Qazaqstan Túrki memleketteri uiymyna múshe elderdiń jetekshi meditsinalyq joǵary oqý oryndaryn biriktiretin jelilik ýniversitet qurý bastamasyn kóterdi. Usynys Bishkekte ótken uiymǵa múshe memleketterdiń densaýlyq saqtaý ministrleriniń altynshy kezdesýinde aityldy, dep habarlaidy dalanews.kz.
Jańa joba dárigerlerdi birlesip daiarlaýǵa, mamandar almasýǵa jáne meditsina ǵylymyn damytýǵa baǵyttalǵan. Onyń aiasynda qoǵamdyq densaýlyq saqtaý, epidemiologiia jáne bioinformatika salalary boiynsha ortaq bilim berý baǵdarlamalaryn ázirleý josparlanyp otyr.
«Qazaqstan Túrki memleketteriniń jelilik ýniversitetin qurýdy usyndy. Ol uiymǵa múshe elderdiń jetekshi meditsinalyq joǵary oqý oryndaryn biriktiredi», – dedi Densaýlyq saqtaý ministri Aqmaral Álnazarova.
Bastamany úilestirý úshin TMU hatshylyǵy janynan Meditsinalyq bilim berý jónindegi úilestirý keńesin qurý usynyldy.
Sonymen qatar Qazaqstan jas ǵalymdar, doktoranttar men rezident dárigerlerge arnalǵan granttyq baǵdarlama ázirleýdi jáne suranysqa ie mamandyqtar boiynsha birlesken taǵylymdamalardy jolǵa qoiýdy usyndy. Basym baǵyttardyń qataryna balalar kardiohirýrgiiasy, transplantologiia, neirohirýrgiia jáne onkogematologiia engizilgen.
Qazaqstannyń ulttyq ǵylymi ortalyqtary men ýniversitet klinikalary túrki elderinen keletin mamandarǵa tájiribelik daiyndyq alańy bolýǵa ázir. Sondai-aq aýyldyq jáne shekara mańyndaǵy eldi mekenderde eńbek etetin dárigerler úshin birlesken oqý baǵdarlamalaryn, kóshpeli mektepter men qysqamerzimdi taǵylymdamalar uiymdastyrý kózdelip otyr.
Buǵan deiin Ózbekstan, Tájikstan jáne Qyrǵyzstanda Qazaqstan meditsinasy kúnderi ótken. Onyń aiasynda dárigerler birlesken operatsiialar jasap, naýqastarǵa keńes berip, zamanaýi meditsinalyq tehnologiialardy qoldaný tájiribesimen bólisken.
Qazaqstan mundai baǵdarlamalardy turaqty ótkizip, birlesken meditsinalyq missiialardy Túrki memleketteri uiymyna múshe ózge elderde de uiymdastyrýdy usyndy.
