Jańy jyldyń qarsańynda QR Prezidentiniń «Bolashaq» halyqaralyq stipendiiasy stipendiattarynyń qaýymdastyǵy «9M» qaiyrymdylyq jobasynyń aiasynda Uly Otan soǵysy ardagerleri men tyl eńbekkerlerin Jańa jyl merekesimen quttyqtaý aktsiiasyn uiymdastyrdy.
Shara aiasynda «Bolashaq» qaýymdastyǵynyń músheleri ardagerlerdi quttyqtap, olarǵa merekelik azyq-túlik sebetteri men tegin meditsinalyq kómek alýǵa arnalǵan sertifikattaryn tabys etti.
Qazaqstandyq 5000-nan astam ardargerlerdiń 900-ge jýyǵy Almaty qalasynda turady. Ókinishke orai, Uly Otan soǵysy ardagerleriniń sany jyl óte azaiyp keledi, sondyqtan óskeleń urpaqtyń alǵysy olar úshin barlyq marapattan qymbat.
– Biz, Qazaqstannyń jas urpaǵy, bizge osyndai beibit ómir syilaǵanyńyz úshin sizderge sheksiz alǵysymyzdy bildiremiz. Qazirgi tańda bizdiń boryshymyz – osy tynyshtyq pen turaqtylyqty saqtap qalý jáne sizderdiń erlikterińizdi keiingi urpaqtarǵa aityp jetkizý, – dep óziniń quttyqtaý sózinde Almaty qalasyndaǵy «Bolashaq» qaýymdastyǵynyń direktory Qymbat Beisekina atap ótti.
Quttyqtaýdy qabyl alǵan ardagerlerdiń ishinde Nábieva Minaýra, Malyshev Dmitrii, Ahmetov Qanapiia syndy Uly Otan soǵysynyń kórnekti qatysýshylary bar.
Minaýra Nábieva (týǵan jyly – 1922 j.) Soltústik-batys jáne 2-Belorýs maidandary shaiqastaryna qatysqan. Soǵys kezinde eki ret jaralanyp, ekinshisinde snaiperlik oq eki aiaǵyna da tiip, aýyr jaraqat alypty. Aýrýhanadan shyqqannan keiin, oqýǵa baryp kelesi qyzmetin radioprojektorist retinde atqarǵan. Minaýr ájei soǵystan keiin 25 jyl kóleminde Sháken aimanov atyndaǵy Qazaqfilm kinostýdiiasynda kinohronika redaktory qyzmetin atqarǵan. Sonymen qatar, Minaýr Maǵzumqyzy shahmatty keremet oinaidy eken, tipti bir ret Leonid Brejnevtiń ózimen bir partiia oinapty.
Dmitrii Malyshev (týǵan jyly – 1922 j.) soǵysta tankisttiń qyzmetin atqarǵan. Malyshev myrza «Bagration» operatsiiasyna, Ýkraina, Belorýssiia, Polsha, Moldova, Rýmyniia jáne Vengriia memleketterin bosatýǵa jáne 1-Belorýssiia men 2-Belorýssiia maidandaryna qatysqan. Sonymen qattar, Dmitrii Malyshev 1945 jylǵy Máskeýdegi jeńis paradynyń qatysýshysy bolyp tabylady.
Ahmetov Qanapiia (týǵan jyly – 1924 j.) Uly Otan soǵysynyń Leningrad maidanynda pýlemettik vzvod komandiri bolyp qyzmet atqarǵan jáne Ýkraina, Polsha men Ońtústik Germaniia territoriialaryndaǵy shaiqastarǵa qatysqan. Jeńisti Praga qalasynda qarsy alypty. Soǵystan keiin Qazaqstan OK Kompartiiasynyń úgit-nasihat júrgizýshi bóliminiń orynbasary, partiia jumysshysy, partiianyń Almaty qalalyq komitetiniń ekinshi hatshysy, partiianyń Almaty ónerkásip obkomynyń ideologiia jónindegi hatshysy, Qazaq memlekettik ýniversitetiniń (qazirgi ál-Farabi atyndaǵy QazUÝ) prorektory jáne Qazaq dene shynyqtyrý institýtynyń rektory qyzmetterin atqardy. 1970 jyldardyń ortasynan bastap eńbek demalysyna shyqqanǵa deiin Almaty energetikalyq institýty kafedrasynyń jetekshisi qyzmetin atqardy.
Aktsiiany júzege asyrý úshin qajetti qarajatty «Bolashaq» qaýymdastyǵynyń músheleri bóldi. Sonymen qatar aktsiianyń demeýshisi – «Almaty» integrativti meditsina ortalyǵy. Aktsiia seriktesi – «Hlebov» naýbaihanasy.
«9M» jobasy 2012 jyly «Bolashaq» qaýymdastyǵy UOS ardagerleriniń erlikterin nasihattaý jáne úlgi etý maqsatynda uiymdastyrǵan joba. Ár jyl saiyn joba aiasynda UOS ardagerlerine jáne eńbek maidanynyń qatysýshylaryna, ásirese jalǵyz basty, muqtaj jandarǵa materialdyq jáne meditsinalyq kómekter kórsetilip otyrady. «9M» jobasyn árdaiym stipendiattar men belsendi jastar qoldap otyrady.
«QmD» aqparat
