Densaýlyq saqtaý ministri Aqmaral Álnazarova Almatydaǵy poiyzda gazdan ýlanǵan adamdardyń jaǵdaiyna qatysty málimet berdi, dep habarlaidy Dalanews.kz.
Ministrdiń aitýynsha, oqiǵa ornyna jedel járdemniń 13 brigadasy jumyldyrylǵan.
“Barlyǵy 53 adam, onyń ishinde balalar zardap shekti. Olardyń bári der kezinde qalalyq statsionarlardyń qabyldaý bólimderine jetkizilip, tekserýden ótti jáne qajetti meditsinalyq kómek kórsetildi”, — dedi Álnazarova.
Tekserý nátijesinde 11 balany aýrýhanaǵa jatqyzý týraly sheshim qabyldanǵan.
“Eki bala jansaqtaý bóliminde jatyr, qalǵandary tiisti profildik bólimshelerde mamandardyń baqylaýynda”, — dep naqtylady ministr.
Qalǵan jolaýshylar tekserýden keiin ambýlatorlyq em alýǵa úiine jiberildi. Álnazarova ministrlik jaǵdaidy baqylaýda ustap otyrǵanyn, Almaty qalasyndaǵy meditsinalyq uiymdarmen turaqty bailanysta ekenin jetkizdi.
“Barlyq naýqasqa tolyq kólemde meditsinalyq kómek kórsetilip jatyr. Dárigerler olardyń jaǵdaiyn turaqty baqylap otyr. Qaýipsizdik pen oń dinamikany qamtamasyz etý úshin barlyq qajetti resýrstar tartylǵan. Zardap shekkenderdiń tezirek saýyǵyp ketýin tileimin”, — dedi ol.
Poiyzdaǵy jappai ýlanýdan keiin politsiia oqiǵa boiynsha qylmystyq is qozǵady.
“Osy derek boiynsha Almaty-1 stansasyndaǵy jelilik politsiia basqarmasy Qylmystyq kodekstiń 156-baby – “Eńbekti qorǵaý qaǵidalaryn buzý” faktisi boiynsha qylmystyq is tirkedi. Qazir oqiǵanyń barlyq mán-jaiyn anyqtaý úshin qajetti tergeý sharalary júrgizilip jatyr. Tergeý nátijesi boiynsha zańǵa sáikes protsessýaldyq sheshim qabyldanady. Ózge aqparat jariia etýge jatpaidy”, — dep habarlady vedomstvo.
Eske salaiyq, 11 jeltoqsanda Almatyda poiyzda 50-den asa adam gazǵa ýlanyp qalǵany týraly jazǵan edik.
"Jolaýshylar tasymaly" AQ aqparatyna súiensek, bul poiyz quramy jeke menshik tasymaldaýshyǵa tiesili, al vagondar kinostýdiiaǵa túsirilim júrgizý úshin ýaqytsha berilgen.
