Almaty oblysynda aýyl sharýashylyǵy salasyn damytý máselelerin talqylaý úshin úkimet, ǵylym jáne biznes ókilderin jinaǵan dástúrli jyl saiynǵy «Eginjai kúni» sharasy ótti. Aita ketý kerek, bul shara Qazaqstan Respýblikasy Prezidenti janyndaǵy Ulttyq ǵylym akademiiasynyń tikelei atsalysýymen ótkizilip, tájiribe almasý, jańa tehnologiialar men ósimdik sorttaryn engizý platformasy retinde mańyzdy ról atqardy.
Sharanyń ashylýynda sóz sóilegen Almaty oblysynyń ákimi Marat Sultanǵaziev:
– Aýyl sharýashylyǵy – bizdiń negizgi resýrsymyz. Salany damytý jolynda qoiylǵan mindetterdi zamanaýi tehnologiialardy engize otyryp, birlesip jáne sapaly oryndaý qajet! – dedi.
Óz kezeginde óńir basshysy aýyl sharýashylyǵy ádisterin jetildirýdiń mańyzdylyǵyn atap ótip, oblystyń jetistikterimen bólisti. Búginde Almaty oblysynda aýyl sharýashylyǵy oblys ekonomikasynyń negizgi draiveri, aýylda oblys turǵyndarynyń turǵyndarynyń 84 paiyzy turady.
2024 jyldyń alǵashqy jartyjyldyǵynda óńirde AÓK jalpy ónimi 190,1 mlrd teńgeni qurap, naqty kólem indeksi 106,5 paiyzǵa jetken. Óńir jalpy aýyl sharýashylyǵy ónimi kólemi boiynsha respýblikada ekinshi orynda jáne onyń úlesi 12,1 paiyzdy quraidy.
Biylǵy jyly is-sharaǵa Almaty, Jambyl oblystarynyń ákimderi men Jetisý oblysy ákiminiń orynbasary, sý resýrstary jáne irrigatsiia birinshi vitse-ministri, aýyl sharýashylyǵy vitse-ministri, elimizdiń jetekshi ǵalymdary, iri agroholdingter men fermerlik sharýashylyqtardyń ókilderi qatysty.
Talqylaýǵa túsken basty taqyryp – sý resýrstarynyń tapshylyǵy máselesi jáne ony sheshý joldary boldy. Qatysýshylar sý únemdeýdiń innovatsiialyq tehnologiialaryn: tamshylatyp sýarýdy, topyraq ylǵaldylyǵy sensorlaryn, sý resýrstaryn tsifrlyq júiemen basqarýdy engizý qajettigin atap ótti.
QR Ulttyq ǵylym akademiiasynyń prezidenti Aqylbek Kúrishbaev Qazaqstanda 2030 jylǵa qarai sý resýrstarynyń kólemi 15 paiyzǵa azaiýy múmkin ekenin, bul ulttyq qaýipsizdikke qaýip tóndiretinin aitty. Ol sý resýrstaryn uqypty paidalanýǵa shaqyrdy, elde áli de kóp kólemde topyraqty arnalarmen sýarý júiesi qoldanylatynyn jáne sýdy jetkizý kezinde kóp shyǵynǵa ushyraitynyn atap ótti.
– Sý únemdeý tehnologiialaryn belsendi túrde engizý qajet. Bul teoriia emes, aýyl sharýashylyǵy daqyldarynyń sý tutyný kólemin qysqartyp, ónimdilikti arttyrýdyń naqty múmkindigi, – dep atap ótti Aqylbek Kúrishbaev.
