Almaty oblysynyń Jambyl aýdanynda ulttyq at sporty — báigeden halyqaralyq jarys ótti. Jambyl Jabaevtyń 180 jyldyǵyna arnalǵan dúbirli dodaǵa Qazaqstannyń ártúpkiri men Qyrǵyz Respýblikasynan 150-den astam shabandoz qatysty. Sonymen qatar baǵdarlama aiasynda qazaq kúresi, asyq atý, láńgi tebý, armrestling jáne gir kóterýden oblystyq týrnirler uiymdastyryldy. Jalpy jarystarda 300-den astam qatysýshy ózderiniń kúshi men sheberligin synady, dep habarlaidy dalanews.kz.
Merekelik shara uly aqynnyń mereitoiyna arnalǵan jalpyhalyqtyq toiǵa ulasyp, ulttyq dástúr, sporttyq sheberlik pen eldik rýhty toǵystyrdy. Al «Kókbastaý» ippodromy qazaqtyń at sporty tarihy men dástúri zamanaýi sporttyq básekemen toǵysqan mańyzdy alańǵa ainaldy.
«Jambyl aýdanyndaǵy «Kókbastaý» ippodromy Almaty oblysyndaǵy ulttyq at sporty dástúrleri damyp kele jatqan aitýly alańdardyń biri. Kóp jyldan beri munda báige jáne basqa da jarystar uiymdastyrylyp keledi. Endi «Kókbastaýda» jańa kezeń bastalady. Munda zamanaýi sporttyq-mádeni keshen qurý maqsatynda rekonstrýktsiia júrgizý josparlanyp otyr. Jobada kórermenderge arnalǵan tribýnalar, at qoralar, jattyǵý alańdary, sportshylar men kórermenderge qajetti nysandar qarastyrylǵan. Sonymen qatar qonaqúi jáne týristik infraqurylymdy damytý kózdelýde», — dedi Almaty oblysy dene shynyqtyrý jáne sport basqarmasy basshysynyń orynbasary Janserik Adiahmetov.
«Almaty oblysynda báige birtindep óńirdiń sporttyq ómiriniń jarqyn baǵyttarynyń birine ainalyp keledi. Sońǵy jyldary aýdandyq jáne oblystyq jarystardan bastap, respýblikalyq jáne halyqaralyq deńgeidegi básekelerge deiingi tutas júie qalyptasty. Búginde óńir atynan 20-ǵa jýyq shabandoz elimizdegi jáne sheteldegi iri báigelerge qatysyp, joǵary nátijeler kórsetip júr. Sonymen qatar 30–40 maman kún saiyn jylqylardy baptap, jattyqtyrýmen ainalysyp, sheberlik pen dástúrdi urpaqtan urpaqqa jetkizýde. Sońǵy eki jylda báigeden Qazaqstan Respýblikasynyń eki sport sheberi jáne tórt sport sheberligine kandidat daiarlandy. Olardyń barlyǵy nebári 12–14 jastaǵy jas sportshylar. Ásirese Qyrǵyzstanda ótken VI Dúniejúzilik kóshpendiler oiyndaryndaǵy shabandozdardyń jetistigi erekshe atap ótýge turarlyq. Nurasyl Bekbatyr, Asyljan Tólegen jáne Ersultan Jarqyn alaman báigede tuǵyrdyń úsh satysyn túgel ielenip, álemge óz esimderin tanytty. Olar shapshańdyq, batyldyq pen naǵyz erjúrektiliktiń úlgisin kórsetti», — dedi «Báige» federatsiiasynyń Almaty oblysy boiynsha atqarýshy direktory Eldar Jaqypbek.
Búgingi báigede baby men baǵy kelisken sáigúlikter kórermenniń qoshemetine bólendi.
Qunan báigede 11 shaqyrymdyq qashyqtyqta bas júlde — Changan X5 avtokóligin Balqash aýdanynyń ókili Aisultan Samatuly «Baqqara» atty tulparymen jeńip aldy.
Jambyl aýdanynyń tájiribeli shabandozy Ersultan Jarqyn «Erkejiren» tulparymen atty márege ekinshi bolyp keldi. Ol jarystyń kúmis júldesin jáne 1 mln teńge kólemindegi aqshalai syilyqty ielendi.
Ersultan úshin bul — iri báigelerdegi kezekti júldeli oryn. Biyl Qyrǵyzstanda ótken VI Dúniejúzilik kóshpendiler oiyndarynda ol 18 shaqyrymdyq top báigede jeńimpaz atanyp, 25 shaqyrymdyq alaman báigede qola júldege ie bolǵan edi.
«Búgin «Erkejiren» ózin barynsha jaqsy qyrynan kórsetti. Árine, jeńiske jetkimiz keldi, alaida ekinshi oryn da jaqsy nátije. Jattyqtyrýshyma jáne bizdi qoldaǵan barsha janǵa alǵys aitamyn», — dedi Ersultan Jarqyn.
Qola júldeni «Sulýqasqa» atty tulparymen Seraly Ámir jeńip aldy. Oǵan 700 myń teńge kóleminde aqshalai syilyq tabystaldy. Tórtinshi jáne besinshi oryn iegerlerine de aqshalai júldeler berildi.
Top báigede 16 shaqyrymdyq qashyqtyqta Balqash aýdanynyń ókili Merei Garipýllin «Orda» atty tulparymen jeńiske jetti. Jeńimpazǵa basty júlde — Hyundai Palisade avtokóligi tabystaldy.
Ekinshi oryndy Qarasai aýdanynyń ókili Ádiljan Ashatuly «Sekret» atty atymen ielenip, 1,5 mln teńge kólemindegi júldege ie boldy.
Úshinshi orynǵa Almaty qalasynyń ókili Ahmet Arnur «Tobylǵy tory» atty tulparymen turaqtady. Ol úshinshi oryn úshin 1 mln teńge aldy.
Tórtinshi oryn iegerine 700 myń teńge, besinshi oryn iegerine 500 myń teńge kóleminde aqshalai júlde berildi.
25 shaqyrymǵa sozylǵan alaman báigede Pavlodar qalasynyń tulpary birinshi keldi. «Kókserekti» taqymdaǵan Ilesbek Damir as júldege tigilgen ROX avtokóligin utyp aldy.
Ekinshi oryndy Jambyl oblysynyń ókili Bazyrbek Almashan «Baqtory» atty atymen ielendi. Júldesi qory 2 mln teńge.
Al, Astana qalasynyń ókili Mansýr Álijan «Kemeńger» atty tulparymen úshinshi bolyp keldi.
Sondai-aq alaman báigede tórtinshi orynnan jetinshi orynǵa deiingi júldegerlerge de aqshalai syilyqtar tabystaldy.
