Jańa qaýlyda ómir súrýdi qamtamasyz etetin nysandardyń jumys erekshelikterine aıryqsha nazar aýdarylǵan.
Máselen, qaýlyǵa sáıkes menshik nysanyna qaramastan medısınalyq uıymdar, onyń ishinde stomatologıalyq uıymdar, ónerkásiptik, óndiristik kásiporyndar jáne tynys-tirshilikti qamtamasyz etý obektileri (jylý, energıa, sýmen jabdyqtaý, tamaqtaný jáne t. b.); kóktemgi egis, aýyl sharýashylyǵy, qurylys jáne jol jumystaryn júrgizýge baılanysty nysandar qyzmetin ýaqytsha toqtata turýǵa jatpaıdy.
Dárihanalar, onyń ishinde veterınarlyq jáne azyq-túlik dúkenderiniń jumysy ádettegi rejımde jalǵasady. Sol sıaqty kólik quraldarynyń qosalqy bólshekteriniń, tuqymdardyń, kóshetterdiń, mıneraldyq tyńaıtqyshtardyń satylýy, qurylys materıaldarynyń kóterme saýdasy taýarlardy bosatý tek aldyn ala tapsyrys boıynsha, dúkenge tikeleı barmaı, tapsyrys berilgen taýarlardy satyp alýshylar kelgen kezde bere otyryp, júrgiziletin bolady.
Sanıtarlyq-gıgıenalyq talaptardy kúsheıte otyryp halyqpen jumys isteýdi resmı taksı qyzmeti de jalǵastyra alady. Ol úshin kólik tıisti belgilermen (taksıge arnalǵan doıby) jabdyqtalýy jáne júrgizýshiniń jeke basy týraly aqparatty jolaýshyǵa kórnekti orynda (júrgizýshiniń pasporttyq derekteri, kásiporynnyń derekteri, telefon nómiri, ataýy, avtomashınanyń nómiri) usynýy tıis. Bul rette bir otbasy múshelerin qospaǵanda, jeńil kóliktegi adam sany 3-ten (júrgizýshini qosa alǵanda) aspaýy tıis.
Eldi meken ishindegi qoǵamdyq kólikter de jumysyn jalǵastyrady. Qalalyq jáne aýdandyq avtobýstardyń tolymdylyǵy otyrǵyzý oryndarynyń 40% - nan aspaýy tıis. Dezınfeksıalaý jáne jýý quraldaryn qoldana otyryp árbir reısten keıin avtobýstardy, qoǵamdyq kólik aıaldamalaryn óńdeý (kúnine keminde eki ret) qajet. Qoǵamdyq kólikte qorǵanysh maskasyz júrýge tyıym salynady.
Ýaqytsha saqtaý qoımalary, olardyń jumysyn qamtamasyz etetin tulǵalar men uıymdary, sanıtarlyq-dezınfeksıalyq sharalardy kúsheıte otyryp jáne kelýshiler arasyndaǵy qashyqtyqty keminde 1 metr saqtaı otyryp, ádettegi rejımde jeke ornalasqan poshta baılanysy obektileri jáne ekinshi deńgeıdegi bankter, mıkroqarjylyq qyzmetti júzege asyratyn uıymdar jumys isteı alady (jumys ýaqytyn shekteý saǵat 09-00-den 14-00-ge deıin).
Sol sıaqty avtojanarmaı quıý stansıalary, jeke ornalasqan tehnıkalyq qyzmet kórsetý stansıalary, salttyq qyzmet kórsetý nysandary óz qyzmetin atqara beredi.
Osy oraıda shekteý kezeńinde jumys isteıtin atalǵan nysandar sanıtarlyq jáne dezınfeksıalyq rejım talaptaryn qatań saqtaýy tıis, sonyń ishinde kireberiste qol jýýǵa arnalǵan sanıtaızerler ornatý, barlyq qyzmetkerlerin bir rettik maska men bir rettik qolǵappen qamtamasyz etý, ústelderdiń, sórelerdiń, oryndyqtardyń, baspaldaqtardyń, tutqalardyń, esikterdiń barlyq betterin jáne edenderdi dezınfeksıalyq quraldarmen qoldaný nusqaýlyǵyna sáıkes kúnine keminde 3 ret óńdeýge mindettelgen. Sol sıaqty kelýshilerdiń betperdesiz bolýyna jol bermeý, kelýshilerdiń áleýmettik qashyqtyǵyn keminde 2 metr saqtaýdy qamtamasyz etýge tıis.
Sonymen birge ónerkásip óndirisi nysandarynyń sýbektileri jáne ómir súrýdi qamtamasyz etetin nysandar árbir reısten keıin kúndelikti dezınfeksıalyq óńdeý júrgizip, qyzmetkerlerdi bólingen avtokólikpen jetkizýdi uıymdastyrýy tıis. Árbir aýysym aldynda obektininiń ótkizý pýnktinde dene qyzýyn ólshep, baqylaý jýrnalyna tirkeýi qajet. Vırýstyq ınfeksıaǵa (jótel, tumaýratý, dám seziminiń joǵalýy, entigý, joǵary temperatýra, dıareıa) kúdikti adamdar anyqtalǵan kezde 103 qyzmetin shaqyrýy tıis.
Atap ótsek, bul qaýly 2020 jyldyń 8 sáýiri kúngi saǵat 08.00-de kúshine enedi.
Almaty oblysy ákiminiń baspasóz qyzmeti
