سۇيىتىلعان گاز وندىرەتىن كومپانيالار شىعىنعا بەلشەدەن باتۋدا

جاربول كەنت ۇلى 13 اقپ. 2024 15:39 1183

قازاقستاندىق سۇيىتىلعان گاز وندىرۋشىلەر جانارمايدىڭ اتالعان ءتۇرى ارزاندىعىنان شىعىنعا باتىپ وتىر. جانارماي قۇيۋ ستانسيالارىنداعى سۇيىتىلعان گازدىڭ اعىمداعى قۇنى كومپانيالاردىڭ ونى وندىرۋگە جانە جابدىقتى جاڭارتۋعا جۇمسايتىن شىعىندارىن وتەمەيدى، – دەپ حابارلايدى Dalanews.kz.

بەلگىلەنگەن شەكتى كوتەرمە باعا تونناسىنا ققس-سىز 40 320 تەڭگە بولعاندا، سۇيىتىلعان گازدى ءوندىرۋ قۇنى زاۋىتقا بايلانىستى تونناسىنا 50 000-72 000 تەڭگەنى قۇرايدى. بۇل ەلدەگى جانارماي قۇيۋ بەكەتتەرىندەگى تومەن بولشەك ساۋدا باعاسىن ۇستاۋعا مۇمكىندىك بەرەدى. ناتيجەسىندە قازاقستاندا سۇيىتىلعان گازدى تۇتىنۋ نەگىزىنەن اۆتوكولىك جۇرگىزۋشىلەرىنىڭ ەسەبىنەن ءوسىپ، ال ءوندىرىس كولەمى تومەندەۋدە.

بۇل تۋرالى سۇيىتىلعان گاز وندىرۋشىلەردىڭ وزدەرى دە ايتۋدا. ماسەلەن، «قازگەرمۇناي» بك» ج ش س سۇيىتىلعان گازدىڭ بۇگىنگى تاڭدا ق ر ەنەرگەتيكا مينيسترلىگى بەلگىلەگەن باعاسى ءونىمنىڭ وزىندىك قۇنىنان تومەن ەكەندىگىن، شىعىنداردى وتەمەيتىنىن اتاپ ءوتتى. كاسىپورىن اقشابۇلاق، نۇرالى، اقساي كەن ورىندارىنداعى ىلەسپە مۇناي گازىن جانە وڭتۇستىك اقساي كەنىشىنەن شىعاتىن تابيعي گازدى وڭدەپ، قىزىلوردا وبلىسىنىڭ تۇرعىندارىن سۇيىتىلعان گازبەن قامتاماسىز ەتەدى. «قازگەرمۇناي» جىلىنا 60 مىڭ تونناعا جۋىق سۇيىتىلعان گاز وندىرەدى.

– بۇگىندە سۇيىتىلعان گازدىڭ ءوندىرۋ قۇنى مينيسترلىك بەكىتكەن باعادان اسىپ تۇسەدى. بۇل رەتتە قوندىرعىنىڭ پايدالانۋ مەرزىمىن ەسكەرىپ، ۇزدىكسىز وندىرىستىك پروسەستى قامتاماسىز ەتۋ ءۇشىن ۇنەمى جوسپارلى جوندەۋ جۇمىستارىن جۇرگىزۋ جابدىقتى جاڭارتۋ، توزعان بولشەكتەردى اۋىستىرىپ تۇرىپ قاجەت، – دەيدى «قازگەرمۇناي» بك» جشس-نىڭ باس ديرەكتوردىڭ ءوندىرىس جونىندەگى ورىنباسارى ماحامبەت ەلەۋسىنوۆ.

سۇيىتىلعان گاز وندىرۋگە ينۆەستيسيا سالۋعا مۇمكىندىگى بار جەر قويناۋىن پايدالانۋشىلار بۇعان قىزىعۋشىلىق تانىتپايدى. سۇيىتىلعان گازدى ءوندىرۋدى جالعاستىرىپ جاتقان جەر قويناۋىن پايدالانۋشىلار مۇنى شيكىزاتتى وندىرەتىن وڭىرلەر الدىنداعى الەۋمەتتىك مىندەتتەمە رەتىندە ورىنداپ وتىر.

قازىرگى ۋاقىتتا سۇيىتىلعان گاز وندىرەتىن كاسىپورىندار ەنەرگەتيكا مينيسترلىگىمەن بىرگە سۇيىتىلعان گازدىڭ ءوندىرىس قۇنىن وتەي الاتىنداي باعا بەلگىلەۋ ماسەلەسىن تالقىلاپ جاتىر.

– ناقتى ايتقاندا، بۇگىندە نارىقتا كومپانيالاردىڭ سۇيىتىلعان گازدى وندىرۋگە كەتكەن شىعىندارى وتەلمەيتىن جاعداي قالىپتاستى. سۇيىتىلعان مۇناي گازىن ءوندىرۋ رەنتابەلسىز بولعاندىقتان سالا شىعىنعا ۇشىراۋدا، جۇيەلى جوندەۋ جۇمىستارى جۇرگىزىلمەيدى جانە جاڭعىرتۋعا قاراجات سالۋ قيىنعا سوعۋدا.

جاڭعىرتۋ مەن جوسپارلى جوندەۋگە قاراجاتى جەتكىلىكسىز ءوندىرىس ورىندارىنىڭ اپاتتى توقتاۋلارى جيىلەپ، ەلدى سۇيىتىلعان گازبەن قاجەتتى مولشەردە قامتاماسىز ەتۋ قيىنعا سوعۋدا، – دەپ اتاپ ءوتتى ق ر ەنەرگەتيكا مينيسترلىگى گاز ونەركاسىبى دەپارتامەنتىنىڭ ديرەكتورى باقىتجان تاۋبايەۆ


ۇسىنىلعان
سوڭعى جاڭالىقتار
x