2024 jyldyń 17-18 qazan kúnderi aralyǵynda «Pedıatrıa jáne balalar hırýrgıasynyń jetistikteri men damý bolashaǵy» atty QAZAQSTAN BALALAR DÁRİGERLERİNİŃ H SEZİ jáne «Jas zertteýshi: zamanaýı pedıatrıa jáne balalar hırýrgıasynyń syn-tegeýrinderi men damý bolashaǵy» atty jas ǵalymdardyń halyqaralyq ǵylymı-tájirıbelik konferensıasy ótti.
Tórt jylda bir ret ótkiziletin shara bıyl 4500-den asa balalar dárigerleriniń basyn qosty. Sharanyń basty maqsaty - elimizdegi pedıatrıalyq qyzmettiń jetistikteri men damý bolashaǵyn saralaý, pedıatrıa jáne balalar hırýrgıasy salasyndaǵy ózekti máselelerdi kóterý, sheshýjoldaryn qarastyrý, jas ǵalymdardyń ǵylymı áleýetin arttyrý, pedıatrıa jáne balalar hırýrgıasy salasyndaǵy ınovasıalar boıynsha jas ǵalymdar arasynda tyǵyz halyqaralyq qarym-qatynasty ornatý, jas mamandardy ǵylymmen aınalysýǵa shaqyrý.
QR Densaýlyq saqtaý mınıstrligi, Pedıatrıa jáne balalar hırýrgıasy ǵylymı ortalyǵy, «Pedıatrlar Odaǵy» qoǵamdyq birlestigi men S.J.Asfendıarov atyndaǵy Qazaq ulttyq medısına ýnıversıtetiniń uıymdastyrýymen ótken Qazaqstan balalar dárigerleriniń H sezine Italıa, Polsha, Qyrǵyzstan, Ózbekstan, Tájikistan, Ázirbaıjan, Reseı, Belarýs jáne t.b. alys jáne jaqyn shetelderden pedıatrıa jáne balalar hırýrgıasy salasynyń jetekshi ǵalymdary men sarapshylary, sonymen qatar elimizdiń ár óńirinen túrli beıindegi pedıatrlar men balalar hırýrg-dárigerleri qatysty. Basqosý offlaın jáne onlaın túrinde ótti.
Mereıtoılyq alqaly basqosýdyń ashylý saltanaty Qazaqstan Respýblıkasynyń Densaýlyq saqtaý mınıstri Aqmaral Álnazarovanyń, Ana men bala densaýlyǵyn qorǵaý departamentiniń dırektory Maǵrıpa Embergenovanyń, S.J.Asfendıarov atyndaǵy Qazaq ulttyq medısına ýnıversıtetiniń ókili, klınıkalyq blok boıynsha prorektory Svetlana Sultanǵazıevanyń jáne Pedıatrıa jáne balalar hırýrgıasy ǵylymı ortalyǵynyń Basqarma tóraǵasy Abaı Qusaıynovtyń alǵy quttyqtaý sózimen ashyldy.
- «Búgin Qazaqstan balalar dárigerleriniń alǵashqy seziniń ótkenine – 50 jyl. 1974 jyly alǵashqy balalar dárigerleriniń birinshi sezi ótti. Búgingi tańda osy atalǵan sátten estelik retinde tek qana fotosýret saqtalǵan, biraq sıeziń rýhy, onyń qaǵıdattary men mindetteri ózgerissiz qaldy. Búgin bul zalǵa jınalǵan barlyq dárigerlerdi bir maqsat biriktiredi – ol elimizdiń eń kishkentaı azamattarynyń densaýlyǵyn saqtaý men jaqsartý, óıtkeni elimizdiń bolashaǵy bizdiń balalarymyzdyń densaýlyǵyna baılanysty. Búgingi mereıtoılyq shara 500-den astam balalar dárigerleriniń basyn qosty, taǵy 3000-nan astam dáriger bizdi búgin onlaın tyńdap otyr. Zalda óz jumysynyń nátıjelerimen bólisýge daıyn sheteldik áriptesterimizdi de kórý erekshe qýantady. Pedıatrıalyq qyzmettiń bolashaǵy turǵysynan aǵa býyn áriptesterinen bilim alyp, tájirıbe jınaıtyn jáne óz tájirıbelerin jetildiretin kóptegen jas mamandar jigerlendiredi. Sıez qorytyndysy boıynsha qabyldanǵan qarar elimizdiń pedıatrıalyq qyzmetin odan ári damytýǵa jańa serpin beredi dep senemin!», dep atap ótti alǵy sózinde Pedıatrıa jáne balalar hırýrgıasy ǵylymı ortalyǵynyń Basqarma tóraǵasy Abaı Qusaıynov. A.Z.Qusaıynov sonymen qatar, arnaıy baıandama jasap, Qazaqstan Respýblıkasyndaǵy pedıatrıalyq qyzmettiń búgingi jaǵdaıymen bólisti.
Óziniń quttyqtaý sózinde Densaýlyq saqtaý mınıstri Aqmaral Álnazarova Densaýlyq saqtaý mınıstrliginiń balalarǵa medısınalyq kómek kórsetý sapasyn arttyrýǵa baǵyttalǵan birqatar mańyzdy bastamalaryn atap ótti.
