Halyqaralyq valúta qorynyń esebi boıynsha, AQSH esep-shottarynda aýǵan ortalyq bankine tıesili 9 mlrd dollar bar.

Wall Street Journal gazetiniń jazýynsha, Djo Baıden ákimshiligi ótken aptada Aýǵanstanda dollarlar qolma-qol alynyp jatqan kezde buǵattap tastaǵan.

Jaǵdaı ózgerýi múmkin. Vashıngton Aýǵanstannyń jańa bıligin moıyndaýy múmkin. 1990 jyldary "Talıban" qozǵalysy Aýǵanstannyń basym bóligin bılegen kezde, onyń úkimetin úsh el ǵana moıyndaǵan. Arasynda AQSH bolmaǵan.

Aq úıdiń ulttyq qaýipsizdik boıynsha keńesshisi Djeık Sallıvan qazirgi bılikti moıyndaýǵa áli tym erte dep málimdegen. Ol bul másele tálipterdiń ózderine baılanysty degen.

Halyqaralyq qaýymdastyq moıyndaǵan Aýǵanstan prezıdenti Ashraf Ǵanı elinen qashyp ketti. Qazir onyń birinshi vıse-prezıdenti Amrýlla Saleh zańdy memleket basshysymyn dep málimdedi.

Eýropalyq odaq ta qazir Aýǵanstandaǵy jaǵdaıdy tek baqylap otyr. Eýroodaqtyń syrtqy saıasat jónindegi mekemesiniń basshysy Jozep Borrel eger tálipter adam quqyǵyn syılap, aýǵan aýmaǵyn terrorıster úshin paıdalanbaıtyn bolsa, olarmen jumys isteýge daıynbyz dep málimdedi.

Reseı syrtqy ister mınıstri Sergeı Lavrov ta tálipter bıligin ázirge birjaqty moıyndamaıtynyn jetkizdi. Biraq Máskeý úmit artatyndaı belgiler baıqap otyrǵanyn málimdedi.

Al Qytaı Aýǵanstanda jaǵdaı rettelse, jańa bılikti moıyndaýymyz múmkin dedi.

"Talıban" qozǵalysynyń ókilderi Kabýlde alǵashqy baspasóz máslıhatyn ótkizdi. Onda olar ózderiniń qarsylastaryn, amerıkalyq áskermen jumys istegen azamattardy qýdalamaýǵa ýáde berdi. Terorıstik toptarmen jáne esirtki tasymaldaýshylarmen kúresetinin, áıelder quqyǵyn "sharıǵat zańyna" sáıkes qorǵaıtynyn jetkizdi.

Tálipter sonymen birge Reseı, Qytaı jáne Pákistanmen jaqsy qarym-qatynasta ekenin, birde-bir elmen qarsylasýǵa umtylmaıtynyn jetkizdi.

Ázirge Kabýl áýejaıyn AQSH áskeri baqylap tur. Olar batys elderiniń azamattaryn, dıplomatıalyq qyzmetkerlerdi shyǵarýdy jalǵastyryp jatyr. Onda sonymen birge elden shyǵyp ketýge asyqqan myńdaǵan aýǵan turǵyny da júr.