Densaýlyq saqtaý mınıstri Aqmaral Álnazarova Almatydaǵy poıyzda gazdan ýlanǵan adamdardyń jaǵdaıyna qatysty málimet berdi, dep habarlaıdy Dalanews.kz.

Mınıstrdiń aıtýynsha, oqıǵa ornyna jedel járdemniń 13 brıgadasy jumyldyrylǵan.

“Barlyǵy 53 adam, onyń ishinde balalar zardap shekti. Olardyń bári der kezinde qalalyq stasıonarlardyń qabyldaý bólimderine jetkizilip, tekserýden ótti jáne qajetti medısınalyq kómek kórsetildi”, — dedi Álnazarova.

Tekserý nátıjesinde 11 balany aýrýhanaǵa jatqyzý týraly sheshim qabyldanǵan.

“Eki bala jansaqtaý bóliminde jatyr, qalǵandary tıisti profıldik bólimshelerde mamandardyń baqylaýynda”, — dep naqtylady mınıstr.

Qalǵan jolaýshylar tekserýden keıin ambýlatorlyq em alýǵa úıine jiberildi. Álnazarova mınıstrlik jaǵdaıdy baqylaýda ustap otyrǵanyn, Almaty qalasyndaǵy medısınalyq uıymdarmen turaqty baılanysta ekenin jetkizdi.

“Barlyq naýqasqa tolyq kólemde medısınalyq kómek kórsetilip jatyr. Dárigerler olardyń jaǵdaıyn turaqty baqylap otyr. Qaýipsizdik pen oń dınamıkany qamtamasyz etý úshin barlyq qajetti resýrstar tartylǵan. Zardap shekkenderdiń tezirek saýyǵyp ketýin tileımin”, — dedi ol.

Poıyzdaǵy jappaı ýlanýdan keıin polısıa oqıǵa boıynsha qylmystyq is qozǵady.

“Osy derek boıynsha Almaty-1 stansasyndaǵy jelilik polısıa basqarmasy Qylmystyq kodekstiń 156-baby – “Eńbekti qorǵaý qaǵıdalaryn buzý” faktisi boıynsha qylmystyq is tirkedi. Qazir oqıǵanyń barlyq mán-jaıyn anyqtaý úshin qajetti tergeý sharalary júrgizilip jatyr. Tergeý nátıjesi boıynsha zańǵa sáıkes prosesýaldyq sheshim qabyldanady. Ózge aqparat jarıa etýge jatpaıdy”, — dep habarlady vedomstvo.

Eske salaıyq, 11 jeltoqsanda Almatyda poıyzda 50-den asa adam gazǵa ýlanyp qalǵany týraly jazǵan edik.

"Jolaýshylar tasymaly" AQ aqparatyna súıensek, bul poıyz quramy jeke menshik tasymaldaýshyǵa tıesili, al vagondar kınostýdıaǵa túsirilim júrgizý úshin ýaqytsha berilgen.