Almatydaǵy №224 mektepte til máselesine qatysty daý shyqty, dep habarlaıdy Dalanews.kz.

Daýdyń basy

Bul másele týraly áleýmettik jelide jýrnalıs Dıas Nuraqyn jazdy. Onyń sózinshe, ata-analar balalary oqıtyn mekteptiń qazaq tilinde bolýyn surap otyr.

"Almatydaǵy №224 mekteptiń aralas tilde bilim berýin ózimizdiń qazaqtar talap etip otyr eken ǵoı. Al búgin taza qazaqtar jınalyp tek qazaq mektebi bolsyn dep jatyr", - dedi ol.

Bul jaıt áleýmettik jelide qyzý talqylanyp, qoǵam narazylyǵyn týdyrdy.

Bıyl qyrkúıekte 2500 oqýshy ornyna arnalǵan №224 jáne №221 mektepter "Keleshek mektepteri" ulttyq jobasy aıasynda paıdalanýǵa berilgen. "Jaıly mektep" dep bastaý alǵan joba qazir Oqý-aǵartý mınıstriniń usynysymen "Keleshek mektepteri" dep atalyp keledi.

Al bul mektepter ashylǵan kezde mınıstrlik "Qazaqstandaǵy eń úlken eki mektep Almatyda salyndy", - dep súıinshi suraǵan eken. Dese de artynan osyndaı daý shyǵyp otyr.

Mınıstrliktiń ustanymy

Oqý-aǵartý mınıstrligi jańa mekteptegi daýǵa qatysty Dalanews.kz saýalyna bylaı dep jaýap qatty:

"Oqytý tili jergilikti atqarýshy organdardyń sheshimimen belgilenedi. Oǵan sol jerdegi mektep jasyndaǵy balalar sany jáne ata-analardyń suranysy negiz bolady".

Al Almaty qalasy Bilim basqarmasy saýalymyzǵa ázirge jaýap bermedi.

Aıta keteıik, bul Almatydaǵy birinshi jaǵdaı emes. Bıyl qyrkúıekte de dál osyndaı daý shyǵyp, belsendiler talabynan keıin Almatydaǵy №215 mektep qazaq tilinde oqytatyn boldy.