دەپۋتات ەرمۇرات باپي قوعامعا ءقاۋىپ توندىرەتىن تەرىس ءدىني اعىمدار جونىندە مالىمدەدى، دەپ حابارلايدى Dalanews.kz.
"ينتەرنەت پودكاستاردىڭ بىرىندە رەسمي ءدىني قۇرىلىمعا قاتىسى جوق الدەبىر يمام سىماق ءۇش ايەلى بارىن ءسوز ەتىپ، سوڭعىسىن ءوزىنىڭ شاكىرتىنە "سىيعا تارتقانىن" جايباراقات جاريا ەتتى. بۇل مالىمدەمەنى ادامي مورالعا جات قىلىق قانا ەمەس، سونىمەن بىرگە، ازاماتتىق نەكە جونىندەگى زاڭنامانى كوپە-كورنەۋ بۇزۋ، قازىرگى قازاقستانداعى ءداستۇرلى ءدىندى مانسۇق ەتۋ جانە ونىڭ قۇندىلىقتارىنا قاساقانا نۇقسان كەلتىرۋ دەپ ءتۇسىنۋ كەرەك. جالپى ادامدى سىيعا تارتۋ ادام ساتۋ، ادام ساۋداسى ساناتىنداعى قىلمىس سانالۋعا ءتيىس! زاڭدى بەلشەسىنەن باسىپ، ويىنا كەلگەن شاريعاتىن شاتىپ وتىراتىن مۇندايلارعا توسقاۋىل قويىلۋى كەرەك!" - دەدى باپي.
ول وسى پودكاستىڭ اۆتورى جۋرناليستىك ەتيكانى، كاسىبي ساليقالىقتى ساقتاماعانىن ايتتى.
"ەكىنشى ءبىر كورىنىس - "ناۋرىز مەرەكەسى يسلام دىنىنە جات مەيرام" دەگەن ساقالى بار، مۇرتى جوق بىرەۋدىڭ ۆيدەو بىلجىراعى. الەۋمەتتىك جەلىلەردى كەزىپ كەتكەن بۇل داقپىرت - تابيعاتپەن تەل تۋاتىن مەرەكەنى جوققا شىعارۋ عانا ەمەس، سونىمەن بىرگە، ءبىزدىڭ حالىقتىڭ عاسىرلاردان تامىر تارتاتىن سالت-داستۇرىنە، ۇلتتىق مادەنيەتى مەن بىرەگەيلىگىنە كۇمان كەلتىرۋدىڭ كەبى"، - دەدى ەرمۇرات باپي.
ول باس پروكۋرورعا ءۇن قاتىپ، استارلى ماسەلەنى كوتەردى.
"قۇرمەتتى باس پروكۋرور مىرزا، ەلدەگى ءدىني نەگىزدەگى قوعامدىق جارىقشاق اسقىنىپ كەتپەسىن دەسەك، اكىمشىلىك جازامەن عانا ۋشىعىپ بارا جاتقان جاعدايدى اۋىزدىقتاۋ ازدىق ەتەدى! اسىرەسە، الەۋمەتتىك رەسۋرستار ارقىلى تەرىس ءدىني ناسيحات پەن ءدىني ارازدىقتى قوزدىرۋشى تۇلعالاردى قىلمىستىق جاۋاپكەرشىلىككە تارتۋعا مۇمكىندىك بەرەتىن زاڭ نورمالارىن دەپۋتاتتار كورپۋسىنىڭ تالقىلاۋىنا ۇسىنۋدى سۇرايمىن. ...ولاردىڭ ۋاعىزىندا ورازا ايت پەن قۇربان ايتتان باسقا مەيرامدى، ءتىپتى مەملەكەتتىك مەرەكەلەردى اتاپ ءوتۋ - حارام! تۋعان كۇن، شىلدەحانا، تۇساۋكەسۋ، بەتاشار - حارام، ەشقايسىن تويلاۋعا بولمايدى. ياعني ءبىزدىڭ تۇركىلىك تامىرىمىزدان تارايتىن قۇندىلىقتار ولار ءۇشىن جات، حارام، بوتەن! وسى رەتتە تەرىس ءدىندار تاقۋالارعا سۇراق قويعىم كەلەدى: "اعايىندار، ءبىزدىڭ سان عاسىرلىق ۇلتتىق داستۇرلەرىمىز حارام بولسا، قازاقستان مەملەكەتى سىزدەرگە تۋعان ەل ەمەس شىعار؟! ۇلتتىق قۇندىلىقتاردى عاسىردان عاسىرعا ساقتاپ قالعان قازاقتىڭ قاسيەتتى دالاسى سىزدەرگە اتامەكەن ەمەس بولار؟! ەندەشە حارامى جوق، سىزدەر قوش كورەتىن ەلگە نەگە قونىس اۋدارىپ كەتپەسكە؟! الدى-ارتىڭا ءبىر ۋىس توپىراق!" - دەدى دەپۋتات.
ەرمۇرات ءباپيدىڭ سوزىنشە، قوعامدا ءدىني ستاتۋسى كۇدىكتى دۇمشەلەر ءورىپ ءجۇر.
"ءسوز سوڭىندا قازاقستان مۇسىلماندارى قاۋىمداستىعىنا قاتىستى ۇسىنىسىمدى بىلدىرگىم كەلەدى. بۇعان دەيىن ايتىلعان قوس دۇمشەنىڭ دۇربەلەڭىنە قاتىستى قاۋىمداستىقتىڭ ءدىن قايراتكەرلەرى مەن ءدىني شەنەۋنىكتەرى تاراپىنان قارسى پىكىر ايتىلعانىن ەستىمەدىم. ءتىپتى، مەنىڭ ويىمشا، رەسمي قاۋىمداستىق سىرتتان سىڭگەن تەرىس ءدىندارلاردان قايمىعىپ، "سەن تيمەسەڭ، مەن تيمە، بادىراق كوزدىڭ" كەبىن كيگەن ءتارىزدى. قاراپايىم تىلدە "دۋمك" دەپ قىسقارتىلىپ اتالاتىن قاۋىم ءوز جۇمىسىن قايتا قاراۋى كەرەك دەپ ەسەپتەيمىن. ولار سيفرلىق كەڭىستىككە شىعىپ، ەل ءىشى مەن ونلاين ورتاداعى ءدىني كيكىلجىڭگە دەر كەزىندە رەاكسيا جاساپ، قوعامدى زۇلىم ۋاعىزدار قورشاۋىندا قالدىرماۋعا ءتيىس!" - دەپ تۇيىندەدى ول.
