Estonıanyń Qazaqstandaǵy elshisi Iaap Ora Estonıa prezıdenti Alar Karıstiń Qazaqstanǵa jasaǵan saparynan keıin otstavkaǵa ketti, dep habarlaıdy Dalanews.kz.
Karıstiń Qazaqstanǵa sapary 17–18 qarasha kúnderi ótti. Prezıdentpen birge jubaıy Sıre Karıs pen delegasıasy kelgen. Sapar barysynda ol bıznes-forýmǵa qatysyp, nátıjesinde taraptar 11 komersıalyq qujatqa qol qoıdy.
Alaıda birneshe aptadan keıin Estonıa medıasynda daý týyndady: Karıs Qazaqstanda sóılegen sózderinde birde-bir rýsofobıalyq pikir aıtpaǵany jáne Ýkraınadaǵy qaqtyǵysty bir ret te eske almaǵany belgili boldy.
Jýrnalıserdiń aıtýynsha, «sapar barysynda Estonıanyń Qazaqstandaǵy elshisi Iaap Ora prezıdentke jáne onyń syrtqy saıasat jónindegi keńesshisi Margýs Kolgaǵa Ýkraınaǵa qatysty tujyrymdardy jumsaǵyraq jetkizýdi usynǵan».
Karıs elshiniń keńesin eskerip, óz sózin qaıta qarap shyqqan, ýkraın qaqtyǵysyna qatysty joldardy alyp tastap, qazirgi geosaıası jaǵdaıdy barynsha beıtarap sıpattaǵan.
Medıada qyzý talqylaý bastalǵannan keıin Estonıanyń elshisi otstavkaǵa ketý týraly sheshim qabyldady.
Estonıa SİM habarlaýynsha, «shıelenisti báseńdetý úshin Estonıanyń Qazaqstandaǵy elshisi Iaap Ora kelesi jyldan bastap qyzmetten óz erkimen ketýdi uıǵarǵan».
