Esterińizge sala keteıik, bul toptyń quramynda reseılik anestezıolog-reanımatolog, rentgenolog, pýlmonolog syndy mamandar men dárigerler jáne ınfeksıalyq aýrýhananyń qyzmetkerleri bar. Topty Tatarstandaǵy respýblıkalyq klınıkalyq aýrýhananyń bas dárigeriniń birinshi orynbasary Marsel Mınnýlın basqarady.
Óńirge kelgen Tatarstan dárigerleri eki kún boıy shyǵysqazaqstandyq áriptesterine onlaın-konsýltatıv júrgizdi. Kelesi eki aptada reseılik mamandar provızorlyq jáne ınfeksıalyq stasıonarlardyń bólimshelerinde bolyp, medısına qyzmetkerlerine keńes berip, tájirıbelerimen bólisti.
Budan bólek, dárigerler telemedısınany da qoldanyp úlgerdi. Arnaıy chat qurylyp, oǵan Tatarstannyń jetekshi mamandary men Shyǵys Qazaqstannyń dárigerleri qosyldy.
Chatta koronavırýs ınfeksıasynyń aýyr túrin qalaı emdeý kerektigi týraly talqylandy. Aldaǵy ýaqytta Tatarstannan kelgen dárigerler elderine qaıtqan soń da bul chat jumysyn toqtatpaıdy.
Eki apta ishinde provızorlyq stasıonardaǵy naýqasty emdeý mehanızmi kórsetildi. Reseılik mamandar Shyǵys Qazaqstandaǵy aýrýhanalardyń jabdyqtalýy men dári-dármek qorynyń turaqtylyǵyna joǵary baǵalaryn berdi. Aıta keteıik, óńirde tósek qoryn qajetti jabdyqtarmen qamtamasyz etý jumysy alǵa qoıylǵan.
Búgingi kúni ókpeni jasandy jeldetetin 196 qural, 57 sıfrlyq rentgen apparaty men qosymsha ókpeni jasandy jeldetetin 50 apparat pen 10 rentgen apparaty bar. Sondaı-aq 465 konsentrator bar, jýyq arada dál osyndaı 277 qural satyp alynady. Sonymen qatar 200 monıtor, 200 ınfýzomat, 3 EKMO, 178 púlsoksımetr, ókpeni jasandy jeldetetin 12 qural, onyń ishinde 2 balalarǵa (ÓJJQ) arnalǵan, 1 kompúterlik tomograf pen 216 birlik jedel járdem kóligin satyp alý josparlanyp otyr.
– Shyǵys Qazaqstandaǵy dárigerler durys algorıtm boıynsha eńbek etýde. Biz tek olardyń tájirıbesin jaqsartýǵa kómek kórsettik. Qýantarlyǵy sol, bul jaqta dárigerlerdiń bilimin arttyrýǵa, turaqtandyrý qoryn qurýǵa kóp kóńil bólinetindiginde. Munyń bári aýrýdyń kúzdegi maýsymdyq tolqyny kezinde kádege jaraıdy. Eń bastysy – provızorlyq stasıonarlar jedel qyzmet kórsetedi. Olar aldyńǵy shepte eńbek etedi. PTR men KT testteri qortyndysynyń tez arada daıyn bolýy dárigerlerge dıagnozdy anyqtap, em jasaýǵa septigin tıgizedi, – dedi Marsel Mınnýlın.
Aımaq basshysy tatarlyq jáne shyǵysqazaqstandyq dárigerlerdiń ortaq tájirıbesi negizinde arnaıy tehnologıalyq qujat ázirlenetinin atap ótti. Keıin osy qujat boıynsha emdeý júrgiziledi.
Danıal Ahmetov Tatarstannan kelgen dárigerlerdi bir aıdan soń bizdiń óńirge qaıta kelip, taǵy bir márte tájirıbelerimen bólisýge shaqyrdy.
