Áleýmettik jelide janaiqaiyn jetkizgen ustaz halyqtan, prezident Toqaev pen Bilim ministri Aimaǵambetovten arasha surady dep habarlaidy Dalanews.kz.
"Men Jambyl oblysy, Taraz qalasy №43 orta mektepte osy kúnge deiin eńbek ettim. 29 jyl ótilim bar. 29 jyl boiyna bilim salasynyń otymen kirip, kúlimen shyǵyp kelemin.
Sońǵy jyldary mektebimizde zańsyz áreketter, adam quqyǵyn aiaqqa taptaý, jemqorlyq sekildi kesel beleń ala bastady. Óz jumysyn jetik bilmeitin basshy bilgenin jasap, tóbemizde áńgirtaiaq oinatyp, bilep-tóstep otyr.
Mundailardyń derligi óz qyzmetine tamyr-tanys, aǵa-kókeniń arqasynda kelgender. Kópshiligi kreslosyna qonjiyp alǵannan keiin oiyna kelgenin isteidi. Olarǵa "qoi, der qoja, ái, der áje joq".
Buǵan deiin Tarazdaǵy №25 orta mektepti bylyqqa batyryp, elge dóreki basshy retinde tanylǵan Elmira Ómirbekova №43 orta mektepke direktor bop kelgennen keiin baiaǵy ádetine qaita basty. Ol óz qyzmetin asyra paidalanyp keledi", – deidi Kúnsulý Bórimbekova.
Aitýynsha oblystyń bilim salasyna jaýapty tulǵalar álgi direktordyń buǵan deiin №25 orta mektepti oirandap ketkenin bile tura, 2017-2018 oqý jylynda №43 orta mektepke ákep otyrǵyzǵan. Elmira Ómirbekova bilim ordasynyń tizginin qolyna alǵaly airandai uiyǵan ujymnyń berekesi qashqan. Oǵan jaqpaǵan muǵalimder jumystan qýylǵan, 20-25 jyl eńbek ótili bar ustazdardyń qyr sońyna túsken. Aqyry qyzmetinen ketýge májbúrlegen.
"Búgingi kúni osy direktordyń talapaiyna ushyraǵan ustazdyń biri – menmin. Meni aqpan aiynyń 17-inde eshbir sebepsiz jumystan shyǵaryp jiberdi.
Budan eki kún buryn direktor mekteptegi májilis zalynda búkil muǵalimniń basyn qosyp, eshbir josparsyz jinalys ótkizgen. Sol jinalysta: "Myna men eshqaida ketpeimin. Ketseńder myna sender ketesińder! Bul aradan ketkennen keiin senderdi eshkim jumysqa almaidy...", – dep ornymyzǵa endi ǵana otyrǵan bizderdi qorqytyp úrkitken edi.
Sonyń aldynda mektebimizdiń 7-8 synyp oqýshylary tóbelesip, aiǵai-shý bolǵan. Álgi jinalysta Elmira Ómirbekova buǵan jol bergen synyp jetekshilerin ornynan turǵyzyp, eskertý jasady. Sol arada birneshe muǵalimge sógis berdi. Eń qyzyǵy meniń de esimimdi atady. Al men 11 synyptyń jetekshisimin..." , – deidi Kúnsulý Bórimbekova.
Aitýynsha bul daýǵa qalai iligip ketkenin ózi de túsinbepti. Ózine ne sebepti sógis bergenine alǵashqyda ań-tań bolǵan. Álgi jinalysta direktor aǵylshyn páninen sabaq beretin ustazdy ornynan turǵyzyp tildep tastapty.
"Shyrshaǵa jinalǵan aqshanyń qaida ketkenin myna menen suraityn sen kimsiń ózi?" dep ákireńdedi. Sol arada men sóz alyp, maǵan ne sebepti sógis bergenin suradym. Direktor úndegen joq, ornyna orynbasary sóiledi.
"Sen muǵalim retinde ózińe tiisti jumysty atqarmadyń. Synybyńdy mektepten jóndep shyǵaryp salmadyń" dep jaýap berdi. Men olarǵa qaitara saýal qoidym.
"Áriptesimniń suraǵy oryndy. Mektepke dep túrli sebeppen aqsha jinalady. Sol aqshanyń qaida jumsalǵanyn aityp, esep berip otyrǵanynyń aiyby joq" – dedim.
