«Ádildik jáne órkendeý» qoǵamdyq qory memlekettik mektepterdegi tamaqtyń sapasyna qatysty áleýmettik monitoringtiń bastalǵanyn habarlap, oǵan barlyq qazaqstandyq oqýshylardyń ata-analaryn qatysýǵa shaqyrady. Ol úshin osy jyldyń 14 men 28 qazany aralyǵynda ózińizge qolaily ýaqytta berilgen suraqtarǵa onlain jaýap berý qajet.
Bul áleýmettik monitoringte mektep oqýshylaryn dámdi jáne paidaly tamaqtandyrýǵa qatysty barlyq suraqtar qamtylǵan. Qor ata-analardan mázirdiń ártúrliligin, ashanalardyń sanitarlyq jaǵdaiyn, oqýshylardyń tamaqtaný kestesiniń yńǵailylyǵyn jáne basqa da qyzmetterdi baǵalaýdy suraidy.
Saýalnama jasyryn túrde ótedi. Jaýap berý ýaqyty bes minýttan aspaidy.
Ata-analardyń jaýaptary memlekettik mektepterde tamaqtaný protsesin uiymdastyrýǵa qatysty eń ózekti máselelerdi anyqtaýǵa kómektesedi. Saýalnama nátijeleri BAQ-ta jariialanyp, QR Oqý-aǵartý ministrligine jáne basqa da múddeli memlekettik organdarǵa jiberiledi. Saýalnamaǵa qatysýshylardyń óz usynystaryn berýge múmkindigi de bar. Ata-analardyń pikirine súiene otyryp, Qor mektep ashanalarynyń sapasyn jaqsartý boiynsha usynystar ázirleidi.
Memlekettik mektepterdegi balalardyń tamaqtaný sapasyn baqylaý taqyryby – «Ádildik jáne órkendeý» Qory qyzmetiniń basym baǵyttarynyń biri. Jumys QR Oqý-aǵartý ministrligimen jáne Qazaq Taǵamtaný Akademiiasymen birlesip júrgizilýde.
Áleýmettik monitoringten basqa, Qor mekteptegi tamaqtaný sapasyn baǵalaý boiynsha qoǵamdyq baqylaý sheńberinde turaqty túrde basqa da is-sharalardy ótkizedi. Mysaly, Qor belsendileri Jetisý oblysynyń, Túrkistan jáne Almaty oblystarynyń, Almaty qalasynyń mektep ashanalaryna tekserý júrgizdi.
Qor osy tekseris barysynda balalarǵa qosymsha tamaq portsiiasynyń berilmeýi, astyń mázirdegi sipattamaǵa sáikes kelmeýi, býfetterde mektepterde satýǵa tyiym salynǵan ónimderdiń satylýy (onyń ishinde shokolad pen energetikalyq sýsyndar), sanitarlyq normalar men tamaq daiyndaý tehnologiialarynyń saqtalmaýy sekildi buzýshylyqtardy anyqtady. Sondai-aq, mektep ashanasynda gaz ballonyn paidalaný, qyzmetkerlerdiń arnaiy diplomynyń joqtyǵy sekildi jáitter de jii kezdesedi. Barlyq anyqtalǵan buzýshylyqtar boiynsha aktiler jasalyp, baqylaýshy organdarǵa jiberildi. Qor biylǵy oqý jylynyń sońyna deiin elimizdiń barlyq óńirindegi mektep ashanalaryn tekserip shyǵýdy josparlap otyr.
Anyqtama: «Ádildik jáne órkendeý» qoǵamdyq qory belsendi azamattardyń bastamasymen quryldy. Búginde Qazaqstannyń barlyq aimaǵynda óz ókildigi men 5 000 astam jaqtasy bar. Qordyń jobalary men bastamalary kásiporyndardaǵy qaýipsizdik tehnikasyn saqtaý, mekteptegi tamaq sapasyn baqylaý, jóndelgen joldyń sapasyn tekserý sekildi mańyzdy máselelerge arnalǵan. Qor qazaqstandyqtardyń eńbek quqyǵyn qorǵaýǵa qatysty tegin zańgerlik kómek kórsetedi. El turǵyndarynyń pikirin anyqtaý úshin Qor «Áleýmettik monitoring» júrgizedi. Kez kelgen qazaqstandyq Manifestke qol qoiyp, Qor jumysyna qosyla alady.
