QR Halyq artisi Tuńǵyshbai Jamanqulov Mádeniet jáne sport ministri Arystanbek Muhamediulyn qalai balaǵattap tastaǵanyn aityp berdi.
«TalkLIKE» jobasynda qonaqta bolǵan akter óziniń ne úshin sottalǵanyn, Arystanbekpen ne úshin arazdasqany týraly ashyp aitty.
T.Jamanqulovtyń aitýynsha,
ministrmen aradaǵy daý sál erterekte bastalǵan eken.
Bul týraly akter sotqa deiin de aitqany este. Iaǵni, bar másele stýdentterge bólingen granttan bastalǵan. Ol kezde Arystanbek Muhamediuly Óner akademiiasynyń rektory edi.
«Bar bolǵany 12 grant. 11 adamnyń tizimin berdi "osylardy ótkiz" dep. Men qarsy shyǵyp, adamgershilikpen adam qabyldaiyq degenmin. Sóitip, ony tyńdamadym da talapkerlerdiń ónerine qarap 2-3-eýin ótkizip jiberdim. Sosyn maǵan tún ishinde telefon soǵyp, aiqaiǵa basty. Men de ashýǵa berilip, oryssha úsh áripke aityp jiberdim ony. Endi er adamnyń bárinde bolady ǵoi mundai jaǵdai. Keiin biraq artyq ketkenimdi túsinip, ertesine baryp keshirim suradym», – deidi Tuńǵyshbai Jamanqulov.
Munan keiin osy oqý ornyn bitirgen Eńlik Sydyqova esimdi boijetkenniń málimdemesi jaryq kórgen bolatyn.
Ol Arystanbektiń ózine azǵyndyq kórsetkenin aityp, videoúndeý arqyly shaǵym jasaǵan edi. Artynsha Jamanqulov Eńliktiń sózin sóilep, ministrdi ashyq aiyptady.
«Osy jaǵdaidan keiin ol meniń ár qadamymdy ańdyp, izime túsip aldy», – deidi ol.
«Ministr meniń basymdaǵy jaǵdaidy óz qolymenen, óziniń laýazymyn paidalanyp, Elbasynyń yqylasyn paidalanyp, osy nársege naqaqtan naqaq baryp, ósh aldy.
Meniń úndeýim Elbasyna jetken joq. Jetse de, Arystan myrzanyń úndeýimen jetti dep oilaimyn.
Ol basqasha jaǵdaimen jetkizip otyrdy», – dedi akter.
Ol sondai-aq, ózine taǵylǵan aiyptardyń bári jala ekenin aityp otyr. Ministr Arystanbek Muhamediuly sýdiaǵa yqpal etti deidi ol.
«Maǵan oqylǵan sot úkiminde ataq-dańqty alyp tastaý týraly birde-bir sóz joq. Úkimettiń aqshasyn shashyp jiberdi degendei naqaqtan naqaq taǵylǵan aiyp.
Men qarjyǵa aralasqan adam emespin.
Men qoryqpaimyn, Mádeniet ministriniń ózi sottarǵa, tergeýshilerge jeke tapsyrma berip otyrǵanynan habardarmyz. Men eshqandai aqsha jymqyrǵan joqpyn. Dáleldengen de joq. Bári bos sóz.
6 aidai sot boldy. Bári de naqaq jala oidan shyǵarylǵan. Jáne maǵan shyǵarylǵan úkimdi sýdia uialyńqyrap, jerge qarap otyryp, ishtei jylaǵan da bolar, tapsyrysty oryndaýmenen oqydy», – dep sózin jalǵady akter.
Eske salaiyq, 2016 jyly Tuńǵyshbai Jamanqulov filmniń túsirilimine bólingen 79 million teńgeni qaltasyna basty dep aiyptalyp, shartty jazaǵa kesilgen bolatyn.
Derekkóz: sn.kz
