Magnum saýda jelisinde jumys isteitin kýrerdiń jumystan shyǵarylýy el azamattary arasynda keńinen talqylanýda. Osyǵan bailanysty saiasattanýshy Jomart Simtikov óz kózqarasyn bildirip, máseleni saiasilandyrýdyń orynsyz ekenin atap ótti, dep habarlaidy Dalanews.kz
Keleńsiz jaǵdai úige zat ákelgen kýrerdiń klientten memlekettik tilde sóileýdi talap etýinen keiin týyndaǵan. Áleýmettik jelilerde san alýan pikirler aityldy.
Sarapshynyń paiymdaýynsha, bul jaǵdaidyń túp negizi – jumys berýshi men qyzmetker arasyndaǵy eńbek qatynasy. Naqtyraq aitsaq, bul – jeke adamdar arasyndaǵy daý, ony memlekettiń til saiasatyna telýge tyrysý artyq.
«Mundai jaǵdailarda máseleni naqty kontekste qarastyrý qajet. Osy oqiǵadan saiasi astar izdeýdiń qajeti joq. Bul – eńbek qatynastary aiasyndaǵy kelispeýshilik, ári onyń sheshimi de osy saladaǵy zańnamalar men korporativtik erejeler sheńberinde tabylýy tiis», – deidi Jomart Simtikov.
Sarapshy máseleniń birneshe mańyzdy aspektisine nazar aýdarady. Birinshiden, biznes pen qoǵam arasyndaǵy senim jáne áleýmettik jaýapkershilik máselesi. Iri kompaniialar tek paida tabýdy ǵana emes, qoǵam aldyndaǵy mindetterin de esten shyǵarmaýy tiis. Bul atalǵan saýda ornyna ǵana emes, barlyq biznes qurylymdarǵa ortaq talap.
«Búgingi tańda kompaniialardyń qorshaǵan ortaǵa, tutynýshylardyń qaýipsizdigine, qyzmetkerlerdiń ál-aýqatyna bei-jai qaramai, joǵary kásibi jáne etikalyq standarttardy ustanýy óte mańyzdy. Qoǵamdyq senim degenimiz – bir kúnde qalyptaspaityn, biraq bir oqiǵamen-aq shaiqalýy múmkin qundylyq», – deidi sarapshy.
Ekinshiden, tutynýshylardyń quqyqtaryn qorǵaý – biznestiń basty mindetteriniń biri. Tutynýshy – kez kelgen kommertsiialyq qurylym úshin eń mańyzdy tulǵa. Olardyń qajettilikteri men quqyqtary únemi eskerilip, ónim men qyzmet sapasy soǵan sai bolýy qajet.
Úshinshiden, qoǵamdyq pikirdiń áseri men áleýmettik medianyń qýaty. Bir qaraǵanda, bir mekemedegi qarapaiym eńbek daýy búkil elge taralyp, qoǵamdyq pikir týǵyzdy. Bul – qazirgi aqparattyq zamannyń jańa qubylystary.
«Qazir kez kelgen másele, tipti lokaldyq deńgeidegi oqiǵa bolsyn, áleýmettik jeliler arqyly búkil qoǵamǵa taralyp, úlken rezonans týdyra alady. Sondyqtan iri kompaniialar men qoǵamdyq institýttar mundai jaǵdailarǵa barynsha muqiiat qarap, ashyq, ári ádiletti sheshim qabyldaýy kerek», – deidi Jomart Simtikov.
Saiasattanýshy ǵalymnyń pikirinshe, osyndai jaǵdailarda basty nazardy saiasi jaǵyna burmalaýdyń jóni joq. Mundai jaittar quqyqtyq jáne kásibi turǵydan sheshim tabýǵa baǵyttalýy kerek. Qoǵamda senimdi saqtaý úshin máseleni ýshyqtyrmai, kerisinshe baiyppen, ashyq túrde sheshý mańyzdy.
Merýert Raiym
