Amanqosta kópshilik siiaqty Angliiadaǵy jumys týraly tik-tok jelisinen bilgen jáne ózge qazaqstandyqtar siiaqty ol da deldaldarǵa aqsha berip, biraz ábigerge túsken.
Dalanews.kz Angliia fermasyndaǵy jumys jaily Iassaýiden, sondai-aq, 2018 jyldan beri TMD turǵyndaryna Eýropadan jumys taýyp berýmen ainalysatyn AGRI-HR kompaniiasynyń ókilinen málimet surady. Sebebi sońǵy kezderi arnamyzǵa Angliiadaǵy jumys týraly material jariialaýymyzdy suraǵan oqyrman sany kúrt ósip ketti.
Saǵatyna 6 myń teńgeden alamyz
Iassaýi Angliiaǵa AGRI-HR saity arqyly dosymen birge kelgen.
«Aldymen saitqa tirkeldik, sodan soń eki aidan keiin oflain suhbattasýǵa baryp, taǵy kúttik. Osy aralyqta kompaniiada sot isi júrip, biz rezervke túsip qaldyq. Segiz jarym aidan keiin Ware-Farms degen fermaǵa keldik, ornalasqan meken-jaiy Frantsiiaǵa jaqyn jerdegi Ash qalasynda. Dosym ekeýmizdiń jolymyz bolyp, osyndaǵy fermalardyń eń jaqsysyna tústik.
Sebebi táýligine 8 caǵattan bes kún ǵana jumys istep, eki kún demalamyz. Juma kúni qysqa jumys kúni sanalatyndyqtan 7 saǵat qana isteimiz. Ár jumys saǵatyna 6 myń teńgeden alamyz.
Alǵashynda qara órik terdik, keiinnen almurt, qazirgi tańda alma jinaýmen ainalysamyz», - dedi ol.
Jumysqa turý úshin qansha qarajat qajet?
Iassaýiden kompaniia sottylyqtyń bolmaýy, densaýlyqqa qatysty anyqtamalardy suraǵan.
«Qujat toltyrý barysynda tsifrlar, aty-jón jazýdan eshqandai qatelik bolmaǵany jón. Jumysqa kelýińiz úshin shamamen 600-800 myń teńge aralyǵynda qarajatyńyz bolýy tiis. Onyń 155 myńy vizaǵa, biletińizge ketedi. Ushý biletin viza bergenine orai alasyz. Keri qaitý biletin úsh ai buryn alsańyz arzandaý shyǵady.
Alǵashqy ýaqytta taksiińiz, tamaǵyńyzǵa, júrip-turǵanyńyzǵa 60 myń teńgedei qajet. Kelgennen soń ferma ieleri ózderi kútip alyp, tirkeýden ótkizedi. Keiinnen jumys barysyn tanystyrady.
Fermamyz kishkentai, qazir on shaqty adam barmyz, sonyń jeteýi qazaq. Sýpervaizerlerimiz bar.
Ailyqty apta saiyn beredi, karavanǵa aiyna 150-160 myń teńge tóleimiz. Karavan degenimiz dóńgelegi bar býtka, azyq-túlik arzan. Eki adam apta saiyn tamaǵymyzǵa 15-20 myń teńge jumsaimyz.
Ailyq aptasyna 200-400 myńnyń arasynda shyǵady, oǵan qosa bonýstary bar.
Keide aýa-raiy jańbyrly bolyp, kún salqyn kezderi jumysqa shyqpai qalatyn kúnder bolady. Ónimdi kóp jinaǵan kúnderi 90 myń teńgege deiin alǵan kezderimiz bar», - dedi keiipkerimiz.
Deldaldarǵa aldanyp qalmańyz, ótinishti ózińiz de bere alasyz
Jastarǵa Angliia halqynyń qonaqjailyǵy, adamdarynyń ishki mádenietiniń joǵarylyǵy unaǵandaryn jasyrmady.
«Munda emin-erkin júrmiz, zańda qatty qatal emes, bastyqtary da jaqsy. Bizge mensinbeýshilik tanytyp, jaqtyrmaǵandaryn baiqaǵan emespin. Tabiǵaty ádemi, kók kóp, aýasy tap-taza. Bes saǵat uiyqtasaq da sergek, sharshamai turamyz. Til jaǵynan qiyndyq joq, sýpervaizerlerdiń basym kópshiligi bolgarlar bolǵandyqtan oryssha sóilese beremiz. Aǵylshynyńyz jaqsy bolsa bonýstar bar, sýpervaizer bolyp júrýge de bolady.
Munda kelgisi keletin otandastaryma aitarym, tek resmi saittar arqyly anketa toltyryp, kelisimshart jasańyzdar. Ortadaǵy jeke kásipker, deldal degenderge senbeńizder.
Olar dál sol saittarǵa sizdiń atyńyzdan ótinish beredi, ony ózińiz de tegin jasasańyz bolady. Bizde saitta tirkeýge 90 myń teńge berip urynǵanbyz. Million tabasyzdar dep deldaldyq qyzmetterine 700 myń teńge alyp jatqandar kóp...», - dedi ol.
Tizerlep júrip oramjapyraq teresiz...
