Qazaqstandyqtarǵa zeinetaqy jinaǵyndaǵy artyq somany plastikalyq otaǵa paidalanýǵa tyiym salyndy, dep habarlaidy Dalanews.kz.
enpf-otbasy.kz platformasynda stomatologiia men oftalmologiiaǵa BZQ qarajatyn paidalaný úshin ótinim qabyldaý toqtatylǵannan keiin, qazaqstandyqtar jańa maqsatty jappai tańdai bastady. Ol rekonstrýktivti jáne qalpyna keltirý (plastikalyq) operatsiialary. Bul baǵytqa ásirese operatsiiadan keiingi tyrtyqtardy túzetý jáne týa bitken aqaýlardy korrektsiialaý úshin suranys artty.
Otbasy bank mundai ótinimderdiń sany boiynsha kúrt ósimdi baiqady. Buryn bankke plastikalyq otalarǵa BZQ qarajatyn paidalaný týraly azamattardan orta eseppen 16 ótinish túsetin. Alaida qyrkúiekte stomatologiia boiynsha ótinim qabyldaý toqtaǵan kezde olardyń sany 123-ke deiin ósti, qazanda – 1 844-ke, al qarashada – 3 878 ótinishke jetti.
Jeltoqsannyń alǵashqy 8 kúninde, oftalmologiiaǵa ótinim qabyldaý toqtaǵannan keiin, plastikalyq otalarǵa BZQ paidalaný boiynsha 2 093 ótinish tústi. Bul – burynǵy ailyq ortasha kórsetkishten 130 ese kóp.
Jeltoqsan aiyndaǵy ótinimderdiń jalpy somasy 1,8 mlrd teńgege jetti.
– Azamattardyń zeinetaqy qarajatynyń maqsatty paidalanylýyn qadaǵalaý – Otbasy bankiniń mindeti. Plastikalyq otalarǵa degen qyzyǵýshylyqtyń kúrt artqanyn baiqaǵan kezde, biz bul jaǵdaidan BZQ qarajatyn maqsatsyz paidalaný qaýpin kórdik. Sondyqtan osy baǵyt boiynsha ótinim qabyldaýdy toqtatýǵa májbúr boldyq.
Otbasy bank árqashan ashyq jumys isteidi jáne klientterdiń múddesin birinshi orynǵa qoiady – bul bizdiń qaǵidatty ustanymymyz ári áleýmettik jaýapkershiligimizdiń kórinisi. BJZQ-daǵy qarajat – azamattardyń bolashaq zeinetaqysy. Iá, qazaqstandyqtar zeinetaqy artylǵan qarajatyn belgili bir maqsattarǵa paidalana alady.
Qazir osy múmkindikti jeleý etip, keibireýler BZQ qarajatyn deldaldar arqyly zańsyz jolmen sheship alyp jatyr. Al shyn máninde, paida taýyp otyrǵan – sol deldaldar. Otbasy banki úshin eń mańyzdysy – zeinetaqy qarajatynyń naqty maqsatyna jumsalýyn qamtamasyz etý jáne ony zańsyz baiý quralyna ainaldyrmaý, – dedi Otbasy bank basqarma tóraiymy Lázzat Ibragimova.
BJZQ qarajatyn «Operatsiiadan keiingi tyrtyqtardy jáne týa bitken aqaýlardy túzetýge arnalǵan rekonstrýktivti jáne qalpyna keltirý (plastikalyq) operatsiialary» maqsaty boiynsha paidalaný úshin ótinim qabyldaý enpf-otbasy.kz portalynda 2025 jyldyń 12 jeltoqsanynan bastap toqtatylady.
Qazirgi ýaqytta plastikalyq operatsiialarǵa BZQ qarajatyn paidalaný boiynsha 6 294 ótinim qaralýda. Bul ótinimderdiń barlyǵy qoldanystaǵy tártipke sáikes óńdeledi.
Sonymen qatar azamattarda ózderiniń zeinetaqy jinaqtarynyń bir bóligin ómirlik mańyzdy, quny joǵary jáne árdaiym qoljetimdi bola bermeitin em túrlerine baǵyttaý múmkindigi saqtalady. Mundai meditsinalyq qyzmetterge mynalar jatady:
• sirek (orfandyq) aýrýlardy emdeý;
• radionýklidtik jáne radioiod terapiiasy;
• radiohirýrgiialyq emdeý;
• protondyq terapiia.
Budan bólek, azamattar zeinetaqy artylǵan qarajatty turǵyn úi jaǵdaiyn jaqsartýǵa paidalana alady: turǵyn úi satyp alý, ipotekany tolyq nemese jartylai óteý, sondai-aq Otbasy banktegi depozitti tolyqtyryp, keiin baspana alý múmkindigi bar.
Eske sala ketsek, buǵan deiin zeinetaqy jinaǵynyń 2026 jylǵa arnalǵan eń tómengi jetkilikti shegi jariialanǵan edi.
