Atyraý oblysyna jumys saparymen kelgen «Qazaq onkologiia jáne radiologiia ǵylymi-zertteý institýtynyń» direktory, meditsina ǵylymdarynyń doktory, professor, Ulttyq ǵylym akademiiasynyń akademigi Diliara Qaidarova Atyraý oblysy ákiminiń orynbasary Baqytgúl Hamenovanyń qatysýymen ótken úilestirý keńesi otyrysynda Atyraýda sońǵy tórt jylda onkologiialyq aýrýdyń tirkelý dinamikasynda báseńdeý baryn atap ótti.
– Oń kórsetkish sońǵy jyldary salanyń 26 kadrmen tolyǵýyna da bailanysty. Buryn naýqastar em alý úshin Almatyǵa kelip qaralatyn bolsa, qazirgi ýaqytta onkologiialyq aýrýǵa shaldyqqan emdelýshilerge joǵary sapaly kómek jergilikti meditsinalyq oryndarda da kórsetip otyr. Atyraýdyń meditsinalyq mekemeleri sońǵy úlgidegi qurylǵylarmen jabdyqtalǵan. Jáne hirýrgiialyq kúrdeli ota jasaýǵa da múmkindikter bar, – dep atap ótti ol.
Atyraý oblysy Densaýlyq saqtaý basqarmasy basshysy Ashan Baidýalievtiń aitýynsha, Atyraýda sút bezi, ókpe obyry, asqazannyń qaterli isigi aýrýlary jii kezdesedi.
Atap óterligi, Atyraý oblysynda barlyq meditsinalyq mekemeler ortaq júiege qosyldy. Bul júie qala, aýdandardaǵy tomografiia, rentgendik zertteýlerdiń qorytyndylaryn ortaq bazada jinaqtap, zerdeleýge múmkindik beredi. Jáne qaterli isikterdi búginde Atyraýda jasandy intellekt kómegimen anyqtaýǵa múmkindik jasalǵandyǵy aimaq meditsinasy úshin úlken jańalyq.
– Jasandy intellekt qaterli isikterdi meiilinshe erte merzimde anyqtaýǵa múmkindik beredi. Biz obyrǵa shaldyqqan naýqastyń ómir súrý uzaqtyǵyn keminde 5-6 jylǵa soza alsaq, munyń ózi úlken jetistik, – dep naqtylady Atyraý oblysy densaýlyq saqtaý basqarmasy basshysy Ashan Baidýaliev.
Eske sala ketelik, Qazaqstanda qaterli syrqatqa qarsy skriningtik tekserýler 25 jastan bastalady.
Áielder arasynda jatyr moiyny obyryna qarsy tekserý 30-35 jasta, sút bezi obyryna qarsy tekserý 50-60 jas aralyǵynda, erler arasynda qýyq bezi obyryna qarsy meditsinalyq skrining 50-54, 58-62 jas aralyǵynda ótkiziledi.
Asqazan, óńesh obyryna qarsy tekserý er, áiel adamdar úshin de 50 jastan bastalady. Al, baýyr obyryna qarsy tekserýden patsient kez kelgen jasta óte alady.
Atyraý oblysynda onkologiialyq esepte 4500 naýqas tur. Sońǵy bir jylda qaterli isik 1150 adamnan anyqtalǵan.
Atyraý oblysyna jumys sapary aiasynda Qazaq onkologiia jáne radiologiia ǵylymi-zertteý institýtynyń mamandary Atyraý oblystyq onkologiialyq dispanserine arnaiy baryp ondaǵy naýqastardy emdeý boiynsha konsýltatsiialyq keńester berdi jáne jergilikti dárigerler úshin sheberlik sabaqtaryn ótkizdi.
Aidyn KAKIMOV, Atyraý oblysy.
