قاسىم-جومارت توقايەۆ تازا قازاقستان اكسياسى اياسىندا ءسوز سويلەپ، جانۋارلارعا قامقورلىق مادەنيەتىن قالىپتاستىرۋدىڭ ماڭىزىن اتاپ ءوتتى، دەپ حابارلايدى Dalanews.kz
مەملەكەت باسشىسى ءۇي جانۋارلارىن قورعاۋ جانە ولارعا قاتىگەزدىك كورسەتۋدىڭ الدىن الۋ ماسەلەسىنە ەرەكشە توقتالدى. ونىڭ ايتۋىنشا، جانۋارلاردى قاراۋسىز قالدىرۋ مەن كوشەگە تاستاپ كەتۋ – قاڭعىباس يتتەر سانىنىڭ ارتۋىنا سەبەپ بولىپ وتىر.
پرەزيدەنت ۇكىمەتكە ءۇي جانۋارلارىن دۇرىس كۇتپەگەندەرگە قاتىستى اكىمشىلىك جاۋاپكەرشىلىكتى قاتاڭداتۋدى، ال ولارعا قاتىگەزدىك كورسەتكەندەرگە ارنالعان قىلمىستىق جازانى كۇشەيتۋدى ۇسىندى.
«ءۇي جانۋارلارىنىڭ ادامداردان قورلىق كورۋىنە جول بەرمەۋ كەرەك»، – دەدى قاسىم-جومارت توقايەۆ.
سونداي-اق ول مامانداندىرىلعان جانۋارلار ورتالىقتارىنىڭ جۇمىسىن قوعام باقىلاۋىنا الۋدىڭ ماڭىزىن ايتىپ، بۇل باعىتتا «حايپقا» جول بەرمەۋ كەرەكتىگىن ەسكەرتتى.
پرەزيدەنتتىڭ ايتۋىنشا، وڭىرلەردە قاڭعىباس يتتەر ماسەلەسى وزەكتى بولىپ وتىر، ءتىپتى بالالار مەن ەرەسەكتەردىڭ دە زارداپ شەگۋى جيىلەگەن. سوندىقتان بۇل ماسەلە مەملەكەت پەن قوعامنىڭ بىرلەسكەن ارەكەتىن تالاپ ەتەدى.
مەملەكەت باسشىسى جانۋارلارعا جاناشىرلىقپەن قاراۋ قوعامنىڭ مادەني دەڭگەيىن كورسەتەتىنىن ايتىپ، بۇل باعىتتاعى باستامالار تازا قازاقستان اياسىندا جالعاساتىنىن جەتكىزدى.
