Depýtat Ermurat Bapi qoǵamǵa qaýip tóndiretin teris dini aǵymdar jóninde málimdedi, dep habarlaidy Dalanews.kz.
"Internet podkastardyń birinde resmi dini qurylymǵa qatysy joq áldebir imam symaq úsh áieli baryn sóz etip, sońǵysyn óziniń shákirtine "syiǵa tartqanyn" jaibaraqat jariia etti. Bul málimdemeni adami moralǵa jat qylyq qana emes, sonymen birge, azamattyq neke jónindegi zańnamany kópe-kórneý buzý, qazirgi Qazaqstandaǵy dástúrli dindi mansuq etý jáne onyń qundylyqtaryna qasaqana nuqsan keltirý dep túsiný kerek. Jalpy adamdy syiǵa tartý adam satý, adam saýdasy sanatyndaǵy qylmys sanalýǵa tiis! Zańdy belshesinen basyp, oiyna kelgen shariǵatyn shatyp otyratyn mundailarǵa tosqaýyl qoiylýy kerek!" - dedi Bapi.
Ol osy podkastyń avtory jýrnalistik etikany, kásibi saliqalyqty saqtamaǵanyn aitty.
"Ekinshi bir kórinis - "Naýryz merekesi Islam dinine jat meiram" degen saqaly bar, murty joq bireýdiń video byljyraǵy. Áleýmettik jelilerdi kezip ketken bul daqpyrt - tabiǵatpen tel týatyn merekeni joqqa shyǵarý ǵana emes, sonymen birge, bizdiń halyqtyń ǵasyrlardan tamyr tartatyn salt-dástúrine, ulttyq mádenieti men biregeiligine kúmán keltirýdiń kebi", - dedi Ermurat Bapi.
Ol Bas prokýrorǵa ún qatyp, astarly máseleni kóterdi.
"Qurmetti Bas prokýror myrza, eldegi dini negizdegi qoǵamdyq jaryqshaq asqynyp ketpesin desek, ákimshilik jazamen ǵana ýshyǵyp bara jatqan jaǵdaidy aýyzdyqtaý azdyq etedi! Ásirese, áleýmettik resýrstar arqyly teris dini nasihat pen dini arazdyqty qozdyrýshy tulǵalardy qylmystyq jaýapkershilikke tartýǵa múmkindik beretin zań normalaryn depýtattar korpýsynyń talqylaýyna usynýdy suraimyn. ...Olardyń ýaǵyzynda Oraza ait pen Qurban aittan basqa meiramdy, tipti memlekettik merekelerdi atap ótý - haram! Týǵan kún, shildehana, tusaýkesý, betashar - haram, eshqaisyn toilaýǵa bolmaidy. Iaǵni bizdiń túrkilik tamyrymyzdan taraityn qundylyqtar olar úshin jat, haram, bóten! Osy rette teris dindar taqýalarǵa suraq qoiǵym keledi: "Aǵaiyndar, bizdiń san ǵasyrlyq ulttyq dástúrlerimiz haram bolsa, Qazaqstan memleketi sizderge týǵan el emes shyǵar?! Ulttyq qundylyqtardy ǵasyrdan ǵasyrǵa saqtap qalǵan qazaqtyń qasietti dalasy sizderge atameken emes bolar?! Endeshe haramy joq, sizder qosh kóretin elge nege qonys aýdaryp ketpeske?! Aldy-artyńa bir ýys topyraq!" - dedi depýtat.
Ermurat Bapidiń sózinshe, qoǵamda dini statýsy kúdikti dúmsheler órip júr.
"Sóz sońynda Qazaqstan musylmandary qaýymdastyǵyna qatysty usynysymdy bildirgim keledi. Buǵan deiin aitylǵan qos dúmsheniń dúrbeleńine qatysty qaýymdastyqtyń din qairatkerleri men dini sheneýnikteri tarapynan qarsy pikir aitylǵanyn estimedim. Tipti, meniń oiymsha, resmi qaýymdastyq syrttan sińgen teris dindarlardan qaimyǵyp, "sen timeseń, men time, badyraq kózdiń" kebin kigen tárizdi. Qarapaiym tilde "DÝMK" dep qysqartylyp atalatyn qaýym óz jumysyn qaita qaraýy kerek dep esepteimin. Olar tsifrlyq keńistikke shyǵyp, el ishi men onlain ortadaǵy dini kikiljińge der kezinde reaktsiia jasap, qoǵamdy zulym ýaǵyzdar qorshaýynda qaldyrmaýǵa tiis!" - dep túiindedi ol.
