Bir top buzaqynyń qolynan qaza tapqan 16 jastaǵy Sherzat Bolattyń ólimi dúiim jurtty dúrliktirip, qoǵamda úlken rezonans týdyrdy. Al bul iste Hasan Qasymbaevtyń esim-soiy jii ushyrasady. Birneshe derekkóz ony "Hýtor" atty jergilikti bandanyń basshysy retinde atap kórsetken jáne Sherzatty ajal qushtyrǵan kúdiktilerdiń osy uiymǵa qatysy bar degen aqparatty taratqan edi. Osy tusta Alataý aýyldyq okrýgi Rysqulov aýylynyń turǵyndary alyp-qashpa áńgimelerdi joqqa shyǵaryp, halyqqa úndeý jasady, dep habarlaidy Dalanews.kz.
Turǵyndardyń aitýynsha, álemjelide tarap jatqan aqparattar shyndyqqa janaspaidy.
"Bizdiń aýyl úshin óte qiyn jaǵdai boldy. Eń aldymen marqum Sherzattyń otbasyna qaiǵyryp kóńil aitamyz. "Bir qumalaq, bir qaryn maidy shiritedi" dep beker aitpaǵan. Aýyr bolǵannan keiin osy taqyryp tóńireginde neshe túrli aqparat taraýda. Aýylymyz shaǵyn bolǵanymen, óte uiymshyl ekenin aitqymyz keledi. Sý tasqyny kezinde kómek berý úshin úsh kúnniń ishinde 2,5 million teńge jinap, óz qolymmen tabystaǵanmyn. Qańtar oqiǵasy kezinde de búkil Talǵar únsiz jatqan kezde osy aýyldyń jigitteri bireý-mireý kirip ketpesin dep kezek-kezek kúzetti. Buny búkil halyq estigen shyǵar, bizge eshkim osylai áreket etińder dep buiryq bergen joq.
Bul – aýylymyzdyń uiymshyldyǵy. Taiaqtyń eki ushy bolady. Bizdiń aýylymyzǵa qatysty jaman sózderdiń aitylmaýyn suraimyz. Ártúrli pikir aita bermei, quqyq qorǵaý organdaryna aryzdaryn jazsyn, teksersin. Teksermei jatsa, shýlatsyn. Úide otyryp, anaý aitty, mynaý aitty degen sózderdi doǵarý kerek", - deidi aýyl turǵyndary.
Olardyń sózinshe, atyshýly Hasan - kópke kómegin tigizip júrgen azamat.
"Hasan kerisinshe, osy aýyldyń birligi men tirligine shapqylap júr. Mektepke de, meshitke de aqshalai kómektesip keledi. Osyndai azamatty qaralap, Sherzat marqumnyń isi aidalada qaldy. Odan ósh ala almai júrgenderdiń áreketine uqsaidy. Iá, onyń inisi túrmede otyrǵan shyǵar. Al onyń jeke basyna til tigizýge bolmaidy. Oǵan da aýyr tiip jatyr. Dálel bar ma, kelińder, ustap berińder. Ary qarai quqyq qorǵaý organdary ózderi sheshedi. Qazir bireýdi otyz adamǵa jaman deseń, rasymen jaman bolyp qalady. Sol úshin alyp-qashpa áńgimelerdi doǵaraiyq. Ár nárseniń shegi bar. Buny estigen búkil aýyl jylap jatyr. Bul sumdyq jaǵdai boldy", - dep qosty olar.
Osy tusta aýyl turǵyndary halyqty negizsiz áńgimelerge sene bermeýge shaqyrdy.
"Biz jetim-jesirdi jylatpaimyz. Ózimizde shaǵyn qor bar. Sodan aýyryp jatqandarǵa, qiyn jaǵdaida qalǵandarǵa kómek beremiz. Úi órtenip ketse de, kómek úsh kúnde jinalady. Joq degende 1000-2000 teńgeni kempir-shaldarǵa ákelip beredi. Mundai aýyl qai jaqta bar eken? Bir aýyz sóz aitamyz, bári bir aýyzdan kómektsýge daiyn turady. Onyń arasynda kásipkeri de, zeinetkeri de, muǵalimi de, taksisti de bar. Endi kep bizdiń aramyzǵa ot salyp jatyr. Bulai aitýǵa eshkimniń quqyǵy joq. Bizdi bulai qaralamasyn.
Bolar is boldy. Biz de ashyq sotty talap etemiz. Bas prokýrordan suraitynymyz, tóbeles bolǵan kúni dúkendegi videosyn qalypqa keltirip, halyqqa kórsetsin. Halyq sol kezde senedi. Bizdiń talabymyz – sol. Balalarymyzdyń jasaǵan qateligi úshin qazaq halqynan keshirim suraimyz! Artyq sózdi doǵarsańyzdar!", - dep úndeý joldady Rysqulov aýylynyń turǵyndary.
Aita keteiik, marqum Sherzattyń isinde esimi birneshe ret atalǵan Hasan Qasymbaev óziniń ar-namysy men abyroiyn qorǵaý maqsatynda marqum balanyń ákesine jáne taǵy basqa tulǵalarǵa qarsy aryz daiyndap, Talǵar aýdandyq sotyna tapsyrǵan edi.
Hasannyń aitýynsha, onyń atyna taǵylǵan aiyptar men qoǵamdaǵy áńgimeler shyndyqqa janaspaidy. Ol qarapaiym turmystyq tóbelesti uiymdasqan qylmystyq toptardyń arasyndaǵy qaqtyǵys retinde kórsetýge tyrysyp jatyr degen pikirde.
Kasymbaevtyń pikirinshe, ony atyshýly qylmystyq toppen bailanystyrý negizsiz. Álgi aryzda ol eshqashan kisi óltirýge qatysty jastardy kórmegenin, bilmegenin jáne olardyń áreketterine eshqandai qatysy joq ekenin málimdegen.
Hasan kez-kelgen qoǵamdyq alańda, tipti BAQ arqyly óziniń kinásizdigin dáleldeýge daiyn ekenin basa aitqan. Onyń oiynsha, bul oqiǵa qarapaiym turmystyq janjal bolǵan, biraq ony ádeii burmalap, úlken qylmystyq astar qosyp, onyń atyna kir keltirmekshi.
Buǵan deiin BAQ betteri men álemjelide marqum Sherzat pen onyń otbasyna shabýyl jasaǵan bir top buzaqynyń "Hýtor" atty jergilikti bandymen bailanysy bar degen aqpar taraǵan edi. Birneshe derekkóz toptyń tóbe basynda Hasan esimdi azamattyń turǵanyn jazǵan bolatyn.
Almaty oblystyq politsiia departamenti Sherzattyń ólimine kúdikti retinde ustalǵan jeti adamnyń uiymdasqan qylmystyq esh qatysy joǵyn jetkizgen.
DALA INSIDE-qa belgili bolǵandai, qylmystyq top 2015-2016 jyldary belsendi bolǵan, onyń jetekshisi Erjan Qasymbaev adam óltirgeni úshin 15 jylǵa sottalǵan, qazir abaqtyda otyr.
Qasymbaevtar úsh aǵaiyndy. Aqorda mańyndaǵy kúbir-sybyrǵa jaqyn júretin insaiderlerdiń aitýynsha Sherzattyń oqiǵasynda esim-soiy jii ushyrasqan atyshýly Hasan qazir Almatyda turady, onyń aǵasy Asylan Talǵar qalasy ákiminiń apparat jetekshisi (rýkap).