Direktor doldanyp ketti. "Men ústińizden aryz joldap, jumystan shyǵaramyn. Jaýap beresiz bul sózińizge! 17 aqpannan bastap... bossyz", – dedi.
Sózinde turdy. Meni jumystan qýyp jiberdi. Syrtymnan buiryq shyǵaryp, bolmaǵandy bolǵandai etipti.
Buiryqpen tanysqan kezde direktordyń eshnárseden taiynbaityn adam ekenine kózim jetti.
Synyp jetekshisiniń jumysyn durys atqarmaǵanym úshin bir sógis beripti. Oǵan qoimai qańtardyń sońǵy kúnin belgilep taǵy bir sógis jariialapty. Eger mundai sógis jariialansa maǵan nege kórsetpegen? 30-31 kúni direktor mektepte múlde bolǵan joq. Mende buǵan dálel bar", – deidi ustaz.
Jumystan qýylǵan muǵalim direktordyń basqa da bylyqtaryn áshkerelegen eken. Aitýynsha direktor muǵalimderdiń ústinen kún kóredi, dekretke shyqqandar direktorǵa úles beredi.
"Jeltoqsan aiynyń 27-inde búkil Qazaqstan qara jamylyp, aza tutqan kúni bizdiń direktor mektebimizde diskoteka jasap, ár baladan 200 teńgeden aqsha jinatyp, toi-dýman qyldy. Jańa jyldy atap ótti.
Bolmashy nárseni jeleýletip ai saiyn aqsha jinaityn minezinen mezi boldyq. Mektebimizde aqyly kabinetter bar. Onyń aqshasy muǵalimge tiesili, alaida bul aqshany bizden tartyp alady.
Bul bergi jaǵy. Mektep muǵalimderi dekrettik demalysqa shyqqanda ár ustazdan 50 myń men 100 teńgeniń kóleminde "ustap" qalady.
Oblystan, prokýratýradan komissiia keledi dep ár muǵalimnen 1000-2000 teńgeden jinaityny taǵy bar. Jyl basynda synyp ashamyn dep jinigip bizdiń jalaqymyzdan 2000 teńgeni jyryp qaldy.
Osyndai jemqor adamdy mektepke direktor etý aqylǵa siia ma?
29 jyl ǵumyrymdy shákirt tárbieleýge sarp etken meni jumystan qýyp jiberdi. Men buǵan tóze almaimyn. Sizderden kómek suraimyn. Men endi qaida baramyn? Maǵan qoldaý kórsetińizdershi.
Ózimniń áriptesterim, muǵalimder, sizder de únsiz qalmańyzdar. Prezident Toqaev, Bilim ministri Aimaǵambetov osy isti ádil tekserip, men óz qyzmetime qaita alýdy suraimyn. Sizder qol ushyn sozady dep senemin", – deidi Kúnsulý Bórimbekova.
...
30 jyldyq eńbek ótili bar mamannyń sózin áriptesteri de qoldap otyr. Ustazdar "direktor mektepti menshigindei kóredi" deidi.
Osy videúndeýden keiin atyshýly direktor jumystan ketti. Daýǵa Bilim ministri aralasyp, istiń aq-qarasyn anyqtaýǵa ýáde etti.
Aimaǵambetov bilim oshaǵynyń basshysy pedagogikalyq etikaǵa qaishy áreket jasaǵanyn moiyndady. Áitkenmen eks-direktoryń ózi kinásin moiyndaǵan joq, kerisinshe elden arasha suraǵan ustazdy kinálap otyr.
"Bizdiń mektebimizde 100-den asa muǵalim bar. Solardyń úsheýi meniń ústimnen shaǵymdandy. Shaǵymdansyn. Quqy bar. Áitkenmen qarjy máselesine qatysty aiyptaýlary negizsiz. Olar muny dáleldeýi kerek. Maǵan jala japqany úshin sotqa súireimin", – deidi Elmira Ómirbekova.
Ol buǵan deiin de osyndai daýǵa qalǵan. 6 jyl buryn №25 mektepti basqarǵan tusta bilim oshaǵynyń ujymy dál búgingidei qarsy shyqqan edi.
https://www.instagram.com/p/B84ME2LhILS/
