Kúieýi Baqytbek Esentaevtan ońbai taiaq jegen prodiýser osylaisha el kózine kórindi.
Óz sózinde Esentaeva áielderdi turmystaǵy zorlyq-zombylyqtan qorǵaityn uiym qurǵysy keletinin aitty.
[caption id="attachment_19728" align="aligncenter" width="801"]
«Ózimniń basymnan ótken jaǵdaidy búkil elge aitýǵa májbúrmin. Sebebi, kóptegen áielder qaýymy osyndai qorqynysh pen úreide ómir súredi. Olardy óz kúieýinen eshkim qorǵamaidy. Sebebi, zań bilmeidi. Men dál osyndai jaǵdaidy basymnan ótkerdim. Osy sebepti de áielderdi turmystaǵy zorlyq-zombylyqtan qorǵaityn uiym qurmaq oiym bar. Jaqyn adamyńnan japa shegýdiń qandai bolatynyn óz basym jaqsy bilemin» deidi Baian.
«Men kúieýimnen ońbai taiaq jedim. Alaida áielder quqyǵyn qorǵaityn eshbir uiym maǵan habarlasqan joq. Halimdi de, jaǵdaiymdy da suramady. Bizde mundai áielder qaýymdastyqtary jumys isteidi. Alaida endigi jerde naqty ispen ainalysatyn, áielderdiń quqyǵyn sóz júzinde emes, is júzinde qorǵaityn uiym qurý qajet» deidi prodiýser.
Baiannyń aitýynsha, turmystaǵy zorlyq-zombylyqpen resmi túrde kúresý kerek. Áielder óz quqyǵyn bilýi tiis.
«Men kúieýimdi jaqsy kórgen joqpyn. Tek ýaqyt ozǵan saiyn úirenip kettim. Biraq sońǵy eki jyl adam tózgisiz boldy. Sondyqtan da sońǵy kezderi ajyrasý týraly oilana bastadym. Alaida kúieýim «ajyrasar bolsań, óltirip tastaimyn» dep qorqytty.
https://www.youtube.com/watch?v=A4BCeM5fp0w
Ári qarai Baian Esentaeva kúieýimen aradaǵy janjaldyń qalai bolǵanyn, neden týyndaǵanyn aityp beripti.
«10 maýsym bolatyn. Men úige qaityp kele jattym. Negizinde budan buryn, 5 maýsym kúni janjaldasyp qalǵanbyz. Men úige dál osy 5 maýsymda oralýǵa tiis bolǵanmyn. Alaida 5 kúnge keshigip qaldym. Kúieýim tarapynan qorqytý men úrkitý kóbeiip ketkesin birneshe kún aialdai turaiyn dep sheshtim. Sál sabasyna túser degen úmitim bolǵan.
Men ádeii sheteldik reispen keldim. Ol bilmei qalady dep oiladym. Ushaqtan túsip, taksige otyrǵanym sol qaidan kelgeni belgisiz esikti julqyp ashqan kúieýim janyma jaiǵasyp aldy. Men muny kútpegen edim. Onyń qolynan pyshaqty baiqap qaldym.
Oilanyp úlgergenshe bolǵan joq pyshaqty suǵyp aldy. Túrinde aiaýshylyq sezilgen joq. Alǵashqyda men de aýyrsynbadym. «Shok» jaǵdaiynda bolǵan shyǵarmyn. Áldeqandai sumdyqtyń bolǵanyn ishim sezdi. Biraq, birden óz-ózimdi qolǵa aldym. Aiǵailasam, dabyra kótersem túk ónbesin bildim…Taksi júrgizýshisinen kómektesýin suradym.
Sol sátte-aq kúieýim meni soqqynyń astyna aldy. Kózim tumandanyp ketti. Sodan keiin ol taksistke toqtaýdy buiyrdy. Men kólikten shyqtym. Aiǵailaǵannan paida joq edi. Qansha jerden tabysty, tanymal áiel bolsań da erkekke qarsy eshteńe istei almaisyń.
Sodan keiin ol meni basqa kólikke otyrǵyzdy. Sóitsem bul kólik meniń taksige otyrǵannan kezden-aq artymyzdan ańdyp otyrypty. Rólde kúieýimniń jieni otyr eken.
Ári qarai bir sumdyq bastaldy. Kúieýimniń qyr-syryn bilsem de, ony munshalyqty aiaýsyz dep oilamaǵan edim. Sonda da úndegen joqpyn. Aiǵailaǵannan, kómek suraǵannan nátije shyqpasy belgili edi.
Ol meni eki saǵat boiy urdy. Bet-aýzym qanǵa bógip ketti. Tisimdi, murnymdy syndyrdy. Ernimdi jyrdy. Betimdi tildi. Qatty qinaldym. «Balalardy oilasańshy…» dei bergenimde ol meni taǵy da tópelei jóneldi.
Sol oqiǵadan beri úsh ai ótti. Alaida saldary áli ketken joq. Ekinshi dárejeli kontýziia aldym. Sol kózim durys kórmeidi» dedi Baian Esentaeva.
