Ol, salystyrmaly túrde, muny basqalar alǵa ilgerilep, sony úlgidegi kólik minip júrgende seniń astynda qaqalyp-shashalǵan eski-qusqy «Zaporojdyń» bolýyna teńeidi. «Artta qalǵan» degen sóz jai bergi jaǵy, sol eskirgen GES-terimiz qystaǵy Ekibastuzdyń jylý júieleri sekildi syr berip júrmese deseńiz, árine onyń betin aýlaq qylsyn», - deidi Ahmetkárim Qurmanǵazin.
«Kórip otyrǵandaryńyzdai, jyl ótken saiyn tehnika, tehnologiia qaryshtap damyp, kúndelikti turmys-tirshiligimizge dendep enip jatyr. Adam tutynysyndaǵy barlyq tehnika energiiany qajet etedi. Ony aitasyz, tipti energiiamen jylynatyn bútin turǵyn úi keshenderi de bar bizde qazir.
«Jyly eden» degen de áldeqashan sánge ainalǵan. Osynyń barlyǵy energiia tutynysyna degen salmaqty arttyryp jatyr.
Biraq, soǵan sai energetika óndirisi kesheni bizde múlde jańarmaǵan. Salystymaly túrde aitsaq, bul qazir kóp mensine bermeitin eski «Zaporoj» kóligimen júrgen sekildi ǵoi. Negizinen, aqiqaty osy. Sondyqtan osy sala mamany retinde men atom elektr stansasy bar elderge qyzyǵa ári qyzǵana qaraimyn», - deidi ol.
Ardager maman óz zamanynda bul salada ómir burq-sarq qainap jatatynyn eske alady. Ol kezde onyń paidasy bolǵanymen, búginderi, ókinishke qarai, odan túk qyzyq joq.
«Bizdi bir ornymyzda kóp turalatpaityn. Sibirdiń jarty ai, bir-eki ai kún bolmaityn óńirlerinde de bolyp, tájiribe almasyp jatatynbyz. Ony ákelip, ózimizde qoldanýǵa qam jasaitynbyz. Árine, Táýelsizdik alǵan egemen elimizge alys sheteldermen tájiribe almasý múmkindigi týǵan shyǵar. Biraq, odan paida ne?
Olardyń tájiribesin bizge ákelip bárin birdei qoldana alamyz ba? Joq, árine. Jańany eskige qalai paidalanasyz? Sodan keiin de ásirese tehnika men tehnologiia boiynsha myqty-myqty mamandardan aiyrylyp qalyp jatyrmyz. Shetelge ketip jatyr barlyǵy.
Energetika salasyndaǵy qyzmetkerler, árine ózine júktelgen jumysty isteidi, biraq onyń mashaqaty kóp bolyp tur. Olar da jańa dúniemen jumys istegisi keledi, maman retinde damyǵysy keledi. Biraq eskimen qaida barasyz?», - deidi ol.
Sala mamany AES qurylysy degende adamdar boiynda uialaǵan úrei - qoǵamda keńinen taralǵan jemqorlyq máselesine de qatysty óz oiymen bólisti.
- Jemqorlyq – Qazaqstanǵa ǵana tán dúnie desek jańylysamyz. Aq pen qara, jaqsy men jaman sekildi qatar júretin qubylys qoi ol qoǵamdaǵy. Árine, shek pen shekara bolý kerek. Bizde asyra silteýge jol berilgen. Ásirese, táýelsizdik alǵan tustarda, kapitalizmniń iisi murynǵa barmaityn kezde.
Qazir zaman damyp jatyr. Qundylyqtar da jańǵyrýda. Birer on jyl buryn «ýaqyt – aqsha» dese, kóbisi kúletin. Qazir ýaqyt valiýtaǵa ainalǵan zaman. Onyń ústine 4G, 5G degen keldi bizge.
Meniń túsinigimde, bul – ashyq memleket, ashyq qoǵam, ashyq ekonomika. Qazir bolǵan nárse qolyńyzdaǵy telefonda sairap, kórsetilip jatady. Buryn jasyryp, jamap-jasqaýǵa bolatyn. Qazir ol jaǵy, ózderińizge málim, qiyndap barady. Bir sózben aitqanda, bedelińiz bolsa, jumys ta aqsha da keledi sizge. Al bedel tússe, túk joq sizge. Soǵan aqyryndap kele jatyrmyz ózi. AES degen bir mezette úi turǵyzǵan sekildi salyna salatyn nárse emes, ókinishke qarai. Oǵan kóp jyldar kerek. Ashyq qoǵamǵa aiaq bastyq qoi, AES salynyp bitedi degenshe, ol jaǵy da ilgerilei beredi dep oilaimyn, - deidi A. Qurmanǵazin.
Sondai-aq maman jemqorlyq dese, Almatyda qurylysy bastalyp, biraq jyldar boiy turalap turǵan kópirler, metro esine túsetinin aitady.
«Kezinde elimizde kópirlerdiń qurylysy turalap turdy. Metro da saqaldy qurylysqa ainaldy. Mine, osylardy jemqorlyqtyń kózi dep toqtatyp salsaq, ne bolar edi?.. Almatyda búginderi kólikter alasapyrany oryn alar ma edi, qalai? Burynǵydai emes, qazir kópir qurylysy jyldam júrýde. Metro qalanyń kórikti nysany, adamdarǵa dittegen jerine jyldam jetýdiń balamaly quraly bolyp, bizde damý baryn ózgelerge baiqatyp qalyp jatady. Sol sekildi ǵoi, menińshe, jemqorlyq bar dep AES qurylysyn tusaýlasaq, odan biz utylmasaq utpaimyz», - deidi ol.
