Qazaqstan kúnbaǵys maiyn eksporttaýshy álemdik ondyqqa kirdi. Bul týraly Aýyl sharýashylyǵy ministrligi málimdedi, dep habarlaidy Dalanews.kz.
Vitse-ministr Ermek Kenjehanulynyń aitýynsha, elimizde mai salasy azyq-túlik qaýipsizdiginiń negizgi baǵyttarynyń biri. Sońǵy jyldary maily daqyldar sebiletin alqap kólemi eki ese ósip, 3,9 million gektarǵa jetken. Óńdeý kólemi 12%-ǵa artyp, 700 myń tonnadan asqan. Al eksport 29%-ǵa ósip, 582 myń tonnany qurady.
"Óńdeýge investitsiialardy sýbsidiialaý, ainalym qarajatyna qoljetimdilikti qamtamasyz etý salanyń turaqtylyǵyn arttyryp, keńeiýge jaǵdai jasady. Memlekettik qoldaý sharalarynyń arqasynda Qazaqstan kúnbaǵys maiyn eksporttaýshy álemdik TOP-10 el qataryna endi, Eýroodaq elderine kúnbaǵys shroty jetkizý boiynsha úshinshi orynǵa shyqty. Biz Ortalyq Aziiany tolyq kólemde kúnbaǵys shrotymen jáne kúnjaramen qamtamasyz etip otyrmyz. Salada áli de úlken áleýet bar", — dedi Kenjehanuly.
Ǵylymi negizdelgen josparǵa sáikes, maily daqyldar egis alqaby 5 million gektarǵa deiin ulǵaitylýy tiis. Bul Qazaqstanǵa kúnbaǵys maiyn eksporttaityn álemniń alǵashqy úsh eli qataryna kirýge múmkindik beredi.
2026–2028 jyldarǵa arnalǵan mai ónimderi eksportynyń damý jónindegi jol kartasy Astanada tanystyryldy. Sharaǵa óndirýshiler, óńdeýshiler, eksporttaýshylar, salalyq qaýymdastyqtar men halyqaralyq seriktester qatysty.
"Qujattyń basty maqsaty — salanyń eksporttyq áleýetin 1 mlrd dollar deńgeiine jetkizý, satý naryqtaryn keńeitý jáne joǵary qosylǵan quny bar ónimderdi tereń óńdeýdi yntalandyrý", — dep habarlady vedomstvo.
Sonymen qatar Jol kartasynyń iske asyrylýyn úilestirý jáne memleket pen biznes arasyndaǵy ózara is-qimyldy kúsheitý úshin memlekettik-jekemenshik platforma qurý týraly sheshim qabyldandy.
