ءبىر توپ بۇزاقىنىڭ قولىنان قازا تاپقان 16 جاستاعى شەرزات بولاتتىڭ ءولىمى ءدۇيىم جۇرتتى دۇرلىكتىرىپ، قوعامدا ۇلكەن رەزونانس تۋدىردى. ال بۇل ىستە حاسان قاسىمبايەۆتىڭ ەسىم-سويى ءجيى ۇشىراسادى. بىرنەشە دەرەككوز ونى "حۋتور" اتتى جەرگىلىكتى باندانىڭ باسشىسى رەتىندە اتاپ كورسەتكەن جانە شەرزاتتى اجال قۇشتىرعان كۇدىكتىلەردىڭ وسى ۇيىمعا قاتىسى بار دەگەن اقپاراتتى تاراتقان ەدى. وسى تۇستا الاتاۋ اۋىلدىق وكرۋگى رىسقۇلوۆ اۋىلىنىڭ تۇرعىندارى الىپ-قاشپا اڭگىمەلەردى جوققا شىعارىپ، حالىققا ۇندەۋ جاسادى، دەپ حابارلايدى Dalanews.kz.
تۇرعىنداردىڭ ايتۋىنشا، الەمجەلىدە تاراپ جاتقان اقپاراتتار شىندىققا جاناسپايدى.
"ءبىزدىڭ اۋىل ءۇشىن وتە قيىن جاعداي بولدى. ەڭ الدىمەن مارقۇم شەرزاتتىڭ وتباسىنا قايعىرىپ كوڭىل ايتامىز. "ءبىر قۇمالاق، ءبىر قارىن مايدى شىرىتەدى" دەپ بەكەر ايتپاعان. اۋىر بولعاننان كەيىن وسى تاقىرىپ توڭىرەگىندە نەشە ءتۇرلى اقپارات تاراۋدا. اۋىلىمىز شاعىن بولعانىمەن، وتە ۇيىمشىل ەكەنىن ايتقىمىز كەلەدى. سۋ تاسقىنى كەزىندە كومەك بەرۋ ءۇشىن ءۇش كۇننىڭ ىشىندە 2،5 ميلليون تەڭگە جيناپ، ءوز قولىممەن تابىستاعانمىن. قاڭتار وقيعاسى كەزىندە دە بۇكىل تالعار ءۇنسىز جاتقان كەزدە وسى اۋىلدىڭ جىگىتتەرى بىرەۋ-مىرەۋ كىرىپ كەتپەسىن دەپ كەزەك-كەزەك كۇزەتتى. بۇنى بۇكىل حالىق ەستىگەن شىعار، بىزگە ەشكىم وسىلاي ارەكەت ەتىڭدەر دەپ بۇيرىق بەرگەن جوق.
بۇل – اۋىلىمىزدىڭ ۇيىمشىلدىعى. تاياقتىڭ ەكى ۇشى بولادى. ءبىزدىڭ اۋىلىمىزعا قاتىستى جامان سوزدەردىڭ ايتىلماۋىن سۇرايمىز. ءارتۇرلى پىكىر ايتا بەرمەي، قۇقىق قورعاۋ ورگاندارىنا ارىزدارىن جازسىن، تەكسەرسىن. تەكسەرمەي جاتسا، شۋلاتسىن. ۇيدە وتىرىپ، اناۋ ايتتى، مىناۋ ايتتى دەگەن سوزدەردى دوعارۋ كەرەك"، - دەيدى اۋىل تۇرعىندارى.
ولاردىڭ سوزىنشە، اتىشۋلى حاسان - كوپكە كومەگىن تيگىزىپ جۇرگەن ازامات.
"حاسان كەرىسىنشە، وسى اۋىلدىڭ بىرلىگى مەن تىرلىگىنە شاپقىلاپ ءجۇر. مەكتەپكە دە، مەشىتكە دە اقشالاي كومەكتەسىپ كەلەدى. وسىنداي ازاماتتى قارالاپ، شەرزات مارقۇمنىڭ ءىسى ايدالادا قالدى. ودان ءوش الا الماي جۇرگەندەردىڭ ارەكەتىنە ۇقسايدى. ءيا، ونىڭ ءىنىسى تۇرمەدە وتىرعان شىعار. ال ونىڭ جەكە باسىنا ءتىل تيگىزۋگە بولمايدى. وعان دا اۋىر ءتيىپ جاتىر. دالەل بار ما، كەلىڭدەر، ۇستاپ بەرىڭدەر. ارى قاراي قۇقىق قورعاۋ ورگاندارى وزدەرى شەشەدى. ءقازىر بىرەۋدى وتىز ادامعا جامان دەسەڭ، راسىمەن جامان بولىپ قالادى. سول ءۇشىن الىپ-قاشپا اڭگىمەلەردى دوعارايىق. ءار نارسەنىڭ شەگى بار. بۇنى ەستىگەن بۇكىل اۋىل جىلاپ جاتىر. بۇل سۇمدىق جاعداي بولدى"، - دەپ قوستى ولار.
وسى تۇستا اۋىل تۇرعىندارى حالىقتى نەگىزسىز اڭگىمەلەرگە سەنە بەرمەۋگە شاقىردى.
