Astanadaǵy №2 Balalar men jasóspirimder sport mektebiniń taǵdyryna qatysty jańa bastama qoǵam nazaryn aýdardy. Atalǵan sport mektebin №10 sport mektebimen biriktirý máselesi kóterilgen. Eki túrli baǵytta balalardy daiarlaityn mektepti qosýǵa kópshilik qarsylyq tanytýda, dep habarlaidy Dalanews.kz
№2 mektepte bilim alatyn muz aidynynda jattyǵatyn 700-ge jýyq sportshy - mánerlep syrǵanaýshylar, konkimen júgirýshiler, short-trek sheberleri jáne basqa da jeke sport túrleriniń ókilderi №10 BJSM-men yqtimal biriktirý máselesine bailanysty belgisizdik jaǵdaiynda qaldy. Al №10 mektep negizinen hokkei komandasyn daiarlaýmen ainalysady.
Sarapshylardyń pikirinshe, eki túrli baǵyttaǵy sportty bir mekemege shoǵyrlandyrý jeke sport túrleriniń damýyna keri áser etýi múmkin. Óitkeni mánerlep syrǵanaý, konki sporty nemese short-trek sekildi baǵyttar úzdiksiz muz daiyndyqtaryn, naqty ýaqyt bólinisin jáne mamandandyrylǵan infraqurylymdy talap etedi. Eger oqý orny hokkeimen ortaq grafikke kóshse, jeke sport túrleriniń ókilderi tolyqqandy jattyǵý múmkindiginen aiyrylýy yqtimal.
Mundai ózgerister uzaq jyldar boiy qalyptasqan jattyǵý júiesine, jas sportshylardyń damý qarqynyna jáne bapkerler jumysyna aitarlyqtai áser etýi múmkin. Sport mektebiniń derbes mártebesin saqtaý bastamasy osy sebepti qoǵam talqysyna túsip otyr.
Bul jaǵdai ata-analardyń da alańdaýshylyǵyn kúsheitti. Olardyń biri óz oiyn bylai jetkizdi:
“Meniń qyzym kásibi túrde mánerlep syrǵanaýǵa qatysady jáne únemi joǵary nátijeler kórsetip keledi. 2024–2025 maýsymynda ol 7 altyn medal jeńip aldy, al 2025–2026 jylǵy qazirgi maýsymda halyqaralyq týrnirde 1-oryn ielenip, elimizdi jáne bizdiń týǵan sport ortalyǵymyz - №2 BJSM-di abyroimen tanytty”.
Qazir ata-analar, jattyqtyrýshylar jáne sportshylar №2 BJSM-niń jeke sport túrlerin damytý ortalyǵy retinde saqtalýy qajet ekenin aitýda. Olardyń paiymynsha, bul sheshim balalardyń sporttaǵy bolashaǵyna jáne eldiń halyqaralyq arenadaǵy nátijesine yqpal etedi.
Másele boiynsha resmi sheshim áli qabyldanǵan joq. Qoǵamaralyq talqylaý jalǵasýda.
