Qostanai oblysy boiynsha UQK departamenti oblystyq densaýlyq saqtaý basqarmasy basshysynyń orynbasary Erbolat Dospanovty qyzmettik ókilettigin asyra paidalandy degen kúdikpen ustady, dep habarlaidy Dalanews.kz Kazinform-ǵa silteme jasap.
Alǵashqy aqparat áleýmettik jelilerde taraǵannan keiin, jaǵdaiǵa qatysty túsinikteme Qostanai oblystyq prokýratýrasynyń baspasóz qyzmetinen berildi.
"Qostanai oblysy boiynsha KNB departamenti oblystyq densaýlyq saqtaý basqarmasy basshysynyń orynbasary E. Dospanovtyń ustalǵanyn habarlady. Ol qyzmettik ókiletin asyra paidalaný faktisi boiynsha tirkelgen qylmystyq is aiasynda kúdikti retinde tanyldy", - delingen resmi málimdemede.
Vedomstvo dereginshe, sot Dospanovqa qatysty bultartpaý sharasyn, iaǵni qamaýǵa alý túrinde sanktsiialaǵan.
Qylmystyq istiń ózge mán-jaiy jariia etilmeidi. Sebebi Qylmystyq-protsessýaldyq kodekstiń 201-babyna sáikes, sotqa deiingi tergeý materialdary jariia etýge jatpaidy.
Eske sala keteiik, buǵan deiin Qostanai oblysynyń densaýlyq saqtaý basqarmasynyń burynǵy basshysy Daniiar Jandaev ta sybailas jemqorlyqqa bailanysty kúdikpen ustalǵan.
