Almaty ákimi Darhan Satybaldy áleýmettik nysandardyń qurylysyna, jol infraqurylymy men qoǵamdyq keńistikterdi damytýǵa qatysyp júrgen merdiger uiymdardyń quryltaishylarymen keńes ótkizdi, dep habarlaidy Dalanews.kz.
Kezdesý barysynda qala boiynsha júzege asyp jatqan jobalardyń oryndalý barysyna aralyq qorytyndy jasaldy. Búginde Almatyda 147 joba iske asyrylyp jatyr, sonyń ishinde 26 nysanda merzim saqtalmaǵan, sapaǵa qatysty talaptar buzylǵan.
Almatynyń Qala qurylysyn baqylaý basqarmasynyń basshysy Oljas Tólebaevtyń aitýynsha, monitoring nátijesinde kelisimshart merzimin únemi buzyp, qurylys normalaryn saqtamaityn toǵyz merdiger anyqtalǵan. Olardyń jumysynda jobadan aýytqý, uiymdastyrý deńgeiiniń tómendigi jáne qujat júrgizýdegi salǵyrttyq jii baiqalady.
Qala ákimi Darhan Satybaldy mundai nemqurailylyq qala turǵyndarynyń narazylyǵyn týdyryp otyrǵanyn jetkizdi. Kópshilik mektep pen balabaqsha qurylysynyń sozbalańǵa salynǵanyna, saiabaqtar men jaǵalaýlardy abattandyrý jumystarynyń keshigýine, sondai-aq jol men trotýardaǵy qazylǵan jerlerdiń ýaqytynda qalpyna keltirilmeýine shaǵymdanǵan.
"Keibir kompaniialar bir nysandy bitirmei jatyp, jańasyn qolǵa alatyn keleńsiz ádet qalyptastyrǵan. Mundai tájiribege múlde jol berýge bolmaidy. Óitkeni másele adamdardyń qaýipsizdigi men jaily ómiri týraly bolyp otyr. Eger merdiger mindetin tiisti deńgeide oryndamasa, ol qala jobalarynda jumys istemeýi kerek", – dedi Darhan Satybaldy.
Keńes qorytyndysy boiynsha Almaty ákimi Qala qurylysyn baqylaý basqarmasyna mundai nysandy ár apta saiyn qadaǵalap otyrýdy, jaýapsyz merdigerlerdiń litsenziiasynan aiyrýdy jáne qajet bolsa materialdardy quqyq qorǵaý organdaryna jiberýdi tapsyrdy.