Dalanews.kz Iassaýiden barǵan jumysshylar fermalarda qandai qiyndyqtarǵa tap bolatynyn da surady.
«Munda óte qiyn fermalar da bar, eki kún istep qashyp ketkenderdi estip jatyrmyz. Tańǵy tórt jarymnan bastap táýligine 12 saǵattan jumys istetedi.
Osyndai aýyr fermalarǵa túsip qalǵan qyz-jigitter shydamai elge qaityp ketedi. Sýpervaizerler ózderiniń bonýstaryn alý úshin normadan tys jumysqa salyp jatady. Tizerlep júrip oramjapyraq teresiz, traktor júrip otyrady, siz olardy kesip úlgerý kereksiz. Normany oryndamasańyz eki úzilisten keiin sizdi úiińizge qaitaryp jiberip, ertesi jumysqa shyǵarmai qoiady. Jańbyrda, balshyq pen laida da jumys istetedi. Oramjapyraq, qulpynai jinaityndar aýa-raiyna qaramaidy.
Bir jaqsysy, bizde almany jańbyrly kúnderi jinatpaidy. Kei fermalarda tańǵy beste jumys bastalatyn bolsa, tańǵy tórt jarymda turyp avtobýsqa daiyndalady. Keshki beste kelip tamaq jasaidy da, uiqyǵa jatady. Kún saiyn osy rejim qaitalana beredi. «Aqsha tabý kerek, eldegi ipotekalardy jabý kerek» dep ózin syndyryp alyp jatqandar da joq emes.
Bir ferma unamasa, sizdi jibergen kompaniia ókilderine jaǵdaiyńyzdy túsindirip basqasyna aýysýǵa bolady. Jalpy mundai qiyndyqtan qoryqpai kele bergen jón.
Bári tájiribe. Onyń ústine qazir ózbekstandyqtarmen, reseiliktermen bul jaqtaǵylar jumys istemeidi. Sondyqtan jaqsy aqsha tabýǵa múmkindik qashanda bar»,-dep aiaqtady ol áńgimesin.
Jumysshy fermaǵa ornalasqansha tegin qyzmet kórsetemiz
Memlekettik baǵdarlama aiasynda jumys isteitin Agri-hr kompaniiasynyń menedjeri (telefon nómiri tómende) Dalanews-tiń suraqtaryna qysqa jáne naqty jaýap berdi .
Saitqa kez kelgen kámelet jasyna tolǵan adam ótinish berip, baǵdarlama qatysýshysy bola alady. Sondai-aq, kompaniia qyzmetine aqy alatyn deldaldar men jeke menshik firma ókili retinde qyzmet usynatyndarǵa senbeýge shaqyrdy.
– Birinshi qadam, aqparatpen tanysyp, jumysqa onlain ótinimdi toltyrýyńyz kerek. Ekinshi qadam, jumysqa qabyldaý menedjeri telefon arqyly suhbat júrgizedi jáne suraqtarǵa jaýap beredi.
Úshinshi qadam, jumysqa ornalasý úshin sottylyqtyń joqtyǵy týraly anyqtama, densaýlyq jaǵdaiy týraly anyqtama, foto jáne sheteldik pasport qajet.
Tórtinshi kezeńde, biz ótinim berýshini suhbatqa shaqyramyz.
Suhbatta qujattardy, basqa elge barýǵa jalpy daiyndyqty tekseremiz, saýsaq eptiligine test ótkizemiz.
Besinshi kezeń, jumys vizasyn alýǵa arnalǵan nysandy toltyrýǵa kómektesemiz. Aita ketetini, Ulybritaniia elshiliginde suhbattasýdan óz betińizshe ótesiz. Sońǵy kezeńde biletterdi satyp alýǵa kómektesemiz jáne sapar týraly tolyq aqparat beremiz, fermaǵa ornalasýyńyzǵa deiingi kezeńdi baqylap otyramyz.
Jumysqa ornalasýdyń jalpy shyǵyny
– Jumys vizasy (Tier 5) - 246 fýnt sterling (147 myń teńge). Biz ótinish berý protsesinde kómektesemiz jáne vizalyq agenttikke aqparat berýge qoldaý kórsetemiz.
Viza alý protsesin aiaqtaý úshin sizge viza agenttigine barý kerek. Bir baǵytqa ushý shamamen 270 000 teńge.
Áýejaidan fermaǵa jol júrý 40-50 fýnt (27 000 teńge). Siz bizden sapardy josparlaý úshin egjei-tegjeili marshrýt kartasyn alasyz.
Biz fermaǵa kelgenge deiin jumysshymen únemi bailanysta bolamyz. Alǵashqy 2 aptadaǵy jatyn orny, tamaqqa 200 fýnt sterling (116000 teńge) aqshańyz bolýy tiis. Biraq jumysshylardyń ailyqtaryn bir aptadan keiin tóleidi.
Dalanews anyqtamasy - Angliiada jumysqa ornalastyrýǵa memlekettik baǵdarlama aiasynda kómektesetin tegin saittar: Agropraktika, Osradek-Hr, Agri-HR (kompaniia menedjeriniń telefony +79995624458), Pro-force.
Aijan QALIEVA
