– Jazıra, eń áýeli jeńisińmen quttyqtaımyz. Mundaı ataqqa qol jetkizgenińe búkil qazaq eli qýanyshty. Jalpy, kóńil kúıiń qalaı?
– Kóńil kúıim óte jaqsy, bári oıdaǵydaı. Ózimniń dittegen maqsatyma jettim. Endigi armanym, aldaǵy ýaqytta Tokıo Olımpıadasynda jeńiske jetý. Bul Olımpıada men úshin erekshe ótti. Qoldaý kórsetken barsha otandastaryma alǵysym sheksiz. Erekshe sezimge bólendim. Jeńister eshqashan úzilmese eken deımin. Áleýmettik jelidegi jeke paraqshamdy ashqanda, meni quttyqtaǵan otandastarymnyń jazbalaryn kórip qýanyp qaldym.
– Básekege keleıik. Osy Olımpıadaǵy alǵashqy kezeń sen úshin qanshalyqty qıyn boldy?
– Daıyndyq, ziltemirdi kóterýdegi áreketim oıdaǵydaı boldy deýge bolady.
– Salmaqqa tapsyrys berý barysynda 111 kelige ózgerttińizder, muny bapkerińiz sheshti me?
– Bapkerim Alekseı Nı, ekeýmiz ózara kelisip sheshtik. Menen «qaı salmaqqa daıynsyń», – dep surady. Al men tańdaýdy sol kisiniń enshisine berdim. Jalpy, 111 keli salmaqty kúndelikti jattyǵýda kóterip júrmin. Men eshqashan usynylǵan salmaqtan bas tartqan emespin. Eń bastysy, ózime sendim. Ekinshi múmkindikte 115 kelige berdik. Azdap qımyl-qozǵalysta aýytqyǵanym bolmasa, bári oıdaǵydaı. Odan keıin 117 keli salmaqty eńserdim.
– Biz seni 120 kelini tańdaıdy ma dep kútken edik? Ziltemir baǵynbaǵan boldy ǵoı?
– Menen «qansha salmaqqa deıin kótere alasyń?» dep suraǵanda 118 dep aıttym. Sál jyldamdyq jetpeı qaldy. Bir jerde qatelik ketken bolatyn. Endi sol qateliktiń qaıtalanbaýyn qadaǵalaımyz.
– Odan keıin ziltemirdi kóterip turyp, jerge túsirip aldyń?
– Sál jyldamdyǵym jetispeı qaldy. Qysqasy, baıaýlaý qımyldap qaldym. Al odan keıin ózderińiz kýásizder, 140 kelini qatty jyldamdyqpen kóterdim.
– Ekinshi ret shyqqanyńda ózińe senimdi bolǵandaısyń…
– Ekinshi ret shyqqanymda esh qorqynysh bolmady. Qanshama jasaǵan daıyndyqtarymdy esime túsirip, ózimdi jıyp aldym. Bar kúshimdi jınadym. Eń bastysy, meniń ózime sengenim, jeńiske jeteledi dep oılaımyn.
– 140 keli salmaqty kóterý barlyǵyn sheshti. Osy mezette, kótere almaı qalsam, ne isteımin degen oı keldi me?
– Ol jerde men bar kúshimdi salyp kótere bildim.
– Negizi, bastapqy maqsatyń altyn alý ma edi?
– Iá.
– Daıyndyq kezinde qanshany kóterip júrsiń?
– 120, 153 kóterip júrmin.
– Jattyǵýlarda kótergen salmaqty jarysta kóterý qıyn bolady ma eken?
– Joq, kóterýge bolady. Biraq biz jarys bolatyn ýaqyttyń 10,15 kún buryn aýyr salmaq kóterýdi toqtatamyz. Jarysqa bar kúshimdi salamyz. Qarsylastaryńnyń da qandaı salmaqty tańdaǵanyna mán beresiń. Uzaq jol júrgennen de, salmaqta azdap ózgerister bolady. Ózimdegi kishkene jaraqatym bolǵandyqtan, sál tómendeý bolyp qaldy. Meniń, negizinen belim aýyrady. Oǵan qaramaı daıyndyqty toqtatqan emespin.
– Bul jolǵy jeńisińniń júldesin qaıda jumsaısyń? .
– Endi bul jolǵy josparym erekshe. Sińilimdi emdetýge jiberem, al qalǵanyn ata-anam sheshedi.
– Turmysqa shyǵý oıyńda bar ma?
– Meniń bul Olımpıadadan altyn alam degen josparym bolǵan edi. Biraq ol buıyrmaǵandyqtan, qazir turmysqa shyqpaımyn (kúldi). Altyn medal alǵasyn turmys quramyn! Kelesi jyldan bastap, salmaq ózgeredi. Onyń qandaı bolyp ózgeretindigin, aldaǵy ýaqytta belgili bolady. Bapkerlermen aqyldasamyz.
– Jarystaǵy mejeńdi oryndadyń. Endi demalysqa shyǵasyń ba?
– Iá. Men bul ýaqytta emdelemin dep otyrmyn.
Suhbattasqan Álıhan Nurahmetuly
Derekkózi: "Jas Qazaq" gazeti
