Qazaqstanda Qytaidan kólik jetkizip berýshi kompaniianyń áreketinen shamamen 60 adam zardap shekkenin málimdep otyr, dep habarlaidy Dalanews.kz KTK telearnasyna silteme jasap.
Zardap shekken halyqtyń aitýynsha, olar avtokólikterge tolyq aqy tólegen, biraq kólikterin ala almaǵan. Kompaniia menedjerlerimen bailanysýǵa tyrysqanda jaýap berýdi toqtatqan, al firmanyń negizin qalaýshysy, jábirlenýshilerdiń sózinshe, shetelge qashyp ketken.
Aldyn ala esep boiynsha, avtodiler klientterine 1 milliard 200 million teńge qaryz. Bir apta buryn avtosalonda satylymdaǵy kólikter turǵan, al qazir ǵimarat bos: kólikter men qural-jabdyqtar shyǵarylyp áketilgen, esikter jabylyp, mór basylǵan.
Zardap shekkenderdiń biri – Ilia Pogojev. Ol jubaiymen birge úsh jyl boiy 12 million teńge turatyn qytai krossoverine aqsha jinaǵan. Baǵany tómendetý úshin avtodiler kólikti Qorǵastan tikelei tapsyryspen alýdy usynǵan. Alaida arada eki ai ótse de, mashina jetkizilmegen.
«Kompaniianyń quryltaishysy B.E. ózi habarlasyp, qazir kedende problema týyndaǵanyn aityp, kóligińizdi jaqynda ákelemiz dep eskertken. Al ótken aptadaǵy beisenbi-juma kúnderinen bastap múlde bailanysqa shyqpai qoidy: qońyraýlar jetpeidi, habarlamalar jaýapsyz», – deidi jábirlenýshi.
Zardap shekkender – Qazaqstannyń jeti qalasynyń turǵyndary. Olardyń barlyǵy óz aqshasyn qaitarýǵa tyrysqan. Alaida menedjerler ún qatpai qoiǵan. Jábirlenýshilerdiń aitýynsha, kompaniianyń quryltaishysy qazir Ystambulda bolýy múmkin, biraq politsiia bul aqparatty rastamai otyr.
«Bul derek boiynsha Jetisý aýdany politsiia basqarmasy Qylmystyq kodekstiń 190-babynyń 4-bóligi – asa iri kólemdegi alaiaqtyq boiynsha qylmystyq is tirkedi. Qazirgi ýaqytta istiń jan-jaqty, tolyq ári obektivti qarastyrylýyn qamtamasyz etýge baǵyttalǵan jedel-izdestirý sharalary júrgizilip jatyr. Tergeý nátijesi boiynsha protsessýaldyq sheshim qabyldanady», – dep habarlady politsiia departamenti.
Ózin zardap shekkenderdiń qataryna jatqyzatyndar tek klientter ǵana emes. Daýdyń kesirinen kórshi avtosalon da qiyn jaǵdaiǵa tap bolǵan. Onyń keńsesi men avtoturaǵy dál osy aýmaqta ornalasqan. Qyzmetkerlerdiń aitýynsha, kelýshiler kompaniialardy jii shatastyryp júr.
Klientter jańa kólikterin kútýden úmit úzgen. Endi eń bolmasa aqshalaryn qaitaryp alýǵa úmittenedi. Sonymen birge qolyna timegen kólikter úshin alǵan kreditterdi qalai óteitinderin oilap otyr.
