"STOP-trafik" jedel aldyn alý sharasy aiasynda kámeletke tolmaǵandarǵa qatysty qylmystardy qosa alǵanda, adam saýdasynyń 39 deregi anyqtaldy. Operatsiia barysynda jańa týǵan sábilerdi satý, májbúrli eńbek jáne seksýaldyq qanaý shemalarynyń joly kesilgen, dep habarlaidy Dalanews.kz.
Almatyda náreste saýdasyna qatysy bar top ustaldy. Jas áielderdi aqsha berý arqyly balalaryn úshinshi tulǵalarǵa tapsyrýǵa itermelegen. Bul derekter boiynsha 20-dan astam qylmystyq is qozǵalyp, kúdiktilerge múlkin tárkileýmen birge 18 jylǵa deiin bas bostandyǵynan aiyrý jazasy qarastyrylǵan.
Abai oblysynda májbúrli eńbekpen ainalysqan jeli anyqtalyp, 11 qylmystyq is tergelip jatyr. Shymkent, Aqtóbe, Jambyl, Batys Qazaqstan, Qaraǵandy jáne Qostanai oblystaryndaǵy túngi oryndarda azamattardy, onyń ishinde kámeletke tolmaǵandardy ártúrli qanaý túrlerine tartý deregi tirkelip jatyr.
Astanada temirjol vokzaly mańynda politsiia men prokýratýra birlesken reid júrgizip, jeńgetailyqpen ainalysqan 8 adam jaýapkershilikke tartylatyn boldy.
Aqmola oblysynda otbasylyq qundylyqtardan bas tartýdy jáne retsiz qatynastardy nasihattaǵan dini toptyń áreketi toqtatyldy. Tekserý barysynda ádebietter men kýlttik zattar tárkilendi, tiisti saraptamalar taǵaiyndaldy.
Buǵan deiin Astana, Almaty jáne Shymkent qalalarynda «elitalyq eskort» uiymdastyrýshylarynyń áreketteri áshkerelengen. Olar túngi klýbtarda qyzdardy arbaý arqyly tartqan. Barlyq material sotqa joldandy.
Ishki ister ministrliginiń habarlaýynsha, elorda men Almatydaǵy túngi mekemelerde júrgizilip jatqan reidter jastardy qylmystyq qanaýdan qorǵaýǵa baǵyttalǵan. Ministrlik keshendi profilaktikalyq jumystyń jalǵasatynyn atap ótti.
