QR Básekelestikti qorǵaý jáne damytý agenttigi "Ksell" AQ, "Mobail Telekom-Servis" JShS (Tele2/Altel) jáne "KaR-Tel" JShS (Beeline) operatorlaryna qatysty tergep-tekserýdi doǵardy. Atalǵan kompaniialar agenttiktiń sheshimine qarsy sotqa aryzdandy. Esesine, agenttik endi "Qazaqtelekom" AQ-ǵa qatysty osyndai zań buzýshylyq belgileri boiynsha tergep-tekserýdi bastady, dep jazady Dalanews.kz.
"2023 jyly uialy bailanys qyzmetteriniń baǵasynyń ósý faktilerin qaraý aiasynda "Ksell" AQ, "Mobail Telekom-Servis" JShS (Tele2/Altel) jáne "KaR-Tel" JShS (Beeline) operatorlaryna qatysty Kásipkerlik kodekstiń 170-baby boiynsha, tarifterdiń kelisilgen túrde kóterilýine qatysty tergep-tekserýlerdi bastady. Sonymen qatar, uialy bailanys operatorlarynyń tariftik josparlarda bir minýttyq qońyraý qunynyń 18 teńge mólsherinde birdei baǵasyn belgileý áreketterinde quqyq buzýshylyq belgileri anyqtalǵanyna bailanysty, operatorlarǵa osy belgilerdi joiý týraly habarlamalar jiberildi. Habarlamalarda baǵany negizdelgen túrde tómendetý qajettigi kórsetilgen", - deidi agenttiktiń baspasóz qyzmeti.
Qazirgi ýaqytta QR Ákimshilik rásimdik-protsestik kodeksi aiasynda uialy bailanys operatorlary qabyldanǵan sharalarǵa qatysty sot organdaryna shaǵym túsirgen. Osyǵan bailanysty tergeý isteri tiisti sot sheshimderi qabyldanǵanǵa deiin toqtatyldy.
Agenttik 2024 jylǵy 19 qarashada Astana qalasy boiynsha departamenti "KaR-Tel" JShS-ǵa qatysty úi internetiniń jyldamdyǵyn tariftik paketterde tańdaýǵa tutynýshylardy shekteý arqyly ústem jaǵdaidy teris paidalaný belgilerin joiý týraly habarlama joldaǵanyn eske salady.
Sonymen qatar, "Qazaqtelekom" AQ-ǵa qatysty osyndai zań buzýshylyq belgileri boiynsha tergep-tekserý bastaldy.
"2024 jyly baǵanyń ósý faktileri boiynsha agenttik aǵymdaǵy kezeńdegi baǵa dinamikasyna taldaý júrgizedi. Onyń nátijeleri boiynsha zańnamada belgilengen tártippen quqyqtyq shara qoldanylady. Sondai-aq 2024 jylǵy jeltoqsannan bastap tarifterdiń kóterilýi týraly operatorlardyń BAQ-ta jariialanymdaryna bailanysty, Agenttik uialy bailanys operatorlaryna Qazaqstan Respýblikasynyń básekelestikti qorǵaý salasyndaǵy zańnamasyn buzýǵa jol bermeý týraly eskertýler jiberdi", delingen agenttik túsiniktemesinde.
