Sherzat Bolattyń otbasyn politsiia kúzetetin boldy, dep habarlaidy Dalanews.kz.
Oblystyq politsiia departamentiniń málimetinshe,kelip túsken aryzǵa sáikes 4 qazanǵa qaraǵan túni Talǵar aýdanynda qaza tapqan kámeletke tolmaǵan balanyń otbasy kúzetpen qamtamasyz etilgen.
Otbasynyń turǵylyqty jeri boiynsha qaýipsizdikti qamtamasyz etý úshin politsiia qyzmetkerleriniń tarapynan táýlik boiy kezekshiligi uiymdastyryldy.
Eske salaiyq, 12 qazanǵa qaraǵan túni Talǵar tragediiasynda qaza tapqan Sherzat Bolattyń úii órtenip ketti.
Bul týraly áleýmettik jelide habarlana bastady.
Zardap shekkender men qaza tapqandar joq. Kýágerlerdiń sózinshe, úi tutas órtenip ketken.
Bul derekke Politsiia departamenti jaýap berdi.
12 qazanǵa qaraǵan túni Eńbekshiqazaq aýdany Azat aýylyndaǵy úilerdiń birinde órt boldy.
Bótenniń múlkin qasaqana joiý deregi boiynsha politsiia qylmystyq is qozǵady.
Tergeý aiasynda kýágerlerden jaýap alynyp jatyr, sondai-aq beinebaqylaý kameralarynyń jazbalary zerttelip jatyr.
Qazirgi ýaqytta oqiǵanyń mán-jaiy anyqtalyp jatyr.
Eske salaiyq, buǵan deiin Talǵarda jappai tóbeles bolyp, saldarynan 16 jastaǵy jasóspirim kóz jumdy. Janjal jigittiń otbasy jalǵa alatyn dúkennen bastalǵan. Týystarynyń aitýynsha, saýda núktesine kelgen satyp alýshy syra alyp, aqshasyn tóleýden bas tartqan. Osy jaǵdaidan keiin tóbeles bastalǵan.
Kámeletke tolmaǵan balany óltirý faktisi boiynsha Almaty oblysynyń politsiia departamenti qylmystyq is qozǵady.
Qazirgi tańda kináli dep tanylǵan 7 adam ustalyp, ýaqytsha ustaý izoliatoryna qamaýǵa alynǵan.
