Oblys ortalyǵy Óskemen qalasyndaǵy «Halifa Altai» meshitinde aimaq basshysy Danial Ahmetovtyń qatysýymen tarihi jádigerler murajaiy ashyldy.
– Bul igi is “Rýhani jańǵyrý” baǵdarlamasynyń aiasynda júzege asyryldy. Meshit tek dini qulshylyq etetin orny ǵana emes, sondai-aq salt-dástúrdi, tarihymyzdy nasihattaityn rýhani ortalyqqa ainalýy tiis. Qazirgi zaman talaby da osy. Erte saq, ǵun, túrki dáýirlerinen bastap, Táýelsiz Qazaqstannyń qurylýyna deiingi tarihty tizbekteitin osynaý biregei murajaida qundy jádigerler men olardyń túpnusqasynan alynǵan kóshirmeleri erekshe kóz tartady. Aldaǵy ýaqytta munda Shyǵys Qazaqstannyń biregei bailyǵy sanalatyn Eleke sazynan tabylǵan Altyn adamǵa, Qońyr áýliege, Yrǵyzbai áýliege, Elbasymyz Nursultan Ábishuly Nazarbaevqa jáne Muztaýǵa arnalǵan jeke stendter ashylsa murajai tipten árlene túser edi. Budan bólek kireberis zaldyń bir qabyrǵasyna túgeldei derlik Qazaqstannyń damý tarihyn sýretteitin panoramalyq sýret salý kerek, – dedi oblys ákimi Danial Kenjetaiuly.
Murajaida Kúltegin eskertkishiniń kóshirmesi, Túrkistandaǵy áigili Taiqazannyń kóshirmesi, qazaqtyń alty qanat kiiz úii qoiylyp, Arystanbab, Qoja Ahmet Iassaýi keseneleriniń shaǵyn maketteri ornatyldy. Budan bólek munda kelýshiler qasietti Quran kitabynyń elektrondy zamanýi kóshirmesin, tarihi qundy eńbekterdiń elektrondy nusqalaryn da tamashalai alady.
Sondai-aq munda ulttyq kóne jádigerler men ejelgi dini buiymdarda qoiylǵan.
Tipti murajaida túrki dáýiriniń tarihynan syr shertetin «Oǵyznama» sekildi keibir sirek kitaptardyń túpnusqalyq kóshirmesi de Ulybritaniianyń Kembridj ýniversitetinen jáne Túrkiiadaǵy Súleimanie meshitiniń kitaphanalarynan alynyp qoiyldy.
Aldaǵy ýaqytta atalmysh mýzeidiń tynys-tirshiliginen habar beretin sait iske qosylyp, onda mýzeige 3D týr jasaý múmkindigi ashylady.
Ásem Jylqysheva,
Óskemen qalasy
