Mańyzdy nysandy ashý isi óz jumysyn durys atqarmaǵan merdiger kompaniianyń kesirinen birneshe ret keiinge shegerilgen bolatyn. Is sotqa deiin jetip, ShQO ákimdigi tabandylyq tanytqany esimizde.
Jumysyna salǵyrt qaraityn merdigerler ózderine tapsyrylǵan jumysty kestege sai júrgizbei, osy ortalyqtyń ashylýyn saryla kútken talai naýqastarǵa kesirin tigizgenin jasyryp qaitemiz. Endi sol olqylyqtyń orny tolyp, jurtshylyq kútken áleýmettik nysan halyqqa qyzmet etýge daiyn.
Osylaisha, Ulttyq iadrolyq ortalyqtyń sarapshylary qaýipsizdik talaptary joǵary deńgeide saqtalmaǵanyn anyqtaǵan-dy. Budan basqa, tekserýshiler ǵimaratty jeldetý júiesinde de úlken kemshilik ketkenin eskertkeni esimizde.
Osydan keiin 2019 jyly ShQO ákimi Danial Ahmetov suiyq radiatsiialyq qaldyqtardy saqtaityn qoima bolashaqta ortalyqta jumys isteitin qyzmetkerlerdiń densaýlyǵyna kesiri timeýi úshin asa mańyzdy sheshim qabyldaǵan bolatyn. Osylaisha, óńir basshysy ortalyq qyzmetker men emdelýshiler úshin barynsha qaýipsiz nysan bolýy kerek ekenin qadap aityp, isti óz baqylaýyna alǵan edi.
Onyń ústine, sarapshylar «Medtehnika» kompaniiasy qoiǵan qural-jabdyqtar joba talabyna sáikes kelmeitinin aitqannan keiin, taraptar bir-birimen uzaq ýaqyt boiy sottasýǵa májbúr boldy. Sońynda sot qural-jabdyqtarǵa demontaj júrgizý týrasynda sheshim shyǵaryp, máseleni oń baǵytta sheshti.
Al shyndyǵynda, Úkimettik komissiia músheleri birneshe ret ortalyqqa kelip, nysannyń qujatynda kórsetilgen talaptar qanshalyqty saqtalǵanyn teksergen bolatyn. Sol kezde komissiianyń quramynda Ulttyq iadrolyq ortalyqtyń sarapshylary, QR Parlamenti depýtattary, sol kezde QR Densaýlyq saqtaý vitse-ministri bolǵan qazirgi ministr Aleksei Tsoi myrza da bolǵany esimizde. Sonda osynshama bilikti mamandar «Medtehnika» mekemesiniń qyzmetkerlerinen jaǵdaidy kem túsingen be? Tájiribeli mamandardyń bultartpas dálelderin sot nazaryna usynyp, qaýipti suiyqtyqty saqtaityn jabdyqtarǵa demontaj jasaýǵa qol jetkizdi. Osylaisha, Úkimettik komissiia úlken apatqa jol bergen joq. Nesin aitasyz, budan qyńyr kisi bir jaq, qyryq kisi bir jaqtyń kerin baiqaǵandai boldyq.
Qazirgi tańda radioizotopty diagnostikalaý bólimi óz jumysyn bastady. Bul bólimge ornatylǵan birfotondy emissiondy kompiýterlik tomograf túrli aýrý túrlerine zaman talabyna sai tiimdi diagnostika jasaýǵa múmkindik beretinimen erekshelenedi.
Taǵy da aita tússek, ortalyqtyń baspasóz qyzmetiniń taratqan málimetinshe, búginde joǵary bilikti 16 meditsina qyzmetkeri jumysqa kirisken. Olardyń qatarynda iadrolyq meditsina mamandary, radiohimik, radiofarmatsevt, fizikalyq meditsina jáne radiatsiialyq qaýipsizdik boiynsha injener mamandar bar.
Al ekinshi kezeńde – ortalyqta radionýklidti terapiiany engizý kózdelse, úshinshi kezeńde – PET diagnostikalaý men radiofarmpreparattar óndirisin iske qosý josparlanyp otyrǵanyn aita ketýimiz kerek.
Osy rette atalǵan meditsinalyq ortalyq elimiz boiynsha júzdegen adam saryly kútken teńdesi joq mekeme desek artyq aitqandyq bolmas. «Medtehnika» mekemesiniń basshysy Bahtiiar Sapiev ortalyqtyń ashylýyn saryla kútken naýqastardyń janaiqaiyn qaidan túsinsin? Ony bir túsinse dáriger mamandar túsineri anyq. Aitalyq, Iadrolyq meditsina ortalyǵynyń bas dárigeri Marat Sandybaev jyl saiyn elimiz boiynsha 600 adam ortalyqtyń qyzmetine muqtaj ekenin alǵa tartqan bolatyn.
Eger o bastaǵy jospar boiynsha ortalyqty 2015 jyly jumysqa kirisip, «Medtehnika» mekemesi nysandy qajetti meditsinalyq qural-jabdyqtarmen qamtyǵan jaǵdaida, kúni búginge deiin elimiz boiynsha 5 myńnan astam adam em alyp, densaýlyǵyn túzer edi. Ókinishke orai, ómirmen qosh aitysqan keibir naýqastarǵa endi ondai em-domnyń qajeti joq...
Ozyq meditsinalyq ortalyqta zamanaýi meditsinalyq jabdyqtardyń kómegimen kez kelgen naýqastyń organyna, qanyna, limfasyna jáne zat almasý úrdisine keshendi diagnostika jasaýǵa bolady. Sonymen qatar jańadan paida bolǵan jáne asa qaterli aýrýlardy kúni buryn anyqtap, onyń aldyn alyp emdeýge múmkindik zor.
Osylaisha, Semei Iadrolyq meditsina ortalyǵy aldaǵy ýaqytta oblystyń ǵana emes, tutastai respýblika halqynyń igiligi úshin jumys isteitin bolady.
