoǵamdyq-saiasi ómirinde Qazaqstan halqy Assambleiasynyń ornyn joǵary baǵalaidy. Bul jaiynda Larisa Kotelnikova:
Assambleianyń negizgi mindeti – etnosaralyq qatynastar salasynda memlekettik organdarmen jáne azamattyq qoǵam institýttarymen tiimdi ózara is-qimyldy qamtamasyz etý, qoǵamda etnosaralyq kelisimdi jáne toleranttylyqty odan ári nyǵaitý úshin qolaily jaǵdai jasaý, el birligin nyǵaitý, Qazaqstan qoǵamynyń negiz qalaýshy qundylyqtary boiynsha qoǵamdyq kelisimdi qoldaý jáne damytý.
Assambleia etnomádeni birlestikterdiń kúsh biriktirýin qamtamasyz etedi, etnomádeni ortalyqtardyń, Qazaqstan halqynyń ulttyq mádenietteri, tilderi men dástúrleriniń órkendeýin, saqtalýyn jáne damýyn qamtamasyz etedi, – dep ainalasyndaǵy aq júrek adamdarǵa Assambleianyń qoǵamdaǵy ornyn túsindirýden esh ýaqytta jalyqqan emes.
– Qazirgi tańda qoǵamnyń belsendiliginiń arqasynda elimiz damyp, Qazaqstanda ultaralyq kelisim kún ótken saiyn nyǵaiyp keledi. Memleket basshysy Qasym-Jomart Toqaev prezidenttik qyzmetke kirisken kúninen bastap, halyq únine qulaq asatyn memleket qurýǵa kúsh salatynyn aitty. Joǵaryǵa halyqtyń únin, qordalanǵan máselesin jetkizýde qoǵamdyq uiymdardyń alatyn oryny erekshe. Men ózimniń 20 jyldyq jumys tájiribem barysynda talai ret kóz jetkizdim. Sondyqtan Prezidentimizdiń ár salada qoǵamdyq baqylaý uiymdastyryp, el azamattaryn qoǵam men memleket aldynda jaýapkershiligin arttyrýǵa úndeýi óte oryndy dep esepteimin. Qazirgi tańda elimizde jergilikti jáne respýblikalyq biýdjettiń jumsalýyn baqylaityn qoǵamdyq uiymdar men qoǵamdyq keńester jumys istep jatyr. Osylaisha, elimizde kún ótken saiyn azamattyq qoǵam qanat jaiyp keledi dep nyq senimmen aita alamyn. Búginde elimizde qoǵamdyq baqylaýdy qamtamasyz etetin quqyqtyq-uiymdastyrýshylyq jumystary da damyp keledi. Pandemiia kezinde buǵan kózimiz anyq jetti. Indetti eńserý kezinde qaiyrymdylyq kómekterdiń halyqtyń álsiz toptaryna ádil taratylýyna jáne emhanalarǵa taratylǵan dári-dármekterdiń durys bólinýine qoǵamdyq baqylaý durys júrgizildi dep esepteimin, – dep qoǵam belsendisi oiyn ortaǵa salǵan bolatyn.
Qarasha aiynyń sońynda atqarylǵan jumystar saralanyp, jobaǵa belsene qatysqan oqýshylar men eriktiler marapattalyp, baǵaly syilyqtarǵa ie boldy. Aitalyq, «DOS.kz» eriktiler ortalyǵynyń uiytqy bolýymen ótken «Birgemiz Bilim» jobasyna belsendi túrde qatysyp, bilimin jetildirgen aýyl mektepterindegi 8 synypta oqiytyn 8 oqýshy smartfonǵa ie boldy. Sondai-aq, ózge oqýshylarǵa riýkzak pen qulaqqaptar syiǵa tartylǵan.
Budan basqa, «Birgemiz Bilim» jobasynyń joǵary deńgeide uiymdastyrylý isine atsalysqan 10 erikti 50 000 teńgeniń sertifikatyna qol jetkizdi.
Sonymen qatar joba barysynda úzdik oqý baǵdarlamasy retinde tanylǵan úsh jobanyń iesine 120 000 teńgeniń sertifikaty tapsyrylǵanyn aita ketýimiz kerek.