- «Ana men bala densaýlyǵyn qorǵaý memleket pen Qazaqstannyń densaýlyq saqtaý júıesiniń basym mindetteriniń biri bolyp tabylady. Eldiń bolashaǵy — jas urpaqtyń densaýlyǵyna baılanysty. Sońǵy 10 jylda elimizde balalar ólim-jitim kórsetkishi azaıyp keledi. Dene salmaǵy óte tómen balalardyń ómir súrý deńgeıi 4 esege artty. Bul elimizdegi 5000-nan asa pedıatr dárigerleriniń kúndelikti jankeshti eńbekteriniń nátıjesi, sondaı-aq, tıimdi perınataldyq tehnologıalardy engizýdiń, DDU usynǵan qaýipsiz ana bolý qaǵıdattarynyń, neonataldy reanımasıany damytýdyń, az ınvazıvti tehnologıalardy engizýdiń, joǵary tehnologıalyq medısınalyq kómektiń jáne balalar kardıohırýrgıasy men balalar neırohırýrgıalyq kómegin damytýdyń arqasynda múmkin boldy», - dedi QR Densaýlyq saqtaý mınıstri A.Álnazarova.
Elimizdiń jáne shet eldiń balalar dárigerleriniń basyn qosqan sıeziń bedeldi alańynda balalardaǵy aýrýlardy emdeý men dıagnostıkalaýdyń zamanaýı ádisteri, balalar hırýrgıasyndaǵy ózekti máseleleri, pedıatrıa jáne balalar hırýrgıasyn damytýdyń ǵylymı jáne praktıkalyq aspektileri, pedıatrıalyq kadrlardy daıarlaý máselesi, balalardaǵy onkologıalyq jáne gematologıalyq aýrýlardy dıagnostıkalaý men emdeýdiń zamanaýı tehnologıalary, sırek kezdesetin aýrýlardy erte dıagnostıkalaý, emdeý, ońaltý, asqynýlardyń aldyn alý jáne tirkeý máseleleri jáne t.b. pedıatrıa jáne hırýrgıa salasyna qatysty ózekti máseleler talqylanyp, ǵylymı jobalar usynyldy jáne praktıkadaǵy erekshe klınıkalyq jaǵdaılar ortaǵa salyndy. 12 ǵylymı sesıada barlyǵy 121-den astam baıandamalar tyńdaldy. Baıandamalardyń taqyryptar aýqymy keń. Balalarǵa medısınalyq kómek kórsetýdi uıymdastyrý aspektileri men alǵashqy medısınalyq-áleýmettik kómek deńgeıinde balalarǵa medısınalyq qyzmet kórsetýdi jaqsartý máselelerinen bastap, balalardaǵy aýrýlardy dıagnostıkalaý men emdeýdiń zamanaýı ádisterine deıin qamtıdy.
Sıez aıasynda 18 qazan kúni doktoranttarǵa, magıstranttar men rezıdentterge arnalǵan «Jas zertteýshi: zamanaýı pedıatrıa jáne balalar hırýrgıasynyń syn-tegeýrinderi men damý bolashaǵy» atty jas ǵalymdardyń halyqaralyq ǵylymı-tájirıbelik konferensıasy ótti.
Jas ǵalymdardyń ǵylymı áleýetin arttyrý, densaýlyq saqtaýdy damytýdyń memlekettik baǵdarlamasyn júzege asyrýda jas dárigerlerdiń rólin arttyrý maqsatynda konferensıada elimizdiń jáne shet elderdiń JOO men ǵylymı-zertteý ınstıtýttarynda rezıdentýrada, magıstratýrada jáne PhD doktorantýrada oqıtyn jas ǵalymdardyń jarıalanymdary, aýyzsha jáne posterlik baıandamalary usynyldy. Ǵylymı jobalardy pedıatrıa jáne hırýrgıa salasynyń bilikti mamandarynan quralǵan qazylar alqasy saralady. Ǵylymı konferensıaǵa usynylǵan baıandamalar úsh atalym boıynsha anyqtalyp, arnaıy dıplomdarmen marapattaldy. Atap óte keteıik, bıyl otandyq pedıatrıanyń korıfeıleri: akademık Mashkeev Áýken Qıasuly men balalar onkogematologıa qyzmetiniń negizin qalaýshy Kúlán Omarqyzy atyndaǵy arnaıy syılyq taǵaıyndaldy.
Shara aıasynda úsh sheberlik sabaq: «Pedıatrıalyq tájirıbedegi kapsýlalyq endoskopıa», «Leıkemıany dıagnostıkalaýdaǵy MRD PCR real time róli. Zertteý nátıjelerin túsindirý» jáne «Balalar men jas eresekterdegi gematologıalyq aýrýlardyń morfologıalyq dıagnostıkasy», sonymen qatar «Qysqa ishek sındromy, terapıa jáne dınamıkalyq baqylaý máseleleri» taqyrybynda dóńgelek ústeli (18 qazan kúni) ótti.
Aıtýly shara balalarǵa medısınalyq kómek kórsetý júıesin jetildirýge, pedıatrıalyq kómekti odan ári damytýǵa jańa qýatty serpin beretinine senimdimiz.
Sıez sońynda arnaıy rezolúsıa shyǵarylyp, pedıatrıa salasynyń negizgi máseleleri naqtylanyp, damý bolashaǵy aıqyndaldy.
