Erlan Bilál ustalǵan sátte qoǵamda, sonyń ishinde mádenıet salasy ókilderiniń arasynda kereǵar pikirler týyndady. Máselen, onyń áriptesteri jappaı jınalyp, konferensıa ótkizip, Biláldi aqtaýdy surasa, áleýmettik jeli qoldanýshylary men birqatar jýrnalıs kerisinshe, para alǵan adam jazasyn alsyn dep málimdep jatty.
Tipti, Tuńǵyshbaı Jamanqulov pen Erlan Biláldiń isti bolýyn baılanystyrǵandar da az bolǵan joq. Este bolsa, byltyr kúzde QR Halyq artısi T.Jamanqulov kınoǵa bólingen qarajatty talan-tarajǵa saldy dep sottalǵan bolatyn.
Sol kezde onyń shákirti sanalatyn Erlan Bilál ustazyna qoldaý bildirmeı, sol úshin kópshiliktiń synyna da ushyraǵany áli este.
Kúni keshe Tuńǵyshbaı Jamanqulov «TalkLIKE» jobasynda qonaqta bolyp, jýrnalıs Aman Tasyǵanǵa suhbat bergen bolatyn. Áńgime barysynda ol Erlanǵa tek jany ashıtynyn aıtty.
«Erlan meniń shákirtim. Meniń basyma qara bult úırilgende ol qaıda bararyn bilmeı, áýre sarsańǵa túsken balam sıaqty meniń. Men jaǵyna shyǵaıyn dese, basshysynan qorqady.
Basshy jaǵyna shyǵyp keteıin dese, meni oılaıdy.
Sóıtip, qatty jaǵdaıǵa túskenin men jaqsy bilemin. Sondyqtan men oǵan meniń qasymnan tabylmadyń dep, sózimdi sóılemediń dep ókpe arta almaımyn. Óıtkeni zaman solaı, qyzmet solaı. Ol qyzmetinen aırylyp qalamyn dep oılady. Bul da bir pendeshiliktiń bir túri», — deıdi Halyq artısi.
Ol sondaı-aq, Biláldiń ustalǵany janyna batqanyn da jasyrmaı aıtty.
«Men Erlannyń ustalǵanyn óte aýyr qabyldadym. Facebook-ten kórgende kıno shyǵar dep te oıladym. Óıtkeni, ol ondaıǵa baratyn bala emes sıaqty edi. Bálkim, Jańa jyldyń aldynda ózine tizesi batyp júrgen adamdarǵa syı jasaımyn dep amalsyz osyndaı qadamǵa bardy ma eken dep te oılaımyn», — degen Jamanqulov mádenıet salasynda da «syılyq alǵandy» jaqsy kóretin shendilerdiń bar ekenin meńzedi.
Al, Erlan Biláldi qorǵaýǵa baǵyttalǵan baspasóz konferensıasyn ol naǵyz teatrlyq qoıylym dep esepteıdi.
«Áriptesterim Erlandy qorǵap baspasóz konferensıasyn ótkizgende meni shaqyrǵan joq. Óıtkeni, olar kezinde meniń basyma qara bult úıirýge sebep bolǵan adamdar. Sosyn men bul konferensıany ne úshin ótkizgenderin de túsinbedim.
«Para berme» degen bılbordtarda sýreti ilinip turǵan Asanáli aǵamyz para alǵanyn moıyndap turǵan adamdy qorǵaýy kúlkili ári uıat boldy.
Muny uıymdastyrǵan adamdy sottaý kerek degen de artyq sózder aıtyldy. Negizi bul konferensıaǵa kelgender «mundaı jaǵdaıdyń bolǵanyna ókinemiz» dep aıtýlary kerek edi. Qysqasy, bul jónsiz, josyqsyz konferensıa boldy. Ony kimniń uıymdastyryp otyrǵanyn da jaqsy bilemin. Bul pres-konferensıa meni qyspaqqa alǵan vedomstvonyń zorlyqpen jasatqan pres-konferensıasy dep aıta alamyn», — deıdi Tuńǵyshbaı Jamanqulov.
Ol sondaı-aq, Bilálge qoldaý kórsetkisi keletinin, alaıda oǵan zıanyn tıgizip alǵysy kelmeıtinin de aıtyp moıyndady.
«Erlan Bilálge basyna kún túskende habarlaspadym. Óıtkeni, birinshiden — ol meniń qońyraýlaryma jaýap bermeıdi. Ekinshiden — jaýap bergen kúnniń ózinde menimen sóıleskeni úshin oǵan úlken zıan kelýi múmkin. Óıtkeni, taǵy aıtam, Erlan meni qyspaqqa alǵan vedomstvo basshylarynyń súıiktisi.
Olar Erlannyń menimen sóıleskenin bilse oǵan zıan tıgizýi múmkin edi.
Sondyqtan habarlaspadym. Máselen, kezinde meniń sózimdi sóılep, meni qorǵamaq bolǵan jýrnalıs qyzdar jumystan shyǵyp, aýyr sózder estip, aıaqtaryna tusaý salynǵan bolatyn. Onyń aldynda is endi bastalǵanda Oralǵa baryp Batys Qazaqstan oblystyq teatrynda qoıylym qoıdym. Ustazym Hadısha Bókeevanyń 100 jyldyǵyna oraı sol kisiniń oınaǵan spektáklderiniń birin qoıyńyzdar dep nıet bildirdi.
Spektákl qoıyldy, artynsha uıymdastyrǵan oraldyq jigitterge bázbireýler telefon soǵyp, «ony nege shaqyrasyzdar, oǵan nege qoıǵyzasyzdar» dep meniń kózimshe urysty. Biraq, soǵan qaramastan, ol jigitter batyldyq jasap, aıaǵyna deıin oınap shyǵýymyzǵa kedergi keltirmedi», — dedi Halyq artısi.
DEREKKÓZ: sn.kz
