Aqtaýda 13 jastaǵy Ismail Azanovtyń ólimine qatysty oblystyq balalar aýrýhanasynyń hirýrgi ýaqytsha ustaý izoliatoryna qamaldy. Dáriger qaiǵyly oqiǵadan keiin jarty jylǵa jýyq ýaqyt ótkende ustalǵan, dep habarlaidy dalanews.kz.
Halyqstan málimetinshe, oqiǵa biyl qańtarda bastalǵan. Ishi qatty aýyryp, appenditsit bolýy múmkin degen kúdikpen aýrýhanaǵa jetkizilgen Ismail birden jatqyzylmaǵan. Keiin Densaýlyq saqtaý ministrligi júrgizgen tekseris kezinde balany aýrýhanaǵa qabyldaýdan tórt ret negizsiz bas tartylǵany anyqtaldy. Sondai-aq onyń jaǵdaiy durys baǵalanbaǵan, qajetti dárigerlik konsiliým ótkizilmegen jáne aýrýhanaǵa jatqyzý keshiktirilgen.
Ismailǵa ota jasalǵan kezde onyń jaǵdaiy aýyrlap ketken edi. Operatsiiadan keiin asqynýlar paida bolyp, bala sanitarlyq aviatsiiamen Almatyǵa jetkizildi. Dárigerler onyń ómiri úshin eki aiǵa jýyq kúreskenimen, 13 sáýirde Ismail kóz jumdy.
Ulynan aiyrylǵan Juldyz Azanova balasyn nelikten aman alyp qala almaǵanyn anyqtaýdy talap etti. Ol prokýratýra men Densaýlyq saqtaý ministrligine birneshe ret júginip, jeke piketke shyǵýǵa daiyn ekenin de málimdedi. Tamyzda densaýlyq saqtaý ministri Aqmaral Álnazarovamen kezdesýge qol jetkizý úshin Aqtaýdan Astanaǵa arnaiy ushyp barǵan.
Ananyń tabandylyǵynan keiin bul oqiǵa qoǵamda úlken rezonans týdyrdy. Osydan soń ministr Instagram paraqshasynda tergeýdiń aiaqtalǵanyn, is materialdarynyń sotqa joldanǵanyn jáne Ismaildyń ólimine qatysty jaǵdaidy «turaqty jeke baqylaýynda» ustap otyrǵanyn jazdy.
Alaida 1 qazanda oblystyq balalar aýrýhanasynyń hirýrgi ýaqytsha ustaý izoliatoryna qamaldy.
Politsiianyń málimetinshe, komissiialyq sot-meditsinalyq saraptama meditsinalyq kómek kórsetý kezinde uiymdastyrý, emdeý taktikasy jáne diagnostika boiynsha birqatar kemshilikke jol berilgenin anyqtaǵan. Bul olqylyqtar balanyń jaǵdaiynyń asqynyp ketýine áser etýi múmkin.
Bul istegi bir jait nazar aýdartady. 9 tamyzda ministr tergeýdiń aiaqtalǵanyn málimdegen edi. Al qazir politsiia tergeý áli jalǵasyp jatqanyn habarlap otyr. Demek, ótken eki aida istiń mán-jaiy ózgergen nemese ministr aitqan «jeke baqylaýdyń» qanshalyqty pármendi bolǵany kúmán týdyrady.
