İs-sharanyń maqsaty – Qazaqstan joǵary oqý oryndarynyń jáne basqa múddeli uıymdardyń ókilderin Erazmýs+ besinshi baıqaýynyń talaptary, irikteý rásimi, ulttyq jáne aımaqtyq basymdyqtary týraly aqparattarmen tanystyrý, sondaı-aq Erazmýs+ is-sharalaryna qatysýǵa tilek bildirýshilerge praktıkalyq keńes berý bolyp tabylady.
Erazmýs+ baǵdarlamasynyń Aqparattyq kúnine Almaty aımaqtyq rektorlar Keńesiniń tóraǵasy, Abaı atyndaǵy QazUPÝ rektory Takır Balyqbaev, QR-daǵy Fransýz Elshiligi Bas konsýldyǵynyń ýnıversıtettik yntymaqtastyǵy boıynsha attashesi Jıl Memets, Qazaqstandaǵy Erazmýs+ baǵdarlamasynyń ulttyq úılestirýshisi Shaızada Tasbolatova, ýnıversıtettiń profesor-oqytýshylar quramy, respýblıkamyzdyń óńirlerinen kelgen joǵary oqý oryndarynyń ókilderi qatysty.
İs-shara barysynda rektor Takır Balyqbaev eýropalyq baǵdarlamalardyń mańyzdylyǵyna jáne erekshelikterine toqtalyp ótti:
– Erazmýs+ baǵdarlamasy bilim berý júıesin turaqty damytý men onyń tıimdiligin arttyrý arqyly qazaqstandyq bilimniń halyqaralyq deńgeıge kóterilýine yqpal etedi. Bul baǵdarlamalar bizdiń oqytýshylarymyzǵa jáne stýdentterge joǵary bilim berýde mańyzdy tájirıbege ıe bolýǵa, básekege qabilettilikti arttyrý maqsatynda kásibı deńgeıin damyta otyryp, jahandyq naryqtyq jaǵdaılarǵa daıyn bolýǵa, qajetti daǵdylardy qalyptastyrý, kásibı deńgeıin kóterý jáne mádenıetaralyq túsinistikti arttyrý múmkindikterin beredi, – dedi.
«Joǵary bilim berý salasyndaǵy áleýetti arttyrý» jobalaryna (budan ári - JBBÁA) qatysýshylarǵa, áleýetti qosymshalardy ázirleýshilerge jáne oqý oryndarynyń halyqaralyq bólimsheleriniń qyzmetkerlerine Erazmýs+ baǵdarlamasynyń ulttyq úılestirýshisi Shaızada Tasbolatova Erazmýs+ baǵdarlamasynyń negizgi sıpattamalary, Erazmýs+ baǵdarlamasynyń Joǵary bilim berý áleýetin arttyrý men Halyqaralyq kredıttik utqyrlyq komponentterine sáıkes IV baıqaýdyń nátıjeleri, baǵdarlamanyń negizgi 2 áreketi týraly, atap aıtqanda: 1) Halyqaralyq kredıttik utqyrlyq jáne Erazmýs Mýndýs (Erasmus Mundus) birlesken magıstrlik baǵdarlamalary; 2) Joǵary bilim salasynyń áleýetin arttyrý, besinshi joba baıqaýynyń jańalyqtary, ulttyq jáne aımaqtyq basymdyqtar boıynsha tolyq aqparat berdi.
Sonymen qatar sharaǵa qatysýshylarǵa Erazmýs+ baǵdarlamasynyń Ulttyq keńsesiniń ókilderi «Jan Mone» baǵdarlamasy boıynsha, Erazmýs+ jobasy týraly aqparattandyrý jáne joǵary bilim berý reformasy boıynsha sarapshylardyń ulttyq komandasynyń qyzmeti týraly aqparat berdi. Sonymen qatar, JBBÁA jobasynyń qatysýshylary men jobalyq ótinimderdi ázirleýshi taraptar úshin arnaıy sesıalar uıymdastyryldy. Qatysýshylarǵa Erasmýs+ baǵdarlamasynyń aıasynda jeke jáne toptyq aqparattar berilip, joba úılestirýshileri men top múshelerine qosymsha keńester berildi.
Sharanyń ekinshi kúni Qazaqstan joǵary oqý oryndarynyń stýdentteri men magıstranttaryna «Erasmus Mundus» birlesken magıstr dárejesi jáne halyqaralyq kredıttik utqyrlyq týraly aqparat berildi. Óz kezeginde Shaızada Tasbolatova baǵdarlamanyń jańa jobalary, konkýrstarǵa qatysý erekshelikteri, krıterııler men irikteý rásimderi, ulttyq jáne aımaqtyq basymdyqtar týraly baıandap, Erazmýs+ baǵdarlamasyna qatysam deýshilerge arnalǵan jobalardy qarjylandyrý boıynsha praktıkalyq usynystar berdi. İs-shara barysynda Erasmýs+ baǵdarlamasynyń Ulttyq keńsesiniń ókilderi ózderine qoıylǵan suraqtarǵa tushymdy jaýaptar qaıtardy.
Rımma Janbaeva
