Sozaq aýdany turǵyndarymen kezdesýge «Atameken» sharýa qojalyǵyna arnaiy kelgen oblys ákimi diqandar men jergilikti kásipkerlermen kezdesip, suraqtary men usynystaryn tyńdady. Óńir basshysy sý únemdeý tehnologiiasyn engizý mańyzdy ekenin jetkizdi.
– Biz sharýalarǵa seminarlar ótkizip, tamshylatyp sýǵarý jáne jańbyrlatyp sýǵarý tásilderin engizip jatyrmyz. Sozaq aýdanynda da baqsha daqyldarynan ónimdilikti arttyrýǵa múmkindik mol. Jalpy Sozaq aýdanynyń áleýeti óte joǵary. Sonyń ishinde aýyl sharýashylyǵy salasynda mol tabysqa jetýge bolady, – degen Ómirzaq Shókeev sharýa qojalyǵynyń bastamalaryn joǵary baǵalady.
Búginde «Atameken» sharýa qojalyǵy jańbyrlatyp sýǵarý tehnologiiasyn paidalanyp otyr. 40 gektap alqapta mal azyǵy egilgen.
Ortalyq alańda halyqpen kezdesken Ómirzaq Shókeevke turǵyndar tarapynan san túrli baǵytta suraqtar qoiyldy. Sozaqtyqtar Túrkistan men Sozaq arasyndaǵy jol máselesin, Baldysý eldi mekenin sýmen qamtý, Qumkent aýylyna jol salý, meditsina jáne jedel járdem salasyndaǵy áýre-sarsań, sport kesheni tapshylyǵy, aýdandy gazdandyrý, aýyl sharýashylyǵyna nesie berý jáne ózge de túitkilderdi qozǵady. Óńir basshysy aldymen eldegi saiasi reformalarǵa toqtalyp, suraqtarǵa jaýap berdi.
Buryn odaq tusynda Sozaqty depressivti aimaqqa jatqyzatyndar bolǵan. Men munymen kelispeimin. Kerisinshe, Sozaqtyń bolashaǵy óte jarqyn dep esepteimin. Ýran qory, fosfor kenishi jáne aýyl sharýashylyǵyn damytýǵa qolaily aýmaǵy bar. Bul jaqtyń máselelerin de bilemin. Sizder kótergen gaz máselesi bizdiń nazarymyzda tur. Sholaqqorǵanǵa gaz tartý jumysy júrip jatyr. Ol aldaǵy ýaqytta sheshiledi. Jol qurylysy da aiaqtalady. Jalpy eki jylda Sozaqtaǵy qanaǵattanarlyq deńgeidegi joldardyń úlesi 80-90 paiyzǵa jetedi dep oilaimyn. Sholaqqorǵanda mektep salynady. Jedel járdemge qatysty usynys ta qaralyp, zań aiasynda sheshim qabyldaimyz, – dedi Ómirzaq Shókeev.
Sozaq aýdanynda 2021 jyly aýyl sharýashylyǵy salasyndaǵy jalpy ónim kólemi 17, 6 mlrd teńge bolyp, 2020 jyldyń osy merzimimen salystyrǵanda arta túsken. Aýyl sharýashylyǵynyń negizgi kapitalyna 320 mln teńge investitsiia tartý mejelense, 378,3 mln teńge tartylǵan. Aýdan boiynsha byltyr 14 myń gektar alqapqa egis egildi. Sondai-aq, egis kólemin arttyrý maqsatynda Cozaq aýyl okrýgindegi «Sýyndyq» kanalyn kúrdeli jóndeý jumystaryna oblystyq biýdjetten qarjy bólinip, 3704 lotok aýystyrylyp, 13 shliýz qoiylyp, paidalanýǵa berilgen.
Aýdandaǵy birqatar sharýa qojalyqtary aǵyn sýdy únemdeý maqsatynda jańbyrlatyp sýǵarý qondyrǵysyn satyp alǵan. Jaiylymdardy sýlandyrý maqsatynda 73 qudyq qazylǵan.
