Jyl basynan beri Qazaqstanda 139 bala óz-ózine qol jumsaǵan. Al jalpy osy jyly elimizde kámeletke tolmaǵandar arasynda 432 sýitsid jaǵdaiy tirkeldi. Bul týraly ishki ister ministriniń orynbasary Sanjar Ádilov málimdedi, dep habarlaidy Dalanews.kz.
Onyń aitýynsha, óz-ózine qol jumsaǵan balalardyń basym bóligi turmysy jaqsy, tolyq otbasynda ósken.
"Biz jan-jaqty taldaý júrgizdik. Eń aldymen balalardyń qandai otbasynda tárbielengenin, ómir súrý jaǵdailaryn qarastyrdyq. Nátijesinde óz-ózine qol jumsaǵan kámeletke tolmaǵandardyń 62 paiyzy tolyq jáne materialdyq jaǵdaiy jaqsy otbasynda turǵany anyqtaldy", – dedi Sanjar Ádilov.
Balalardyń ómirine núkte qoiýyna túrli sebepter áser etken: mahabbat, úidegi janjal, ata-ananyń tyiymdary, mekteptegi qiyndyqtar.
"Biz olardyń jazyp qaldyrǵan hattaryn da zertteimiz. Bul jeke másele ekenin túsinemiz, biraq ol hattar ólimnen keiingi sot-psihiatriialyq saraptama taǵaiyndaýda jáne árekettiń sebebin anyqtaýda qoldanylady. Negizgi sebep – otbasyndaǵy túsinispeýshilik, ol kóbinese sýitsidke itermeleitin basty faktor", – dedi ol.
Ishki ister ministriniń orynbasarynyń aitýynsha, profilaktikalyq sharalarǵa qaramastan, balalar arasyndaǵy sýitsid deńgeii áli de joǵary. Osyǵan bailanysty IIM oqý-aǵartý jáne densaýlyq saqtaý ministrlikterine bul máselege basymdyq berýdi usynǵan.
