«Aýyl amanaty» – biyl 14 sáýirde qabyldanǵan «Halyqtyń tabysyn arttyrýdyń 2025 jylǵa deiingi baǵdarlamasy» keshendi josparynyń qosalqy baǵdarlamasy. Bul jobanyń negizgi maqsaty — aýyl sharýashylyǵy taýaryn óndirýshilerdi jan-jaqty qoldaý, aýyl turǵyndaryn agrarlyq bizneske barynsha tartý, azyq-túlik qaýipsizdigine jáne azamattardyń ómir súrý sapasyn jaqsartýǵa bailanysty máselelerdi sheshý.
Partiia Hatshysy Eldar Jumaǵazievtiń aitýynsha, jobada kózdelgen maqsattarǵa jetkizý úshin partiia janynan arnaiy jobalyq keńse iske qosylyp, naqty algoritm ázirlenedi.
«Jańa ádisteme árbir eldi mekenniń geografiialyq ereksheligi, jer, sý, eńbek, qarjylyq, ózge de resýrstar boiynsha sandyq kórsetkisherin jinaýǵa baǵyttalady. Osylaisha, árbir aýyldyń ekonomikalyq mamandaný baǵytyn anyqtaýǵa, atap aitqanda qai óńirde qandai aýyl sharýashylyǵy ónimin ósirýge nemese óndiristiń túrlerin ashýǵa bolatynyn kórsetedi. Aýyldyq jerlerdi aralaý jalpy 7,7 million turǵyndy qamtityn 2400 aýyldyq okrýgte júrgiziledi», - dedi Eldar Jumaǵaziev.
Spiker «Aýyl amanaty» jobasy aiasynda Úkimet pen ákimdikter iri saýda jáne óndiristik kompaniialardyń, ónimdi importqa shyǵaratyn elderdiń óndiriletin taýarlarǵa degen talaptaryn zerdelep alý kerek dep sanaidy. Bul jobaǵa qatysyp, memlekettik qoldaý alýshylarǵa ónim óndirý barysynda basymdyq beretin salalardy anyqtaýǵa kómektesedi.
Sonymen birge, halyqtyń tabysyn arttyrýdyń mańyzdy tetikteriniń biri – turǵyndarǵa ónim óndirýdiń tehnologiialyq tsiklderin úiretý.
«Joba sheńberinde TjKB bazasynda tutynýshylardyń talaptaryna jaýap beretin ónim óndirýdiń tehnologiialyq kartasyn oqytatyn quzyrettilik ortalyqtarynyń tutas jelisin uiymdastyrý josparlanýda. Bul óndiris tiimdiligin arttyryp, óndiriletin ónimdi ótkizý protsesin jeńildete alady», - dedi partiia janyndaǵy jobalyq keńseniń basshysy Nurlybek Muqanov.
«Aýyl amanaty» jobasynyń negizgi mindetteriniń biri – oraý, temperatýralyq saqtaý siiaqty qajetti pýnktterdi engize otyryp, «egistikten sórege deiin» qaǵidaty boiynsha ótkizý tizbekteriniń jappai jelisin qalyptastyrý.
«Osy jumystardyń barlyǵyn júieli uiymdastyrý úshin elimizdegi barlyq salalyq baǵdarlamany biriktire otyryp, kásipkerlikti damytýdy qoldaýdyń biryńǵai ulttyq baǵdarlamasyn qabyldaý kerek. Bul algoritmde kásibin ashqan azamattarǵa salyqtyq jeńildikter berý, biznesti ǵylymmen bailanystyrý, kásipkerlikti qarjylandyrýdy qaita qaraý sekildi mańyzdy máseleler kórsetiledi», - dedi Eldar Jumaǵaziev.