Tarih qoinaýyna enip bara jatqan 2020 jyldy Memleket basshysy Qasym-Jomart Toqaev Eriktiler jyly dep jariialap, el aýmaǵynda bul baǵytta kóptegen jumystardyń atqarylýyna muryndyq boldy. Osy rette Almaty oblysy boiynsha volonterlik istiń máni men mazmunyn jalpy halyqqa túsindirýde Larisa Leonidqyzy syndy qoǵam belsendileri aianyp qalmady. Pandemiia kezinde aýyl jastarynyń bilim deńgeiin tómendetpei, olardyń UBT-ny sátti tapsyryp, joǵary oqý oryndaryna túsýine barynsha septeskenin úlken azamattyq is dep atap aitýǵa bolady. Osylaisha, Almaty oblysyndaǵy eriktilerdiń jumysyn jandandyrý isi joǵary deńgeide uiymdastyrylyp, Larisa Leonidqyzy bastaǵan jetisýlyq eriktiler halyqtyń alǵysyna ie boldy dep nyq senimmen aitýǵa bolady.
Prezident Eriktiler jylyn jariialaǵanda elimizde bul baǵyttaǵy jumystardyń kún saiyn mańyzy artyp, Qazaqstannyń ósip-órkendeýine airyqsha úles qosyp jatqanyn aitqan bolatyn. Óz sózinde Qasym-Jomart Toqaev: «Men elimizdiń árbir óńirine erikti bolýǵa nietti azamattardyń kóp ekenine senimdimin. Úkimet olarǵa qoldaý kórsetý úshin naqty sharalardy qabyldaidy. Biz oǵan zor mán beremiz. Alaida Eriktiler jyly kezekti naýqan emes. Osyny halyqqa túsindirýimiz kerek» dep jyl basynda oiyn ortaǵa salyp, respýblika aýmaǵynda eriktilerdiń front-ofisteriniń ashylýyna muryndyq bolǵan edi. Sondyqtan Larisa Kotelnikova elimizde qolǵa alynǵan eriktilerdiń isi jastardyń arasynda patriottyq seziminiń artýyna jáne qoǵam aldynda azamattyq jaýapkershiliginiń artýyna barynsha yqpal etkenin alǵa tartty.
Almaty oblysyndaǵy «DOS.kz» eriktiler ortalyǵy 17 aýdan men úsh qalada eriktiler isin nasihattap, erikti bolýǵa 1200 jasty tartqan. Qazirgi tańda ortalyqtyń arnaiy en-tańbasy men arnaiy qosymshasy bar. Osylaisha, Almaty oblysynda eriktilerdiń jumysyn jandandyrý isi ózge oblystarmen salystyrǵanda oq boiy ozyq keledi. «DOS.kz» eriktiler ortalyǵy múshe eriktiler ár topqa bólingen, olar qoǵamda paida bolǵan máseleler boiynsha erikti túrde jumys istep, halyqqa paidasyn tigizýde. Aitalyq, eriktilerdiń bir toby mektep oqýshylarynyń bilimin kóterýge mamandansa, kelesi toby qaiyrymdylyq is-sharalaryna belsene aralasýǵa beiimdelgen. Osylaisha, tanymal qoǵam belsendisi Larisa Kotelnikovanyń arqasynda Almaty oblysynda eriktilerdiń áreket etý algoritimi qalyptasty dep aitýǵa bolady.
Búginde jetisýlyq qoǵam belsendisi «Nur Otan» partiiasynyń «Baqytty otbasy» jobasyn Kóksý aýdanynda júzege asyrýǵa ómirlik tájiribesin jumsap keledi. Qoǵam belsendisi bul isti qolǵa alǵanda Qazaqstan halqy Assambleiasy Almaty oblystyq filialy janyndaǵy Analar keńesinde uzaq jyldardan beri jumys istegen tájiribesi kóp paidasyn tigizgenin aita ketýimiz kerek. Larisa Kotelnikova hanym Kóksý aýdanyndaǵy psiholog mamandardyń basyn qosyp, otbasylyq keńes berý ortalyǵyn uiymdastyrýda. Osylaisha, ol týǵan jerinde otbasy qundylyǵyn nasihattap, jas otbasylardyń qatarǵa qosylyp ketýine kómek kórsetip keledi. Budan basqa aýdanda ata-analar komitetiniń negizin qalap, jas urpaqtyń tárbiesine de basa mán berip otyrǵanyn aita ketýimiz kerek.
Nurlan Jumahan