"ءبىز جەتىم-جەسىردى جىلاتپايمىز. وزىمىزدە شاعىن قور بار. سودان اۋىرىپ جاتقاندارعا، قيىن جاعدايدا قالعاندارعا كومەك بەرەمىز. ءۇي ورتەنىپ كەتسە دە، كومەك ءۇش كۇندە جينالادى. جوق دەگەندە 1000-2000 تەڭگەنى كەمپىر-شالدارعا اكەلىپ بەرەدى. مۇنداي اۋىل قاي جاقتا بار ەكەن؟ ءبىر اۋىز ءسوز ايتامىز، ءبارى ءبىر اۋىزدان كومەكتسۋگە دايىن تۇرادى. ونىڭ اراسىندا كاسىپكەرى دە، زەينەتكەرى دە، ءمۇعالىمى دە، تاكسيستى دە بار. ەندى كەپ ءبىزدىڭ ارامىزعا وت سالىپ جاتىر. بۇلاي ايتۋعا ەشكىمنىڭ قۇقىعى جوق. ءبىزدى بۇلاي قارالاماسىن.
بولار ءىس بولدى. ءبىز دە اشىق سوتتى تالاپ ەتەمىز. باس پروكۋروردان سۇرايتىنىمىز، توبەلەس بولعان كۇنى دۇكەندەگى ۆيدەوسىن قالىپقا كەلتىرىپ، حالىققا كورسەتسىن. حالىق سول كەزدە سەنەدى. ءبىزدىڭ تالابىمىز – سول. بالالارىمىزدىڭ جاساعان قاتەلىگى ءۇشىن قازاق حالقىنان كەشىرىم سۇرايمىز! ارتىق ءسوزدى دوعارساڭىزدار!"، - دەپ ۇندەۋ جولدادى رىسقۇلوۆ اۋىلىنىڭ تۇرعىندارى.
ايتا كەتەيىك، مارقۇم شەرزاتتىڭ ىسىندە ەسىمى بىرنەشە رەت اتالعان حاسان قاسىمبايەۆ ءوزىنىڭ ار-نامىسى مەن ابىرويىن قورعاۋ ماقساتىندا مارقۇم بالانىڭ اكەسىنە جانە تاعى باسقا تۇلعالارعا قارسى ارىز دايىنداپ، تالعار اۋداندىق سوتىنا تاپسىرعان ەدى.
حاساننىڭ ايتۋىنشا، ونىڭ اتىنا تاعىلعان ايىپتار مەن قوعامداعى اڭگىمەلەر شىندىققا جاناسپايدى. ول قاراپايىم تۇرمىستىق توبەلەستى ۇيىمداسقان قىلمىستىق توپتاردىڭ اراسىنداعى قاقتىعىس رەتىندە كورسەتۋگە تىرىسىپ جاتىر دەگەن پىكىردە.
كاسىمبايەۆتىڭ پىكىرىنشە، ونى اتىشۋلى قىلمىستىق توپپەن بايلانىستىرۋ نەگىزسىز. الگى ارىزدا ول ەشقاشان كىسى ولتىرۋگە قاتىستى جاستاردى كورمەگەنىن، بىلمەگەنىن جانە ولاردىڭ ارەكەتتەرىنە ەشقانداي قاتىسى جوق ەكەنىن مالىمدەگەن.
حاسان كەز-كەلگەن قوعامدىق الاڭدا، ءتىپتى ب ا ق ارقىلى ءوزىنىڭ كىناسىزدىگىن دالەلدەۋگە دايىن ەكەنىن باسا ايتقان. ونىڭ ويىنشا، بۇل وقيعا قاراپايىم تۇرمىستىق جانجال بولعان، ءبىراق ونى ادەيى بۇرمالاپ، ۇلكەن قىلمىستىق استار قوسىپ، ونىڭ اتىنا كىر كەلتىرمەكشى.
بۇعان دەيىن ب ا ق بەتتەرى مەن الەمجەلىدە مارقۇم شەرزات پەن ونىڭ وتباسىنا شابۋىل جاساعان ءبىر توپ بۇزاقىنىڭ "حۋتور" اتتى جەرگىلىكتى باندىمەن بايلانىسى بار دەگەن اقپار تاراعان ەدى. بىرنەشە دەرەككوز توپتىڭ توبە باسىندا حاسان ەسىمدى ازاماتتىڭ تۇرعانىن جازعان بولاتىن.
الماتى وبلىستىق پوليسيا دەپارتامەنتى شەرزاتتىڭ ولىمىنە كۇدىكتى رەتىندە ۇستالعان جەتى ادامنىڭ ۇيىمداسقان قىلمىستىق ەش قاتىسى جوعىن جەتكىزگەن.
DALA INSIDE-قا بەلگىلى بولعانداي، قىلمىستىق توپ 2015-2016 جىلدارى بەلسەندى بولعان، ونىڭ جەتەكشىسى ەرجان قاسىمبايەۆ ادام ولتىرگەنى ءۇشىن 15 جىلعا سوتتالعان، ءقازىر اباقتىدا وتىر.
قاسىمبايەۆتار ءۇش اعايىندى. اقوردا ماڭىنداعى كۇبىر-سىبىرعا جاقىن جۇرەتىن ينسايدەرلەردىڭ ايتۋىنشا شەرزاتتىڭ وقيعاسىندا ەسىم-سويى ءجيى ۇشىراسقان اتىشۋلى حاسان ءقازىر الماتىدا تۇرادى، ونىڭ اعاسى اسىلان تالعار قالاسى اكىمىنىڭ اپپارات جەتەكشىسى (رۋكاپ).
