Shymkent qalasynyń ákimi Ǵabit Syzdyqbekov burynǵy orynbasary Rýslan Berdenovke jasalǵan qarýly shabýylǵa qatysty alǵash ret pikir bildirdi, dep habarlaidy Dalanews.kz
Ortalyq kommýnikatsiialar qyzmetinde ótken brifingte jýrnalister qala ákiminen sol oqiǵaǵa bailanysty qoǵamdaǵy synǵa jaýap berýin surady. Áleýmettik jeli qoldanýshylary ákimniń únsizdigin «qatigezdik» dep baǵalaǵan bolatyn.
«Munda qatigezdiktiń ne qatysy bar? Men ákim retinde qylmystyq ne ákimshilik iske aralasýǵa quqyǵym joq. Ol úshin arnaiy organdar bar. Sot sheshim shyǵardy, tergeý óz jumysyn atqardy. Eger men aralassam, bul protsestiń ózine kedergi bolar edi», – dedi Syzdyqbekov.
Ol sondai-aq áleýmettik jelidegi synǵa asa mán bermeitinin aitty.
«Shymkentte 2 millionnan astam adam turady, árkimniń óz pikiri bar. Bireýler artyq sóz jazady, ýaqyty bar shyǵar. Sondyqtan “qatty heit boldy” degenmen kelispeimin», – dedi ákim.
Syzdyqbekovtiń aitýynsha, oqiǵadan keiin qala ákimdigi men onyń qaýipsizdigi kúsheitilgen.
«Qazir arnaiy politsiia polki kúzet júrgizip otyr, bári baqylaýda», – dep atap ótti ol.
Eske salaiyq, 21 sáýirde Shymkent qalasy ákimdigi ǵimaratynyń mańynda burynǵy ákim orynbasary Rýslan Berdenovke oq atylǵan edi. Keiin sot Ernar Jienbaidy kináli dep tanyp, 9 jylǵa bas bostandyǵynan aiyrǵan.
Berdenov 29 tamyzda ákim orynbasary qyzmetinen ketken bolatyn.
