Ózbekstan prezidenti Shavkat Mirziiaev muǵalimder men dárigerlerdi tazalyq jumystaryna jekkender zań aldynda jaýap beretinin aitty. Qazaqstanda da buǵan deiin muǵalimder mindetten tys eńbekke jegiletinderin aityp shaǵymdanǵan.
Mirziiaev sáýirdiń 13-i kúni eldiń Syrdariia oblysy Seihýnabad aýdanyna barǵan saparynda muǵalimder men dárigerlerdi kóshe tazalaýǵa shyǵarǵan ákimder jáne bastyqtar qyzmetinen qýylatynyn eskertti.
Sáýirdiń basynda Samarqand oblysynda kóshe tazalaýǵa shyqqan 28 jastaǵy muǵalim Diana Enikeevany kólik qaǵyp, mert qylǵan.
Mirziiaev muǵalimniń ólimine "ózin kinálady".
"SOŃǴY RET ESKERTEMIN..."
"Samarqandtaǵy muǵalimniń ólimi týraly estidim. Mektep direktory, ákim eki-úsh kún buryn qonaq keledi dep aitqan. Júregimniń túbinde muǵalimniń ólimine ózimdi kinálaimyn.
Sońǵy ret eskertemin, kimde-kim muǵalimderdi, dárigerlerdi jáne stýdentterdi erkinen tys jumysqa tartsa, qatań jazalanady.
Qyzmetinen qýylý bylai tursyn, zań aldynda jaýap beredi. Onyń sińirgen eńbekteri bolar, biraq oǵan qaramaimyn. Osyndai ister qaitalana bergen soń taǵy aitýǵa májbúrmin" dedi Ózbekstan prezidenti.
Mirziiaev ár aimaqqa sapary aldynda ákimderdiń kózboiaýshylyq jasaitynyn da synady.
"Ár aimaqqa barar aldynda ol jaqtaǵy jaǵdaimen tanysamyn. Biraq aimaqtarda kózboiaýshylyq kóp. Shynymdy aitsam, osynyń barlyǵy jiirkenishti.
Muǵalimder men dárigerlerdi kóshe tazalaýǵa shyǵarý – maǵan jáne eldegi saiasatqa jasalǵan satqyndyq.
Eldegi qai kósheni jýyp, tazalaǵanyn bilip otyramyn. Halyqty kóshe tazalaýǵa shyǵarý arqyly sizder alǵys almaisyzdar, qarǵys alasyzdar. Bizdiń dostarymyzben qatar jaýlarymyz da bar. Sizder osy isterińiz arqyly jaýlarymyzǵa kómektesesizder" dedi ol Saihýnabad aýdanynyń ákimdiginiń qyzmetkerlerimen kezdesýde.
Mirziiaev ár aimaqqa barǵanda, jinalystarda "aldyn-ala daiyndap qoiǵan adamdardyń maqtaý men madaq sózderinen" sharshaǵanyn da aitty.
"Shyn júregimnen aitamyn, eger dosym bolsańyzdar mundai isterdi doǵaryńyzdar. Burynnan beri qordalanǵan máselelerdi jarty jylda sheshe almaityndaryńyzdy bilemin.
Jinalystarda arnaiy daiyndalǵan adamdar shyǵyp sóilegenin kórgende esh senimim qalmaidy.
Men qarapaiym halyqty, olardyń máselesin tyńdaýǵa kelemin" dedi ol.
Halyqaralyq adam quqyǵy uiymdary Ózbekstandy biýdjettik qyzmetkerlerdi mindetinen tys jumystarǵa shyǵarǵany úshin jii synaidy. Muǵalimder men dárigerlerdi qurylys, jóndeý jumystaryna, maqta jinaýǵa, kóshe tazalaýǵa shyǵarý marqum bolǵan prezident Islam Karimov tusynda jii baiqalǵan. 2017 jyly Ózbekstan premer-ministri Abdýlla Aripov maqta terip júrgen muǵalimder men stýdentterdi qaitarýdy talap etken.
QAZAQSTANDAǴY JAǴDAI
Qazaqstanda da muǵalimder mindetinen tys jumysqa jegiletinderin, direktorlar gazetterge qinap jazdyratynyn aityp, jii shaǵymdanady. 2017 jyly eldegi muǵalimder Astanadaǵy EKSPO kórmesine kúshtep bilet alǵandaryn jetkizgen.
2015 jyly Almaty oblysy Uzynaǵash aýylyndaǵy muǵalimder Azattyqqa Qazaqstan prezidentin sailaýy aldynda kóshe tazalaýǵa bir aptaǵa senbilikke shyqqandaryn aitqan.
Almaty oblysynyń Qarasai aýdany Jańaturmys aýyldyq mektebiniń muǵalimi Aiman Saǵidýlla da birneshe ret erkinen tys senbilikke shyqqanyn, sailaý kezinde ár úidi aralap, aýyl turǵyndaryn sailaýǵa shaqyrǵanyn aitqan. Ol "ózine qysym jasaǵan" mektep direktorymen sottasyp, jeńgen.
Shymkenttiń Eńbekshi aýdandyq sotynyń sýdiasy Sveta Nurbekova №38 mekteptiń muǵalimi, "mindetinen tys jumysqa tartylyp, direktordan qysym kórgenin" aitqan Gúljan Sálimbaeva mektep basshysyn sotqa bergen. Biraq sot onyń shaǵymyn qanaǵattandyrmaǵan.
2017 jyly Qazaqstannyń ár aimaǵynda turatyn, ózderin «táýelsiz» ataityn muǵalimder áleýmettik jelide uiymdasyp, qysym kórgen áriptesteriniń quqyǵyn birigip qorǵai bastady.
Derekkóz: Azattyq radiosy
