Jańa Ekologiialyq kodeks eldegi parniktik gazdar shyǵaryndylaryn azaitady
Aita keteiik, búgin Prezident Qasym-Jomart Toqaev Qazaqstannyń jańa Ekologiialyq kodeksine qol qoiǵan bolatyn.
Sáýlet Sákenovtyń sózinshe, Ekologiialyq kodekste basqa mańyzdy bastamalarmen qatar parniktik gazdar shyǵaryndylaryn retteý júiesi de eskerilgen.
«Parij kelisimi men BUU-nyń Klimattyń ózgerýi jónindegi negizdemelik konventsiiasyna sáikes Qazaqstannyń parniktik gazdar shyǵaryndylaryn azaitý boiynsha mindettemeleri bar. Sonymen qatar, Memleket basshysy Qasym-Jomart Toqaev BUU-nyń Klimattyq sammitinde sóilegen sózinde Qazaqstannyń 2060 jylǵa qarai kómirtekti beitaraptyq deńgeiine jetetinin aitty. Bul eldegi parniktik gazdardyń barlyq shyǵaryndylary olardy qysqartýǵa baǵyttalǵan jobalarmen ótelýi tiis degendi bildiredi. Buǵan aǵash otyrǵyzý, jańartylatyn energiia kózderin damytý, energiia únemdeý jónindegi jobalar jáne taǵy basqa sharalar jatady. Jańa Ekokodekstiń qabyldanýymen mundai ofsettik jobalar kóbeiedi dep úmittenemin», - deidi Sáýlet Sákenov.
Budan bólek, Ekologiialyq kodekske klimattyń ózgerýine beiimdelý boiynsha normalar qosylǵan.
«Sebebi klimattyń ózgerýin biz anyq baiqap jatyrmyz. Daýyldy, ekstremaldy-meteorologiialyq qubylystar kóbeidi. Munyń bári adamdardyń densaýlyǵy men ómirine áser etedi. Sondyqtan bul sharalar óte mańyzdy. Beiimdelý júiesi arqyly eldiń klimattyń ózgerýine daiyndyǵyn baǵalap, ári qarai tiisti sharalar qabyldaýǵa bolady. Onyń ishine qýańshylyqty, sý resýrstarynyń azaiýyn, tótenshe jaǵdailardy eskertý sharalary kiredi», - dedi sarapshy.
S.Sákenovtyń sózinshe, ǵalymdar men úkimetaralyq sarapshylar toby parnikti gazdar shyǵaryndylarynyń qorshaǵan orta men adamdar densaýlyǵyna ziianyn tigizetinin dáleldegen. Al onyń úlesi qysqarsa aýadaǵy lastaýshy zattar da avtomatty túrde azaiyp, ahýaldyń jaqsarǵany birden baiqalady.
Aita keteiik, Ekologiia ministrligi Ekokodeks jobasyn daiyndaý kezinde ony jurtshylyqpen keńinen talqylaǵan bolatyn. Zań jobasynyń basty jańalyqtarynyń biri - «lastaýshy tóleidi jáne túzetedi» qaǵidaty. Bul lastanýdyń aldyn alý jáne baqylaý jónindegi sharalardy, sondai-aq qorshaǵan ortaǵa keltirilgen zalaldy qalpyna keltirý úshin jaýapkershilikti meńzeidi. Kodekste eń ozyq qoljetimdi tehnologiialardy engizý shartymen birinshi sanattaǵy obektiler úshin keshendi ekologiialyq ruqsattarǵa kóshý, sondai-aq jańadan iske qosylatyn kásiporyndar úshin keshendi ekologiialyq ruqsatty mindetti túrde alý kózdelgen. «Birinshi sanattaǵy» iri kásiporyndarǵa qatysty qorshaǵan ortaǵa áserdi baǵalaýdan ótý týraly talap ta engizildi. Budan basqa, jańa Ekokodekske sáikes jergilikti atqarýshy organdar ekologiialyq tólemder esebinen túsetin qarjynyń 100%-yn tabiǵatty qorǵaý is-sharalaryna baǵyttaýǵa mindetti. Qujatta halyqaralyq talaptarǵa sáikes qaldyqtardy azaitý jáne óńdeý, olardy jikteý týraly normalar da jazylǵan. Zańsyz qaldyq alańdaryn joiý úshin qoqys shyǵaratyn kólikterge GPS-datchikterdi mindetti túrde ornatý da eskerilgen.
