Memlekettik korporatsiia mamandandyrylǵan halyqqa qyzmet kórsetý ortalyqtarynda sybailas jemqorlyqqa qarsy úzdiksiz kúres júrgizýde, dep habarlaidy Dalanews.kz saity.
Júrgizýshi kýálikterine teoriialyq emtihandardy tapsyrýdyń ashyqtyǵyn qamtamasyz etý úshin buǵan deiin 3.0 JJE júiesi engizilgen bolatyn. Endi testileý protsesin shýly elektromagnittik jiiligi tómen signaldardy anyqtaityn tehnologiianyń kómegimen de baqylaýǵa bolady.
Aita keteiik, árbir úshinshi júrgizýshi kýáligin alýǵa úmitker ailasyn asyryp, teoriiany mikroqulaqqappen tapsyrýǵa tyrysady. Bul olqylyqty boldyrmaý úshin Memlekettik korporatsiia olardy anyqtaityn arnaiy detektorlar engizdi.
- Mikroqulaqqaptardyń diametri 2 millimetrden aspaýy múmkin, olardy kórý múmkin emes bolǵandyqtan biz jiiligi tómen signaldardy anyqtaityn júie engizdik. Ol mikroqulaqqaptardyń bar-joǵyn birden anyqtap, HQKO operatoryna dereý habarlaýǵa qaýqarly. Sondai-aq, baǵdarlama avtomatty túrde ekranǵa mikro qulaqqap tabylǵany jáne testileý toqtatylatyny týraly habarlamany shyǵarady, - dedi «Azamattarǵa arnalǵan úkimet» Basqarma tóraǵasynyń orynbasary Shyńǵys Orazalimov.
Esterińizge sala keteiik, kómekshi tehnikany, úshinshi tulǵalardyń kómegi men keńesterin paidalanýdyń barlyq faktilerin Memlekettik korporatsiia tirkeidi. Bul rette emtihan nátijeleri joiylady. Emtihanǵa qaita kirý úsh aidan keiin ǵana múmkin bolady. Aita keteiik, JJE 3.0 júiesi engizilgen sátten bastap búgingi kúnge deiin emtihandy túrli aila-sharǵymen tapsyrýdyń 222 faktisi anyqtaldy.
