Qazaqstanda aldaǵy úsh jylda eki iri munai óńdeý zaýytyndaǵy úles satylmaq. Bul týraly LS basylymyna Básekelestikti qorǵaý jáne damytý agenttigi málimdegen, – dep habarlaidy Dalanews.kz.
Vedomstvo málimetinshe, jekeshelendirý jónindegi ulttyq ofis strategiialyq áripteske Pavlodar munai-himiia zaýytyn (PMHZ) jáne Atyraý munai óńdeý zaýytyn (AMÓZ) 2028 jylǵa qarai berýdi usynyp otyr.
"PMHZ jáne AMÓZ úlesin satyp alý úshin áleýetti investorlardy izdeý Reformalar jónindegi joǵary keńes 2026-2030 jyldardaǵy jekeshelendirý josparyn bekitkennen keiin júrgiziledi", - dep jazylǵan málimette.
Ashyq naryqqa shyǵarylatyn memlekettik aktivterdiń tizimi 2025 jylǵy 9 maýsymǵa deiin ázirlenip, "Jekeshelendirý agenttigine" usynylýǵa tiis. Qazir bul qujat jekeshelendirý múmkindigin qarastyrý úshin Úkimetke joldanǵan.
Munai óńdeý zaýyttarynan bólek, jekeshelendirýge usynylǵan tizimge "QazMunaiGaz" kompaniiasynyń enshiles jáne táýeldi uiymdary da engizilgen. Alaida bul kásiporyndarǵa qatysty sońǵy sheshim ázirge qabyldanbaǵan.
Al jýyrda Energetika ministrligi Atyraý munai óńdeý zaýytynyń úlesin reseilik «Tatneft» kompaniiasyna satý máselesi qarastyrylyp otyrǵan joq dep málimdedi.
Aita keteiik, Básekelestikti qorǵaý jáne damytý agenttigi tóraǵasynyń birinshi orynbasary Rýstam Ahmetov 2025 jylǵy 17 naýryzda Májilis dálizinde jýrnalistergen suqbatynda AMÓZ men PMÓZ-di jekeshelendirý týraly usynysqa qatysty túsinikteme berdi.
Al keiinirek Qazmunaigaz Atyraý munai óńdeý zaýytynyń úlesin jekeshelendirý máselesine qatysty túsinikteme berdi.
QMG málimetinshe, Pavlodar jáne Atyraý munai óńdeý zaýyttarynyń úlesin jekeshelendirý Básekelestikti qorǵaý jáne damytý agenttiginiń usynysy bolǵan.
"QMG elimizde munai-gaz himiiasy salasyn jan-jaqty damytyp, barlyq óndiris tizbegin birlesip qurý úshin seriktestermen yntymaqtastyq ornatýǵa ashyq kompaniia ekeni belgili. Osyǵan bailanysty alys jáne jaqyn shet elderdiń túrli kompaniialary, sonyń ishinde «Tatneft» JAQ qarastyrylyp otyr", - dep jazylǵan buǵan deiingi habarlamada.
